مەملەكەتتىك قىزمەت سالاسىنداعى زاڭنامانى ودان ءارى جەتىلدىرۋدىڭ وزەكتى ماسەلەلەرىن تالقىلاۋ – كەزدەسۋدىڭ باستى ماقساتى بولدى.
«اگەنتتىك مەملەكەت باسشىسىنىڭ تاپسىرماسىنا سايكەس مەملەكەتتىك قىزمەتتى ودان ءارى جەتىلدىرۋگە باعىتتالعان بىرقاتار جوبالاردى جۇزەگە اسىرىپ كەلەدى. ولاردىڭ ءبارى ءبىزدىڭ مەملەكەتىمىزدىڭ يگىلىگى ءۇشىن جۇمىس ىستەيدى دەپ سەنىم ارتامىز. سونىمەن قاتار ءبىزدىڭ كوميتەت مۇشەلەرى زەرتتەۋدى جانە زاڭنامالىق تۇرعىدان بەكىتۋدى تالاپ ەتۋى ىقتيمال بىرقاتار ماسەلەنى كوتەرىپ وتىر», دەدى سەنات كوميتەتىنىڭ باسشىسى اندرەي لۋكين.
مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقباەۆ سەناتورلارعا مەملەكەتتىك قىزمەتتى بيۋروكراتيادان ارىلتۋ, تسيفرلاندىرۋ, مەملەكەتتىك قىزمەتكە كىرۋ كەزىندە ارتىق كەدەرگىلەردى جويۋ جانە ودان «كەتۋ» ءتارتىبىن وڭايلاتۋ جونىندە جۇرگىزىلىپ جاتقان جۇمىستار تۋرالى ايتىپ بەردى.
سەناتورلار كەزدەسۋدى قورىتىندىلاي كەلىپ, بىرقاتار ۇسىنىسىن ايتتى. وندا وڭىرلەردەگى بەلسەندى جانە تالانتتى جاستاردى مەملەكەتتىك قىزمەتكە تارتۋ ماقساتىندا «وڭىرلىك كادر رەزەرۆى» جوباسىنىڭ ساپالى ىسكە اسۋىن قامتاماسىز ەتۋ, سونداي-اق مەملەكەتتىك ورگانداردىڭ جۇمىس ۋاقىتى ءتارتىبىنىڭ ساقتالۋىنا مونيتورينگ جۇرگىزۋ جونىندەگى اگەنتتىكتىڭ وكىلەتتىگىن ىسكە اسىرۋ جونىندە قاجەتتى شارالار قابىلداۋ دا بار.
