«لوكوموتيۆ جوندەۋ زاۋىتى» جشس جۇمىسشىلارىمەن جۇزدەسۋ اتالعان سەرىكتەستىكتىڭ وندىرىستىك تسەحىندا ءوتتى. جيىنعا كاسىپورىننىڭ 100-گە جۋىق جۇمىسشىسى قاتىستى. بۇل كەزدەسۋ «اۋىل» ەڭبەك ادامىنىڭ مارتەبەسى ءۇشىن كۇرەسەدى!» تاقىرىبىندا ءوتتى.
«ەلىمىزدە قاراپايىم جۇمىسشىنى قۇرمەتتەۋ دەگەن تۇسىنىك بۇگىندە قۇنسىزدانىپ كەتتى. «ادامدى ادام ەتكەن – ەڭبەك» دەسەك, قوعامدىق قاتىناستار وزگەرگەن قازىرگى كەزدە ءبىز ناعىز ەڭبەك ادامى دەپ كىمدى باعالاپ ءجۇرمىز؟ بىزدە كىمنىڭ تامىر-تانىسى كوپ, سونىڭ جولى بولعىش. كىم پىسىق بولادى, سونىڭ جاعدايى جاقسى. بىزدىڭشە, ەڭبەك ادامى دەگەنىمىز, ەڭ الدىمەن, تازا جۇمىس ىستەيتىن, تابىسىن ماڭداي تەرىمەن تاباتىن ادال جان. تاڭ اتقاننان كۇن باتقانعا دەيىن تىنىم تاپپاي تەر توگەتىن جۇمىسشى قاۋىمى مىنا سىزدەر. جازدىڭ شىلىڭگىر ىستىعى مەن قىستىڭ قاقاعان ايازىندا اشىق اسپان استىندا بەل جازباي ەڭبەك ەتەتىن شارۋالار. وكىنىشكە قاراي, بىزدە ەڭبەك ادامدارىن باعالاۋ جەتىسپەيدى. قىزمەتىنە ادال جۇمىسشى كەز كەلگەن سالادا بولۋى كەرەك. سەبەبى, ەڭبەك ادامى الەۋمەتتىك قۇرىلىمداردىڭ ماڭىزدى بولشەگىنە اينالۋعا ءتيىس. «اۋىل» پارتياسىنىڭ سايلاۋالدى باعدارلاماسىندا ەڭبەك ادامىنا ەرەكشە قۇقىقتىق مارتەبە بەرۋگە قول جەتكىزۋ كەرەكتىگى تايعا تاڭبا باسقانداي انىق جازىلعان. پارتيانىڭ ماقساتى – قاراپايىم ەڭبەك ادامىنىڭ مارتەبەسىن قايتارۋ. بۇل ماسەلە ءسىز بەن ءبىز تىزە بىرىكتىرگەندە عانا قولعا الىنادى. ونداعان جىل بويى سىرەسىپ قاتقان سەڭنىڭ كوبەسى سىزدەردىڭ قولداۋلارىڭىزبەن ماجىلىسكە بارعاندا عانا سوگىلەدى», دەدى كاسىپورىن جۇمىسشىلارى الدىندا ءسوز العان كانديدات جيگۋلي دايراباەۆ.
«انداس Agro» جشس جۇمىسشى ۇجىمىمەن كەزدەسۋدە نيكولاي ارسيۋتين: «اۋىل» پارتياسىنىڭ نەگىزگى ماقساتتارىنىڭ ءبىرى – ەڭبەك ادامىنىڭ قادىرىن ارتتىرىپ, مارتەبەسىن كوتەرۋ. سونداي-اق ولارعا اۋىل شارۋاشىلىعى وندىرۋشىلەرى رەتىندە ارتىقشىلىقتار بەرە وتىرىپ, «ەل اسىراۋشىسىن» قاستەرلەۋدى قالىپتاستىرۋ», دەدى.
