سونىڭ ناتيجەسىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەديتسينالىق جانە فارماتسەۆتيكالىق قىزمەتكەرلەردىڭ ەڭبەگىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ازىرلەنىپ, پارلامەنت ماجىلىسىنە, ادىلەت, ەڭبەك جانە حالىقتى الەۋمەتتىك قورعاۋ جانە دەنساۋلىق ساقتاۋ مينيسترلىكتەرىنە ۇسىنىس جولداندى.
عالىمدار اتالعان ماسەلەنى ەگجەي-تەگجەيلى زەرتتەۋ ماقساتىندا رەسپۋبليكانىڭ التى وڭىرىندە بولىپ, جەرگىلىكتى دەنساۋلىق ساقتاۋ ۇيىمدارىنىڭ قىزمەتكەرلەرى اراسىندا 1 مىڭنان استام ساۋالداما مەن سۇحبات جۇرگىزگەن. زەرتتەۋ ناتيجەسى كورسەتكەندەي, مەديتسينالىق جانە فارماتسەۆتيكالىق قىزمەتكەرلەردىڭ ەڭبەك قاتىناستارى زاڭنامادا زاڭدى تۇردە رەتتەلمەگەن. بۇل جۇمىسقا زاڭ عىلىمدارىنىڭ دوكتورى, پروفەسسور ەڭلىك نۇرعاليەۆا جەتەكشىلىك ەتتى.
– جالپى, وسى ساناتتاعى ماماندار جۇمىسىنىڭ اۋىرلىعى عانا ەمەس, ولاردىڭ دەنساۋلىعىنا دا تيەتىن زيان كوپ. سوندىقتان ولاردىڭ جۇمىسىن قۇقىقتىق رەتتەۋ قاجەت. ۇلتتىق زاڭنامانى دامىتۋدىڭ بارلىق كەزەڭىندە مەديتسينا جانە فارماتسەۆتيكا قىزمەتكەرلەرىنىڭ ەڭبەگىن قۇقىقتىق رەتتەۋدى ودان ءارى جەتىلدىرۋ ءۇشىن زەرتتەۋ اياسىندا تەوريالىق جانە پراكتيكالىق ماتەريالدارعا كەشەندى تالداۋ جاسالدى. ءبىز باستاپقى اقپاراتتى جيناۋ ماقساتىندا بىرقاتار ايماقتا دالالىق زەرتتەۋ جۇرگىزدىك. سونىڭ ناتيجەسىندە مەديتسينا جانە فارماتسەۆتيكا ماماندارىنىڭ ەڭبەك جاعدايلارى تۋرالى جەدەل دەرەكتەرگە تولى سۇحبات جانە ساۋالداما الدىق, – دەدى ۋنيۆەرسيتەت پروفەسسورى.
وسى تاراپتا عالىمدار حالىقارالىق تاجىريبەنى دە زەرتتەپ, ونىڭ ىشىندە ەىدۇ-نىڭ جەكەلەگەن مەملەكەتتەرىندەگى قۇقىقتىق رەتتەۋ جولدارىن قاراستىرعان. مىسالى, ۇلىبريتانيادا 1,44 ميلليون ماماندى قامتيتىن 32 مەديتسينالىق جانە فارماتسەۆتيكالىق كاسىپتى رەتتەۋگە توعىز ورگان جاۋاپ بەرەدى. مۇندا كاسىبي رەتتەۋمەن قاتار مەملەكەتتىك رەتتەۋ دە قولدانىلادى.
قىسقاسى, عالىمدار وزدەرى جۇرگىزگەن زەرتتەۋ ناتيجەسى مەديتسينا جانە فارماتسەۆتيكا قىزمەتكەرلەرىنىڭ ەڭبەگىن قۇقىقتىق رەتتەۋ ماسەلەسىندە زاڭناما مەن قۇقىق قولدانۋ پراكتيكاسىن ودان ءارى جەتىلدىرۋگە ىقپال ەتەدى دەگەن سەنىمدە.
