ەگەمەندىككە قول جەتىپ, تاۋەلسىزدىك تۋىن كوتەرگەلى شاشىلعانىمىزدى جيناپ, ۇمىت قالدىرعانىمىزدى جاڭعىرتا باستادىق. كۇللى قازاقتىڭ قاسيەتتى ءتورى –تۇركىستانىمىزدىڭ يمانىمىزدىڭ كوركى, ءدىنىمىزدىڭ ءتورى, رۋحاني استانامىز ەكەنىن دە ەندى ءبىلىپ جاتىرمىز.
بيىل تۇركىستان وبلىسى قۇرىلعالى 5 جىل تولدى. وسى داتاعا وراي اۋدان اكىمى دىلدابەك ورازباەۆتىڭ قولداۋىمەن تاسساي اۋىلدىق وكرۋگىنىڭ ونەرپازدارى تۇركىستان قالاسىندا ءوز ونەرلەرىن كورسەتىپ قايتتى. وسى ساپارعا اۋدانىمىزدىڭ بەلدى ازاماتتارى دەمەۋشىلىك كورسەتتى. سونىمەن قاتار اۋداندىق ءبىلىم ءبولىمى باسشىسى اسلان تانىسپاەۆ پەن مۇحتار اۋەزوۆ اتىنداعى مەكتەپتىڭ ديرەكتورى گۇلميرا مۇحامەتقاليەۆا رۋحاني كەرۋەن قۇرامىنداعى وقۋشىلار مەن مۇعالىمدەردىڭ الاڭسىز بارىپ كەلۋىنە جاعداي جاسادى.
«تۇركىستان ەر تۇرىكتىڭ بەسىگى عوي» اتتى كونتسەرتتى تاسساي اۋىلدىق وكرۋگى مادەنيەت ءۇيىنىڭ مەڭگەرۋشىسى قابدىكارىم بايجۇمانوۆ, بەساسپاپ اسابا بەرىك بايگەرەەۆ, تاربيەلىك قاسيەتتى بويىنا سىڭىرگەن ۇلاعاتتى ۇستاز باقىت مازىباەۆا اشىپ بەردى. جەرلەسىمىز فارحات مارات ۇلى ءوزىنىڭ ارناۋىندا تۇركىستان مەن اباي وبلىسىنىڭ تارحىن تەرەڭنەن بايلانىستىرا تولعاسا, ماناربەك بەكىشەۆ, قاترەن بايجۇمانوۆ, مەيىرلى سىدىقوۆانىڭ ورىنداۋلارىنداعى اباي ولەڭدەرى كورەرمەندەردى ۇلى بابامىزدىڭ ماڭگى جاسايتىن عيبراتتى جولدارىمەن سۋسىنداتتى.
باعدارلاما بارىسىندا تاسساي اۋىلدىق وكرۋگىنىڭ اكىمى ەرجان مازىباەۆ قىسقاشا ءسوز سويلەدى. ول كوكپەكتى اۋدانى اكىمىنىڭ اتىنان ءىس-شاراعا اتسالىسقان كىتاپحانا ديرەكتورى مەن ۇجىمىنا العىسىن ءبىلدىرىپ, سىي-سياپات جاسادى. جەرگىلىكتى حالىق اباي وبلىسىنان كەلگەن تاسسايلىقتارعا ىستىق ىقىلاس, جاقسى پەيىل تانىتىپ, مۇنداي تاعىلىمدى ءىس-شارالار الداعى ۋاقىتتا دا ءوز جالعاسىن تاباتىنىنا سەنىم ءبىلدىردى. ال تاسسايلىق جۇرتتىڭ سالەمىن جەتكىزگەن شاعىن عانا اۋىلدىڭ رۋحاني كەرۋەنى ساپارىن قاسيەتتى جەرلەرگە زيارات ەتۋمەن اياقتادى.
