باسەكە بولا بەرەدى

الماتى – رەسپۋبليكالىق بيۋدجەتتىڭ دونورى عانا ەمەس,  شەشىمى تابىلۋى ءتيىستى, ءومىرى قىم-قۋىت ءوندىرىس ورىندارى جەتكىلىكتى قالانىڭ ءبىرى. سوندىقتان دا وڭتۇستىك استانادا باسەكەلەستىكتى قورعاۋ اگەنتتىگىنىڭ ارالاسۋىن كۇتەتىن قىرۋار شارۋالار جەتكىلىكتى بولاتىن. وسىعان وراي, وتكەن اپتادا اتالمىش مەكەمەنىڭ توراعاسى عالىم ورازباقوۆ مۇندا جۇمىس ساپارىمەن كەلىپ, بىرقاتار كومپانيالار مەن زاۋىتتاردى ارالادى. باسەكەلەستىكتى قورعاۋ اگەنت­­­تىگىنىڭ (مونوپولياعا قارسى اگەنتتىك) توراعاسى عا­لىم ورازباقوۆ ءىسساپارى كەزىندە الماتى قالاسى بويىنشا مونوپولياعا قارسى ينسپەكتسيانىڭ جۇمىسىمەن تانىسىپ, قالا اكىمى احمەتجان  ەسىموۆپەن, قوعامدىق بىرلەس­تىكتەر وكىلدەرىمەن جانە نارىق سۋبەكتىلەرىمەن كەزدەسىپ, كاسىپورىنداردا كەزەگىن كۇتكەن ماسەلەلەر بويىنشا  جيىندار وتكىزدى. الدىمەن توراعا «راحات» كونديتەر فابريكاسىن, «الاتاۋ جارىق كومپانياسى» ەنەرگيا بەرۋشى كومپانياسىن «اقساي» نان-توقاش كومبيناتىن, كوپىر قۇرىلعىلارى زاۋىتىن, مەتروپوليتەندى, «قازقۇرىلىسشى» جشس-نى ارالاپ, ۇجىم باسشىلارىمەن جۇزدەسىپ, ءوز قۇزىرىنداعى اگەنتتىككە قاتىستى قور­دالانعان ماسەلەلەردەن حاباردار بولدى. مۇنان دا بولەك,  اگەنتتىك توراعاسى قاتىسقان «نۇر وتان» پارتياسى قابىلداۋىنا كاسىپكەرلەر قوعامداستىعى, پمك, نارىق سۋبەكتىلەرى وكىلدەرى قاتىسۋعا مۇمكىندىك الىپ, كوكەيلەرىندەگى تۇيتكىل­دەردى ورتاعا سالدى. ايتالىق, تۋريزم قاۋىم­داستىعىنىڭ باسشىسى راشيدا شايكەنوۆا ءوز سالاسىنىڭ پروبلەماسىن كوتەردى. ونىڭ ايتۋىنشا, 2013 جىلى شەتەل­دىك چارتەرلىك رەيستەردىڭ الىپ تاستالۋى اۆيانارىقتى مونوپوليالاندىرۋعا اكەپ سوقتىرعان. بۇل جولاۋشىلار مەن تۋريستەردىڭ اۋەدە ساپار شەگۋىنىڭ قىمباتتاۋىنا اسەر ەتىپ وتىر. ءوز كەزەگىندە عالىم وراز­­باقوۆ ازاماتتىق اۆياتسيانى دامىتۋ بويىنشا مەملەكەت قابىلداعان شارا­لاردى ءتۇسىندىردى. مۇنان وزگە, بقا قازان ايىندا تۇراقتى ەمەس (چارتەرلىك) مارشرۋتتار بويىنشا اۆياتاسىمالداۋلار نارىعىنداعى باسەكەلەس ورتانىڭ جاي-كۇيىنە تالداۋ جۇرگىزەدى, ونىڭ شەڭبەرىندە قاۋىمداستىق كوتەرگەن چار­تەرلەردى كەلىسۋدىڭ كۇردە­لەندىرىلگەن ءتارتىبى ماسەلەسى دە زەردەلەنەتىن بولادى. الماتى قالاسى پمك قاۋىمداستىعىنىڭ وكىلىمەن اڭگىمەلەسۋ بارىسىندا  «توسپا سۋ» مكك-ءنىڭ سەپتيكتەردى تازارتۋ ءۇشىن اقى الۋى, «الماتى ليفت» جشس-ءنىڭ ليفتتەردى جاڭعىرتۋ باعاسىن ارتتىرۋى سىندى وزەكتى جايتتاردىڭ شەتى تارقاتىلدى. بقا توراعاسى ليفت جانە سۋمەن جابدىقتاۋ كومپا­نيالارىنىڭ, مەملەكەتتىك ورگاندار تاراپىنان ىقتيمال زاڭسىز ءىس-ارەكەتتەردى ەسكەرە وتىرىپ, كوتەرىلگەن ماسەلەلەر بويىنشا ءتيىستى جۇمىس ءجۇر­گىزىلەتىنىن, ال بارلىق جۇگىنگەن ادامدارعا قاراۋ ناتيجەلەرى جىبەرىلەتىنىن حابارلادى. ايناش ەسالي, «ەگەمەن قازاقستان». الماتى.