قاراكەمەردە سپورت كەشەنىنىڭ قازىعى قاعىلدى

كورشi قىرعىز ەلiمەن اۋىلى ارالاس, قويى قورالاس جاتقان قورداي اۋدانىندا قاراكەمەر دەگەن اۋىل بار. قاراكەمەر جۇرتى بۇل ايماققا كاسىپكەرلىككە بەيىمدىلىگىمەن, ساۋدا-ساتتىققا ەپتىلىگىمەن تانىمال. اۋىل تۇرعىندارى جىل ون ەكى اي جىلقى بايلاپ, تاراز, اسىرەسە, جاقىن بولعاندىقتان الماتى قالاسىنا ەت ساۋدالاۋمەن اينالىسادى. ەلدىڭ وسى ەڭبەكقورلىعىن, باقۋاتتى تۇرمىسىن, بەرەكەلى تىرلىگىن ناسيحاتتاۋ ماقساتىندا قايبىر جىلى ءوڭىر باسشىلىعى قاراكەمەرگە وبلىستىڭ بارلىق اۋىل, اۋدان اكىمدەرىن جيىپ, وسىنداعى يگىلىكتى ىستەردى ۇلگى ەتكەن-ءدى. مىنە, وسى ۇلگىلى اۋىلدا جاقىندا تاعى ءبىر ۇلكەن تىرلىكتىڭ تۇساۋى كەسىلدى. «وتاۋ ستروي» جشس پرەزيدەنتى, وسى اۋىلدىڭ تۇلەگى قايرات مولداسەيىتوۆ مەكتەپ جانىنان ۇلكەن سپورت كەشەنىنىڭ قۇرىلىسىن باستادى. بۇل, ارينە, قايرات قۇسەيىن ۇلىنىڭ تۋعان اۋىلى, ءبىلىم العان قاسيەتتى شاڭىراعى مەن ۇستازدارىنا, جالپى جەرلەستەرىنە دەگەن قۇرمەتى, تاعزىمى, ىستىق ىقىلاسى ەكەنى ايدان انىق. «باي بولساڭ, ەلىڭە پايداڭ ءتيسىن» دەگەن, بيزنەس الەمىندە كوپتەگەن بيىكتەردى باعىندىرىپ, وڭدى تىرلىكتەرىمەن تانىلعان «وتاۋ-ستروي»-دى ەل ءبىر جاعى قايىرىمدى ىستەرىمەن دە جاقسى بىلەدى. بۇعان دەيىن وسى كومپانيا ءوز دەمەۋشىلىگىمەن ەر تۇرىكتىڭ بەسىگى – كيەلى تۇركىستاندا 16 پاتەرلىك ءۇيدىڭ قۇرىلىس سالىنىپ, 16-سىنىڭ دا كىلتىن تۇرمىسى تومەن, مۇگەدەك جاندارعا تابىس ەتكەنىن, ودان بولەك ءدال وسى قاسيەتتى قالادا مۇگەدەك بالالاردى وڭالتۋ ورتالىعىن دا ءوز قارجىلارىنا سالىپ, پايدالانۋعا بەرگەنىن, شىمكەنت قالاسىندا دا بىرقاتار يگىلىكتى ىستەر اتقارعانىن اقپارات قۇرالدارى جازعان بولاتىن. سونداي-اق, قايرات مولداسەيىتوۆ وسىدان ەكى-ءۇش جىل بۇرىن قاراكەمەرگە 100 ورىندىق بالاباقشا مەن مەشىت, ەمحانا سالىپ بەرىپ, تۋعان اۋىلىنىڭ العىسىن العان-دى. «الەۋمەتتىك جاۋاپكەرشىلىك تۇرعىسىنان مەملەكەت نەگىزىنەن ءوز جولىنان ءوتتى, تۇتاستاي العاندا, ءوزىنىڭ وسى فۋنكتسياسىن ءتيىمدى ورىندادى. ەندى – كەزەك بيزنەستىكى...», دەگەن بولاتىن ەلباسى نۇرسۇلتان نازارباەۆ. وسى تۇرعىدان كەلگەندە «وتاۋ-ستروي» جشس ەلباسى اماناتىنا ادالدىق تانىتىپ جۇرگەن مەكەمە ەكەنىن مويىنداۋىمىز كەرەك. بيزنەستىڭ الەۋمەتتىك جاۋاپكەرشىلىگىن ارتتىرۋ ماقساتىندا قازىعى قاعىلعان بۇل سپورت كەشەنىنىڭ اۋىلدىڭ دامۋىنا جانە جاستار اراسىندا سالاماتتى ءومىر سالتىن كەڭىنەن ناسيحاتتاۋعا قوسار ۇلەسى زور. «ەلىمىزدە سپورت ينفراقۇرىلىمدارىنىڭ تۇراقتى ءوسۋ ءۇردىسى بايقالعانىمەن, ءالى دە اۋىلدىق جەرلەردە سپورت عيماراتتارىنىڭ سانى جەتكىلىكسىز بولىپ تۇرعانى جاسىرىن ەمەس. سپورتتاعى مىقتىلاردىڭ كوپشىلىگى اۋىلدان شىققان عوي. سپورت ادامعا ۇستامدى مىنەز بەرەدى. سوندىقتان قۇرىلىسى كەلەسى جىلدىڭ كۇزىندە اياقتالىپ, پايدالانۋعا بەرىلەتىن بۇل كەشەن بالالاردى ەپتىلىككە عانا باۋلىپ قانا قويماي, جاقسى ءتالىم-تاربيە بەرەتىن ورتالىق بولۋى ءتيىس. بۇل شاڭىراقتان بولاشاقتا وليمپيادا چەمپيوندارىنىڭ, ەلىمىزدىڭ مىقتى ازاماتتارىنىڭ شىقپاسىنا كىم كەپىل؟» – دەيدى بۇل جونىندە ق. مولداسەيىتوۆ. جاقسى تىرلىك جۇعىستى كەلەدى ەكەن. قايرات مولداسەيىتوۆتىڭ وسى تىرلىگى قاراكەمەردە تۋىپ-وسكەن بىرقاتار باقۋاتتى جىگىتتەرگە تۇرتكى بولىپ, الداعى ۋاقىتتا اۋىلدىڭ كىرەبەرىسىنە ۇلكەن قاقپا قويىپ, بىرقاتار كوشەلەردى جوندەپ, مۇمكىن بولسا ساز مەكتەبىن اشۋعا وي تاستادى. ورالحان ءداۋىت, «ەگەمەن قازاقستان». جامبىل وبلىسى. سۋرەتتى تۇسىرگەن التىنبەك قارتاباەۆ.