قايرات مالىكاجدار
تۇركىستان
ۇستازىم – ۇلكەن جولعا باستاۋشىم
«ۇستازى جاقسىنىڭ ۇستامى جاقسى» دەيدى حالىق. بۇگىندە العا ۇمتىلىپ, ءبىلىمىمىزدى پايدامىزعا جاراتا الۋىمىز تەك سول كىسىلەردىڭ ارقاسى. دۇنيەدە ادام بالاسىنىڭ ەكى اناسى بولادى ەكەن. ءبىرى ومىرگە اكەلگەن بولسا, ەكىنشىسى ءبىلىم ۇيرەتىپ, قابىلەتىن اشقان ادام. قولىڭا قالام ۇستاتىپ, ءارىپ تانىتىپ, جازۋدى ۇيرەتكەن العاشقى مۇعالىمىڭ ەسىڭدە ەرەكشە قالادى ەكەن. سول سەكىلدى, مەنىڭ دە ومىرىمدە ۇستازدىقتىڭ ۇلى تاڭباسىن قالدىرعان جان بار. ول – گۇلميرا دۇيسەنقىزى.
2006 جىلى امانگەلدى اۋدانىنداعى جاڭا اۋىل جالپى ءبىلىم بەرەتىن ورتا مەكتەبىنە باستاۋىش سىنىپ مۇعالىمى بولىپ جۇمىسقا ورنالاسقان گۇلميرا دۇيسەنقىزىنىڭ الدىنا 2010 جىلى شاكىرت بولىپ باردىم. ول ءتورت جىل ىشىندە تەك ءبىلىم بەرىپ قانا قويماي, جەتىستىككە جەتۋىمە دە, الدىما ناقتى ماقسات قويۋىما دا سەبەپشى بولدى. ادەبيەت الەمىنە قىزىعۋشىلىعىمدى ەرتە وياتقاندىقتان, ماماندىعىمدى نەبارى 2-سىنىپ وقىپ جۇرگەنىمدە تاڭداعانمىن. بۇگىندە جۋرناليستيكا باسپالداعىنا ەركىن اياق باسۋىم ۇستازدار ارتقان ءۇمىتتىڭ ارقاسى دەپ بىلەمىن.
«ادامنىڭ ادامشىلىعى – جاقسى ۇستازدان», دەيدى اباي. جيىرما جىلدان استام ەڭبەك وتىلىندە گۇلميرا اپايدىڭ تاربيەلەگەن شاكىرتتەرى ەلىمىزدىڭ بەدەلدى ۋنيۆەرسيتتەرىندە وقىدى. ولاردىڭ اراسىندا پەداگوگ پەن دارىگەردەن باستاپ, ساراپشى, اسكەري قىزمەتكەر, ينسپەكتور, جۋرناليست جانە تەاتر ارتىستەرىنە دەيىن بار. قازىر جوعارى ءبىلىم الىپ جۇرگەندەرى دە كوپتەپ سانالادى. ال ەل يگىلىگى ءۇشىن قىزمەت ەتەتىن تۇلەكتەرىنىڭ بولۋى ۇستاز ءۇشىن قانداي باقىت دەسەڭىزشى.
گۇلميرا دۇيسەنقىزىنىڭ ەڭبەگى لايىقتى باعالانىپ, «جىل مۇعالىمى» ماراپاتىنا يە بولدى. وسكەلەڭ ۇرپاققا ساپالى ءبىلىم مەن سانالى تاربيە بەرۋدەگى جەتىستىكتەرى ءۇشىن اۋداندىق ءبىلىم ءبولىمىنىڭ «قۇرمەت» گراموتاسى تاپسىرىلسا, كەيىن «ۇزدىك باستاۋىش سىنىپ مۇعالىمى» اتاعىنا لايىق دەپ تابىلدى. ءسوز ورايىندا ونىڭ ۇلتتىق ينتەرنەت وليمپيادالارىنىڭ جەڭىمپازدارى مەن جۇلدەگەرلەرىن دە تاربيەلەپ شىعارعانىن اتاپ وتكەنىم ءجون دەپ بىلەمىن. وسىنىڭ بارلىعى گۇلميرا دۇيسەنقىزىنىڭ ماماندىققا ادالدىعى بولسا كەرەك.
