بىرىنشىدەن, بۇل سايلاۋ – بيلىك تارماقتارىن رەفورمالاۋعا كەڭىنەن جول اشادى. وسى شاقىرىلىمدا سايلاناتىن دەپۋتاتتار ادىلەتتى قازاقستاندى قۇرۋ جولىندا بەل شەشىپ كۇرەسەتىنىنە كۇمانىم جوق.
ەكىنشىدەن, بۇل سايلاۋدا 7 پارتيانىڭ مۇشەلەرىمەن قاتار, پارتيالاردا جوق ازاماتتاردىڭ دا ساياسي دوداعا قاتىسۋىنا جول اشىلدى. بۇل جاعىنان العاندا بيىلعى سايلاۋ ەلدىڭ بارلىق ازاماتىنىڭ تەڭ دارەجەدە سايلاۋعا تۇسۋىنە مۇمكىندىك جاسالدى. سايلاۋ قورىتىندىسىندا مىقتى حالىقتىق بلوك قۇرىلاتىنى ءسوزسىز. وسى ورايدا 10 مىڭنان استام ازامات ءماجىلىس پەن ءماسليحاتتار دەپۋتاتى بولىپ سايلانۋعا ءوز قۇقىعىن پايدالانىپ وتىر.
ۇشىنشىدەن, بۇل سايلاۋ ناۋقانىنىڭ ماڭىزدى ەرەكشەلىگى – پارتيالىق تىزىمدەردەگى كۆوتانىڭ كەڭەيۋى جانە دەپۋتاتتىق مانداتتاردى ءبولۋ كەزىندە كۆوتانى ەسەپكە الۋ نورماسى. انىعىراق ايتقاندا, ءماجىلىس دەپۋتاتتارىن سايلاۋدا پارتيالىق تىزىمگە ايەلدەر مەن جاستاردان بولەك, مۇگەدەكتىگى بار جاندار دا ساياسي ۇدەرىستەرگە قاتىسۋدا قيىندىقتاردى باستان كەشىرەتىن الەۋمەتتىك سانات رەتىندە ەنگىزىلىپ, ساياسي كۆوتا بەكىتىلدى. مۇنىڭ باستى ماقساتى – پىكىرلەر ءپليۋراليزمىن قامتاماسىز ەتۋ, بىرجاقتى كوزقاراستى جويۋ جانە ورتاق يگىلىك ءۇشىن شەشىم قابىلداۋدا مۇمكىندىكتەر تەڭدىگىن قامتاماسىز ەتۋ.
سايلاۋدىڭ وسى ەرەكشەلىكتەرگە قۇرىلعان جۇيەسىنە كوشۋ ءبىزدىڭ ازاماتتىق جانە ساياسي بەلسەندىلىگىمىزدى ارتتىرۋعا ايتارلىقتاي سەرپىن بەرەدى. ونىڭ ۇستىنە, بۇل سايلاۋدا ساياسي سىنعا تۇسۋشىلەردىڭ سايلاۋ ناۋقانىندا باسەكەگە قابىلەتتىلىگى تىڭ ۇردىسكە باعىت العانىن كورەمىز. پارتيالار اراسىنداعى باسەكە بولسىن, وكرۋگتىك سايلاۋ اراسىنداعى ۇمىتكەرلەردىڭ باسەكەسى بولسىن, ولاردىڭ ءبارى ساياسي ناۋقاننىڭ كورىگىن قىزدىرا تۇسكەنىن بايقاۋ قيىن ەمەس. بۇل سايلاۋدىڭ قۇندىلىعى وسىندا.
سايلاۋشىلار اراسىنداعى ەنجارلىق پەن بەيجايلىقتى جويۋدا بۇل فاكتورلار اسا ۇلكەن ءرول اتقارىپ وتىرعانىن قازىر ەشكىم دە جوققا شىعارا المايدى. كەز كەلگەن پارتيانىڭ نەمەسە كانديداتتىڭ جانە ونىڭ شتابىنىڭ موتيۆاتسياسى مەن كوزقاراسى, ماتەريالدىق جانە ادامي رەسۋرستارى, ناۋقانعا دايىندىق دەڭگەيى, كرەاتيۆى, شىنايىلىعى سايلاۋالدى ناۋقاننىڭ جوعارى دەڭگەيدە ءوتىپ جاتقانىن بىلدىرەدى. ال مەملەكەت بۇقارالىق اقپارات قۇرالدارىن تەڭدەي پايدالانۋعا كەپىلدىك بەرىپ وتىر. زاڭنامالىق تۇرعىدان بارلىق كانديداتتىڭ مۇمكىندىگىنىڭ تەڭ ەكەنى دە وسى سايلاۋدىڭ ادىلەتتى وتۋىنە اپاراتىن بىردەن-ءبىر جول ەكەنى داۋسىز.
سايلاۋ – حالىقتىق تاڭداۋ. سوندىقتان دا قازاقستاننىڭ بارلىق ازاماتىن پارلامەنت ماجىلىسىنە جانە جەرگىلىكتى ماسليحاتتارعا دەپۋتاتتار سايلاۋى كۇنى وزدەرىنىڭ قالاعان پارتيالارى مەن وكرۋگتەرىنەن ءتۇسىپ جاتقان كانديداتىنا داۋىس بەرۋگە شاقىرامىن. ءسىز سول ارقىلى قازاقستاندا باستالعان ساياسي ينستيتۋتتار رەفورماسىنىڭ ءساتتى وتۋىنە ۇلەس قوسا الاسىز.
جاقسىبەك قۇلەكەەۆ,
مەملەكەت جانە قوعام قايراتكەرى
