الەم چەمپيونى وكىلەتتىگىن وتكىزدى

برازيليادا ءوتىپ جاتقان الەم چەمپيوناتىنداعى كەشەگى كۇننىڭ باستى جاڭالىعى جاھان جەڭىمپازى – يسپانيا قۇراماسىنىڭ مەرزىمىنەن بۇرىن جارىس جولىنان شىعىپ قالىپ, ءوزىنىڭ وكىلەتتىگىن ەرتە وتكىزەتىنى بولدى.  چيلي فۋتبولشىلارىمەن تاڭمەن تالاسا اياقتاعان بۇل كەزدەسۋىندە يسپان اتلەتتەرى قارسىلاستارى الدىندا دارمەنسىزدىك كورسەتتى. ال بۇدان ءسال بۇرىن گوللانديا قۇراماسى اۆستراليادان ۇتىلىپ تۇرىپ, جەڭىستى تارتىپ اكەتتى. ەڭ سوڭىنان الاڭعا شىققان حورۆاتيا مەن كامەرۋننىڭ تارتىسىندا بۇلاردىڭ الدىڭعىلارى ءىرى ەسەپپەن جەڭىسكە جەتتى. ءبىز وسى ءۇش ماتچقا قاتىستى شولۋىمىزدى يسپانيا – چيلي اراسىنداعى ماتچتان باستاعىمىز كەلىپ وتىر. ءبىرىنشى ويىنىندا گوللانديادان 1:5 ەسەبىمەن ويسىراي ۇتىلعان «قىزىل فۋريا» بۇل كەزدەسۋدە سول جولى العان اۋىر سوققىدان ءالى ەسىن جيناي الماي جۇرگەن ادامنىڭ كەيپىن كورسەتتى. ول قۇددى ءبىر الدىڭعى ۇشىراسۋعا بار كۇش-قۋاتىن سارقا جۇمساپ قويعانداي اسەر قالدىردى. بۇعان قاراعاندا, چيليلىكتەر كەسكەكتى كۇرەسكە ءبىرشاما دايىن بولىپ شىقتى. ولار يسپانداردىڭ بۇرىنعىداي دوپتى ەركىن مەڭگەرۋلەرىنە جول بەرمەدى, بۇل ءۇشىن پرەسسينگتى قاتتى پايدالاندى, اۋماقتاردىڭ ءبارىن جاۋىپ تاستاپ, قارسىلاسىن ءوز مانەرىمەن ويناۋعا ءماجبۇر ەتتى. الاڭداعى وقيعانىڭ بۇلاي وربۋىنە يسپاننىڭ مىقتى دەگەن فۋتبولشىلارىنىڭ ءوزى كەدەرگى كەلتىرە المادى. چيليلىكتەر ماتچتى وتە بەلسەندى باس­تاسا, ەسەسىنە يسپاندىقتار   وڭدى-سولدى قاتەلىكتەر جىبەرۋمەن بولدى. سولاردىڭ بىرىندە يسپاندار الاڭنىڭ ورتاسىندا كۇتپەگەن جەردەن دوپتان ايىرىلدى. ونى ىلە قاشقان چيلي فۋتبولشىلارى ءبىر-بىرىنە تەز قاقپاقىلداپ جەتكىزە وتىرىپ, قارسى ايىپ الاڭىنان ءبىر-اق شىقتى. كومبيناتسيانى باستاعان ۆيدال ەدى, جالعاستىرعان چارلز ارانگيس پەن ۆارگاس بولدى. بۇلاردىڭ سوڭعىسى ارىپتەسى بەرگەن دوپتى قاقپاشى يكەر كاسيلياستىڭ جانىنان قاقپاعا تاستاي سالدى – 1:0! ال تايمنىڭ سوڭىندا الونسو ءوز الاڭى ماڭىندا ءتارتىپ بۇزدى. وعان بەلگىلەنگەن ايىپ دوبىن الەكسيس سانچەس «قابىرعالىقتان» اسىرا ۇردى. تۋرالاي بارعان دوپتى كاسيلياس كەرى قايتارىپ ۇلگەردى. بىراق دوپ ارانگيستىڭ اياعىنا بارىپ تۇرا قالدى. جاعدايدى تەز پايىمداعان چارلز دوپتى كىدىرمەستەن قاقپاعا قايتادان باعىتتادى. گول! وسىمەن ەسەپ 2:0-گە جەتتى. ماۋسىمنىڭ 19-ىنا قاراعان ءتۇنى اۆستراليا جانە گوللانديا قۇرامالارى