بي-فاتيما ەرالحانقىزى,
ەۇۋ ستۋدەنتى
استانا
بويداقتار سانى كوبەيىپ بارادى
«اق وتاۋ» كلۋبى بويىنشا جاريالاناتىن ماقالالاردى قىزىعا وقيمىز. جاقىندا «ارمانىم – سۇلۋ قىزعا ۇيلەنۋ» دەگەن تاقىرىپپەن شىققان ماقالانى وقىپ, ەرىكسىز قولىمىزعا قالام الدىق. ماقالا كەيىپكەرى ەسەنبەكتىڭ مومىن, سوزگە ساراڭ ەكەنى ايقىن اڭعارىلادى. ونىڭ ۇستىنە اكە-شەشەسى اۋرۋشاڭ بولعاندىقتان, كوپ قيىنشىلىق كورىپ, دەر كەزىندە ۇيلەنە دە الماعانعا ۇقسايدى. بۇگىندە جاسى بىرازعا كەلسە كەرەك.
قازىرگى كەزدە جورا-جولداستارى مەن تامىر-تانىستارى ء«سۇر بويداق», «كارى شال», «قۋباس» دەپ قاعىتادى ەكەن. ازىلدەپ ايتىلسا دا بۇل سوزدەردىڭ شانشۋداي قادالاتىنى راس. ال ەسەنبەكتىڭ باس قۇراي الماۋى زامانداستارى رەتىندە بىزگە قاتتى باتتى. ونىڭ وزىنە دە ۇياڭدىقتى قويىپ, باتىلداۋ بول دەگىمىز كەلەدى. سۇلۋ قىزعا ۇيلەنگىسى كەلسە, سول جولدا كۇرەسە ءبىلۋى كەرەك ەمەس پە؟ قىزدار جاعى دا جاسى 30-دان استى ەكەن دەپ ارىنا تيمەي, تۇسىنىستىك تانىتىپ جاتسا, قانداي عانيبەت!
بۇگىندە ەلىمىزدە 25 پەن 40 جاس ارالىعىنداعى وتاۋ قۇرماعان قىز-جىگىتتەر سانى 300 مىڭعا تاياۋ كورىنەدى. قانشاما وتباسى قۇرىلماي, قانشاما بوبەك ومىرگە كەلمەي جاتىر دەسەڭشى! بۇعان, ارينە, الەۋمەتتىك جاعدايدىڭ اۋىرلىعى دا از كەسىرىن تيگىزىپ وتىرماعانى انىق. سونىمەن قاتار ماسكۇنەمدىك پەن ناشاقورلىقتىڭ زاردابى دا ايتارلىقتاي دەپ بىلەمىز. ەگەر الەۋمەتتىك احۋال وڭالماسا, جاستاردىڭ جاعدايى ءارى قاراي دا قيىنداي بەرمەك. بۇل ءوز كەزەگىندە ەلىمىزدەگى ءسۇر بويداقتار مەن كارى قىزداردىڭ سانىن ارتتىرا تۇسەتىنى كۇمانسىز.
ال ءبىز ەسەنبەكتىڭ ءوزى سۇلۋ بولماسا دا جانى سۇلۋ ءبىر قىزبەن ەرتەرەك باس قۇراپ, وتباسىلى ازامات اتانۋىنا تىلەكتەسپىز. ەندى باستالىپ جاتقان قويان جىلى كەيىپكەرىمىزدىڭ ارمانى ورىندالاتىن جىل بولسىن!
ا.اققوشقاروۆ,
م.كاماليدەنوۆ
تاراز
