جەمقورلىققا قارسى ۇلتتىق ستراتەگيا

پرەزيدەنت ن.نازارباەۆتىڭ «قازاقستان جولى – 2050: ءبىر مۇددە, ءبىر ماقسات, ءبىر بولاشاق» اتتى حالىققا جولداۋىندا الەمنىڭ 30 دامىعان ەلدەرى قاتارىنا ەنۋدىڭ كەڭەيتىلگەن جوسپارى ۇسىنىلدى. ەلباسى مەملەكەتتىڭ جاڭا ساياسي باعىتىنىڭ ماق­ساتتارى مەن مىندەتتەرىنە كەرى اسەرىن تيگىزەتىن سىبايلاس جەم­قورلىققا قارسى ستراتەگيانى قالىپتاستىرىپ, ىسكە اسىرۋدى ەڭ ماڭىزدى مىندەت رەتىندە قاراستىردى. «قازاقستان-2050» ستراتەگياسىن ىسكە اسىرۋ اياسىندا ەلىمىزدەگى بولىپ جاتقان اۋقىمدى وزگەرىستەر جاعدايىندا سىبايلاس جەمقورلىققا قارسى ينستيتۋتتار, ءتيىمدى تەتىكتەر مەن امالداردى جانداندىرۋ قاجەتتىلىگى ايقىن بولدى. مىنە, وسى جۇمىستى ۇيلەستىرۋ ءۇشىن پرەمەر-مي­نيستر ك.ءماسىموۆ باسقاراتىن ۆە­دوم­ستۆو­ارالىق جۇمىس توبى قۇرىلدى. ۇلتتىق سىبايلاس جەمقور­لىققا قارسى ستراتەگيانىڭ جوباسىن ازىرلەۋمەن قۇرامىنا پرە­زيدەنت اكىمشىلىگىنىڭ, ورتالىق مەملەكەتتىك ورگانداردىڭ, قازاقستاندىق جانە حالىقارالىق قوعامدىق ۇيىمداردىڭ وكىلدەرى, اتاقتى عالىمدار مەن ساراپشىلار ەنگەن ساراپتامالىق توپ اينالىسادى. قازىرگى ۋاقىتتا ساراپتامالىق توپ مەملەكەتتىك ورگانداردىڭ ۇسىنىستارىن سىبايلاس جەمقورلىققا قارسى ءىس-قيمىلدىڭ ءتيىمدى ستراتەگيا­سىن ىسكە اسىرا العان ەلدەر تاجىريبەسى ارقىلى زەردەلەۋدە. ال سىبايلاستىققا قارسى تابىستى ارەكەت جەمقورلىقتىڭ الدىن الۋعا بەيىمدەلگەن ستراتەگيا بولعاندا عانا دارمەندى. سوندىقتان, جازالاۋدى قاتاڭ­داتۋمەن جانە قىلمىستىق قۋ­دالاۋدى كۇشەيتۋمەن بىرگە, سىبايلاس جەمقورلىقتى تۋدىراتىن سەبەپتەر مەن جاعدايلاردى جويۋعا باعىتتالعان قوسىمشا شارالار پىسىقتالاتىن بولادى. وسى ماسەلەنى شەشۋدە مەملەكەت پەن قوعامنىڭ كۇش سالۋىن بىرىكتىرۋگە اسا كوڭىل بولىنۋدە. ول ءۇشىن قارجى پوليتسياسى اگەنتتىگىنىڭ www.finpol.gov.kz رەسمي سايتىندا 5 شىلدەدەن 25 شىلدەگە دەيىن «حالىقتىق قۇقىقشىعارماشىلىق» اتتى ءبولىم جۇمىس ىستەيتىن بولادى. اتالعان بولىمگە ءاربىر ازامات ءوزىنىڭ ۇسىنىستارىن كورسەتە وتىرىپ, حابارلاما قالدىرا الادى. ءاربىر ۇسىنىس قاراستىرىلادى, ولاردىڭ وزەكتىلەرى جۇمىس توبىنىڭ تالقىلاۋىنان كەيىن ۇلتتىق سىبايلاس جەمقورلىققا قارسى ستراتەگياسىنىڭ جوباسىنا ەنگىزىلەدى. سوندىقتان سىبايلاس جەمقورلىققا قارسى كۇرەسكە ءوز ۇلەسىڭىزدى قوسىڭىزدار, ودان شەت قالماڭىزدار, دەپ حابارلادى قارجى پوليتسياسىنىڭ ءباسپاسوز قىزمەتى.