جاڭا سايلانعان دەپۋتاتتاردىڭ جۇمىسى قوعامدى ىلگەرىلەتۋگە بارىن سالىپ, كەم-كەتىگىنىڭ تۇزەلۋىنە ۇنەمى ءۇن قوسۋىنان كورىنەدى. پرەزيدەنتتىڭ ەل دامۋىنا باستايتىن رەفورمالارىنىڭ دا مۇلتىكسىز جۇزەگە اسۋى وسى دەپۋتاتتاردىڭ نازارىندا بولۋى كەرەك. وسىلايشا, ساياسي وزگەرىستەر كەزەڭىندە دەپۋتاتتاردىڭ, ونىڭ ىشىندە ءماسليحات دەپۋتاتتارىنىڭ دا سالماعى ارتا تۇسەدى. مۇنىڭ ءبىر كورىنىسى رەتىندە مەملەكەت باسشىسى وتكىزگەن كەڭەسكە تىكەلەي قاتىسۋىمىز دەپ بىلەمىن. بۇل – حالىقتىڭ بىزگە جۇكتەگەن جاۋاپكەرشىلىگىن ودان سايىن سەزىنە تۇسۋىمىزگە سەپ. ءوز كەزەگىندە ەلدى مەكەندەردەگى ءماسليحات دەپۋتاتتارى ءوز ءوڭىرىنىڭ ماسەلەلەرىنە سەرگەك قاراپ, اكىمدىكتەرمەن تىعىز بايلانىس ورناتىپ, العا جىلجۋعا كۇش-جىگەرىن سالۋى كەرەك. پرەزيدەنت ايتقانداي, مۇنىڭ ءبارى مەملەكەتتىك ساياساتتى ءتيىمدى جۇزەگە اسىرۋعا مۇمكىندىك بەرەدى.
كەلەلى كەڭەستە مەملەكەت باسشىسى ايتقان باسىم باعىتتاردى جۇمىسىمىزدا ۇدايى باسشىلىققا الامىز. اسىرەسە, قالالار مەن اۋىل-ايماقتاردىڭ ابات كەلبەتىن قالىپتاستىرۋعا شاقىرعان ويلارى كوڭىلىمىزدەن شىقتى. راسىندا, ەلدى مەكەندەردىڭ كوركەيۋىنەن تۇتاس ەلىمىزدىڭ بەت-بەينەسى كورىنەدى. سوندىقتان ءار ايماقتىڭ ازاماتتارى ءوز ءوڭىرىن گۇلدەندىرۋگە ەرەكشە مۇددەلى بولعانى ءلازىم. بۇل ماسەلەگە ءاربىر جەرگىلىكتى تۇرعىن سەرگەك قاراۋى كەرەك. ويتكەنى اينالىمىزدىڭ تازالىعى اۋلامىزدىڭ تازالىعىنان باستالادى. مىسالى, جاقىندا مەن جۇمىس بارىسىمەن قىزىلوردا وڭىرىنە بارىپ قايتتىم. ونداعى ەلدى مەكەندەردى ارالاعاندا ءاربىر ءۇيدىڭ اۋلاسىنا دەيىنگى تازالىعىنا ەرەكشە ءتانتى بولدىم. ارعى جاعىنداعى تۇركىستان وڭىرىنە بارعانىمىزدا دا وسىنداي كورىنىسكە كۋا بولدىم. ياعني بۇل وڭىردەگى اعايىنعا ەشكىم كەلىپ اينالاسىن تازارتۋعا شاقىرمايدى, تۇرعىنداردا سونداي تاماشا مادەنيەت قالىپتاسقان. ءدال وسىلاي ەلىمىزدىڭ بارلىق ازاماتى ءوزى تۇرىپ جاتقان جەردىڭ تازالىعىنا, كوركەيۋىنە مۇددەلى بولسا, ۇلەس قوسسا, بايتاق دالامىز قۇلپىرىپ شىعا كەلەدى.
جالپى, پرەزيدەنتتىڭ بارلىق جەردەگى ينفراقۇرىلىمدى دامىتۋدى ەرەكشە ەكپىن سالىپ ايتقانى قۋانتادى. بۇل رەتتە 2029 جىلعا دەيىنگى ۇلتتىق ينفراقۇرىلىمدىق جوسپار ءتۇزۋ تۋرالى ءسوز قوزعالدى. سونىمەن قاتار مەملەكەت باسشىسىنىڭ ازاماتتار تاراپىنان ءجيى تۇسەتىن قاڭعىباس يتتەرگە قاتىستى ءۇن قاتقانى دا ەرەكشە نازار اۋدارتتى. مۇنىڭ پرەزيدەنتتىك دەڭگەيدەگى ماسەلە ەمەس ەكەنىن ءوزى دە ايتتى. بىراق, بۇل ماسەلەنىڭ ۇساق-تۇيەگى بولمايتىنىن, بارلىعى تۇرعىنداردىڭ, اسىرەسە, بالالاردىڭ قاۋىپسىزدىگى ءۇشىن ماڭىزدى ەكەنىن اڭعارتادى. اتالعان جاعدايدىڭ رەتتەلۋىن ءوز وڭىرىمىزدە ءبىزدىڭ نازارىمىزدا ۇستايمىز, زاڭدىق جاعىنان شەشۋدىڭ ءتيىمدى تۇستارىن جان-جاقتى تالقىلايمىز.
مىنە, وسىنداي قادامدارمەن ادىلەتتى قازاقستاننىڭ ىرگەسى نىعايا تۇسەدى. قولعا الىنعان جاڭا رەفورمالاردىڭ بارلىعى حالىقتىڭ كۇتكەن ءۇمىتىن اقتايدى دەپ سەنەمىن.
راشيد ابەۋوۆ,
قاراعاندى وبلىسى اقتوعاي اۋدانى ءماسليحاتىنىڭ توراعاسى