كەزدەستى. ويىن 3:2 ەسەبىمەن «قىزعالداقتار ەلى» فۋتبولشىلارىنىڭ پايداسىنا شەشىلدى. ايتكەنمەن, جەڭىس وڭايلىقپەن كەلگەن جوق. كەزدەسۋ كەزىندە, ءتىپتى, ۇتىلىپ تا قالا جازدادى. ەكى جاق العاشقى گولدارىن ءبىر-بىرلەرىمەن جارىسا سوقتى. الدىمەن گوللانديالىق ارەن روببەن 20-مينۋتتا ەسەپ اشسا, 21-مينۋتتا تيم كەحيلل تارازى باسىن تەڭەستىردى. ەكىنشى تايمنىڭ باسى ەندى گوللاندتاردىڭ گول جىبەرىپ الۋلارىمەن ورنەكتەلدى. ول 54-مينۋتتا قاپتالدان اۆستراليالىق وليۆەر بوزانيچ تاستاعان دوپتى دەريل يانمات قولىمەن ۇستاپ الۋىنا بايلانىستى بەلگىلەنگەن پەنالتيدەن سوعىلدى. ونى ميلە ەديناك قاتتى ۇرىپ ءتۇسىردى. الايدا, بۇل دۇرلىگىستى گوللانديا ويىنشىلارى تەز باسا ءبىلدى. ارادا بار-جوعى 4 مينۋت وتكەندە, ۆان پەرسي وفسايد شەگىندە تۇرعان ساتىندە قاقپاعا كوكتەي ءوتىپ, گول سالدى – 2:2! ونىڭ ارىپتەسى مەمفيس دەپاي 68-مينۋتتا قارسى شابۋىل كەزىندە ءۇشىنشى گولدى ءتۇسىرىپ, كوماندانىڭ جەڭىسىن قامتاماسىز ەتتى. ەڭ سوڭىنان كامەرۋن مەن حورۆاتيا كۇش سىناستى.  ءاۋ باستان كۆارتەتتەگى اۋتسايدەر سانالعان «قارا قۇرلىق» وكىلدەرى سول بولجامنىڭ بەكەر ەمەس ەكەنىن بىردەن ءبىلدىرىپ, ءتۋرنيردىڭ ەكىنشى ماتچىنان كەيىن-اق پلەي-وفف شايقاستارىنا شىعۋ قۇقىعىنان ايىرىلدى. العاشقى گول سوعىلعان كومبيناتسيانى داريو سرنادان دوپ العان ماريو ماندجۋكيچ باستادى. ول دوپتى كەلەسى كەزەكتى يۆان پەريشيچكە اسىردى. ودان پاس العان يۆيتسا وليچ بار كۇشىمەن سوعىپ, قاقپانىڭ تورىن ءدۇر ەتكىزدى. كامەرۋن قاقپاسى تورىن بۇلك ەتكىزگەن ەكىنشى دوپ ەكىنشى تايمنىڭ باستالعان شاعىندا سالىندى. ول دوپتى قارسىلاستار شابۋىلشىسىنىڭ الدىنا لاقتىرىپ تاستاعان قاقپاشى يتاندجدىڭ قاتەلىگىنەن كەيىن مۇمكىن بولدى. ونى العان پەريشيچ بىردەن ءتورت باعاننىڭ ورتاسىن كوزدەۋگە اسىقپادى. ول بىرنەشە قادام ىلگەرى كەلىپ, وزىنە قولايلى ءسات جاساپ بارىپ, دوپتى قاقپاشىنىڭ جانىنان زۋ ەتكىزدى. تاعى ءبىر شابۋىل تۇسىندا دانيەل پرانيچ ءوزى قول جەتكىزگەن بۇرىشتاما دوبىن الاڭعا ءوزى جەتكىزدى. ول ماندجۋكيچتىڭ باسىنا تۋرالاپ كەلدى. سول كەزدە «باۆاريانىڭ» شابۋىلشىسى بۇل مۇمكىندىكتى قۇر جىبەرمەدى. ارادا 12 مينۋت وتكەندە بۇل فورۆارد تاعى ءبىر گول سوعىپ, چەمپيوناتتا دۋبل جاساۋشىلار قاتارىن ءتۇزدى. كەشە چەمپيوناتتا كولۋمبيا – كوت-د`يۆۋار, ۋرۋگۆاي – انگليا كەزدەستى. ال بۇگىن تاڭ الدىندا جاپونيا مەن گرەكيا ۇشىراستى. سەرىك ءپىرنازار, «ەگەمەن قازاقستان».