كەزدەسۋ بارىسىندا كانديدات پارتيا باعدارلاماسىنىڭ نەگىزگى تارماقتارى جايىندا ءسوز قوزعادى. ول ءوز سوزىندە سايلاۋالدى باعدارلامانىڭ نەگىزگى باعدارى ادام ەكەندىگىن مالىمدەدى. ۇمىتكەر اتاپ وتكەندەي, مەملەكەتپەن جاساقتالعان الەۋمەتتىك ليفتتەردەن بۇگىنگى كۇنى پايدا جوق. سول سەبەپتى الەۋمەتتىك قولداۋ جۇيەسىن قۇرۋ ماڭىزدى.
ۇمىتكەردىڭ پايىمداۋىنشا, الەۋمەتتىك ساياسات ادامداردىڭ نەعۇرلىم داۋلەتتى ساناتتارعا كوتەرىلۋىنە, كەي جاعدايلاردا كەدەيلىككە ۇشىراماۋىنا جاعداي جاساۋى كەرەك. سونىمەن قاتار كانديدات ەڭبەك قاۋىپسىزدىگى ماسەلەلەرىنە دە توقتالدى. بۇل سالادا وندىرىستىك جاراقات پەن جازاتايىم وقيعالاردىڭ دەڭگەيى وتە جوعارى. وعان سەبەپ – جۇمىس بەرۋشىلەردىڭ جۇمىسشىلار دەنساۋلىعىنىڭ قاۋىپسىزدىگىن قامتاماسىز ەتۋ جۇيەلەرىن جاقسارتۋعا قاراجات بولگىسى كەلمەيتىندىگى. بۇل ماسەلە پارتيانىڭ سايلاۋالدى باعدارلاماسىندا جان-جاقتى قامتىلعان. ونى شەشۋ جولدارى دا ءازىر.
ۇمىتكەر جاعدايدى وزگەرتۋ ءۇشىن بيزنەس وليگارحاتتىڭ نە مەملەكەتتىڭ قۋدالاۋى مەن قىسىمىنان قورىقپاي, ادال جۇمىس ىستەپ, سالىق تولەي الاتىنداي قوعامدى, بيزنەستى جانە مەملەكەتتى تەپە-تەڭدىك كۇيىنە قايتارۋ قاجەت ەكەنىن ايتتى. بۇل كەزدە ءىرى كومپانيالار وزدەرىنىڭ بايلىعى مەن مولشەرى ءۇشىن جاۋاپ بەرىپ, مەملەكەت بولسا, ءوز ازاماتتارىنا ەسەپ بەرەتىن بولادى.
كانديدات پارتيانىڭ سايلاۋالدى باعدارلاماسىندا جاڭا ەڭبەك كودەكسىن قابىلداۋ تۋرالى تارماق بار ەكەنىن اتاپ ءوتتى: اتالعان قۇجاتتا ەڭبەك شارتتارىن جاساسۋ كەزىندە جۇمىسكەرلەر مەن جۇمىس بەرۋشىلەردىڭ تولىق تەڭدىگى قامتاماسىز ەتىلەتىن قاعيدات بار.
«ەل حالقىنىڭ ءومىر ساپاسىن جاقسارتۋ – مەملەكەتتىڭ باسىم باعىتتارىنىڭ ءبىرى. الەم بويىنشا ستاتيستيكالىق دەرەكتەردە جاعدايىمىز ءماز ەمەس. ءومىر ساپاسىن ارتتىرۋعا بىرنەشە فاكتور اسەر ەتەدى. جۇمىسسىزدىق ماسەلەسىمەن قاتار, جەمقورلىققا قاتىستى ماسەلەلەردى تۇبەگەيلى شەشپەيىنشە, مەملەكەتتىك باسقارۋ جۇيەسىن قالىپتى جۇزەگە اسىرۋ مۇمكىن ەمەس. جەمقورلىقپەن كۇرەستى كۇشەيتۋ كەرەك», دەدى كانديدات.
