ەكولوگيا مينيسترلىگى استانامەن شەكارالاس ايماقتا جانە اقمولا وبلىسى اۋماعىندا رۇقسات ەتىلمەگەن زاڭسىز پوليگوندار سانىنىڭ تىم كوپتىگىن اتاپ وتكەن بولاتىن. «ۇلكەن قوقىس الاڭى ءوز الدىنا, كىشىگىرىم قوقىس ءۇيىندىسىنىڭ ءوزى توپىراقتى, اۋانى جانە سۋدى ۋلايدى. قوقىس الاڭىنىڭ تاعى ءبىر زياندى سالدارى – قوقىستان بولىنەتىن ۋلى گاز. مۇنىڭ زاردابىن ەڭ الدىمەن وسىعان قارسى كۇرەسىپ جاتقان ششۋچينسك قالاسىنىڭ تۇرعىندارى تارتىپ وتىر. پوليگون گازى وتتەگى بولماعان كەزدە ورگانيكالىق زاتتاردىڭ ىدىراۋىنان پايدا بولادى جانە كومىرقىشقىل گازى, كومىرتەگى توتىعى, مەتان جانە ۇشپا ورگانيكالىق قوسىلىستاردان تۇرادى», دەدى نۇرلان كوپتىلەۋوۆ.
«بىقسىپ جانىپ جاتقان قوقىستىڭ زيانى كەم دەگەندە اللەرگيا, دەمىكپە, وكپە اۋرۋلارى جانە جرۆي-مەن اۋىراتىن ادامدارعا زالالىن تيگىزەدى. ونسىز دا دەرت دەندەگەن ناۋقاستىڭ اۋرۋى اسقىنىپ, دەمى جەتپەي تۇنشىعادى, ءارتۇرلى اللەرگيالىق رەاكتسيالار بەرە باستايدى. ال ۋلى زاتتاردىڭ ۇدايى اۋاعا جايىلۋى قوقىس پوليگونىنا جاقىن ماڭداعى جانداردى ولىمگە دۋشار ەتۋى مۇمكىن», دەيدى پارتيا بەلسەندىلەرى.
بەلسەندىلەر ەلىمىزگە شۇعىل تۇردە جاڭا ۇلگىدەگى زاڭدى قوقىس پوليگوندارى اۋاداي قاجەتتىگىن اتاپ ءوتتى. ال رۇقسات ەتىلمەگەن پوليگونداردى جويۋ ءۇشىن تۇراقتى نەگىزدە ۇزبەي رەيدتەر جۇرگىزۋ كەرەك. سونىمەن قاتار قورشاعان ورتانى لاستايتىن زياندى وشاقتاردى دا جويعان ءجون.
جالپى, ەلدە قالالارداعى اۋانىڭ جوعارى دەڭگەيدە لاستانۋى, قاتتى تۇرمىستىق قالدىقتار پوليگوندارىنىڭ ناشار جاعدايى جانە جايىلىم جەرلەرىنىڭ توزۋى ماسەلەسى وتە وزەكتى. وسىدان ەكى جىل بۇرىن قازاقستاندا اتموسفەرالىق اۋا ساپاسىن مونيتورينگىلەۋ ناتيجەسىندە مەگاپوليستەر مەن ءىرى قالالاردا لاستانۋدىڭ شەكتەن تىس كورسەتكىشى تىركەلگەن ەدى. اتاپ ايتقاندا, تەمىرتاۋ, استانا, الماتى, اقتوبە, اتىراۋ, وسكەمەن, قاراعاندى, بالقاش, جەزقازعان مەن شىمكەنت قالالارى لاستانۋدىڭ وتە جوعارى دەڭگەيدە. جىل سايىن قازاقستاندا 4,5 ميلليون توننا قاتتى تۇرمىستىق, شامامەن 31,6 ميلليارد توننا ونەركاسىپتىك قالدىق تۇزىلەتىنىن اتاپ وتكەن ءجون.
