ەلىمىزدە ەمدەلۋ شەتەلدەرگە قاراعاندا ەكى ەسە ارزان

استانا. 10 ماۋسىم. بۇگىن ورتالىق كوممۋنيكاتسيالار قىزمەتىندە وتكەن بريفينگتە دەنساۋلىق ساقتاۋ ءمينيسترى ساليدات قايىربەكوۆا شەتەلدەرگە قاراعاندا ەلىمىزدە ەمدەلۋ ەكى ەسە ارزان ەكەنىن مالىمدەدى. بۇل تۋرالى egemen.kz ءتىلشىسى حابارلادى. ساليدات قايىربەكوۆا: «مەديتسينا سالاسىنا جوعارى تەحنولوگيالاردى ەنگىزۋدىڭ ارقاسىندا ازاماتتارىمىزدى شەتەلگە ەمدەلۋگە از جىبەرە باستادىق. ايتالىق, بۇيرەك الماستىرۋ شەتەلدە 4,5 ملن. تەڭگە تۇرسا, قازاقستاندا مۇنداي وتانى جاساۋدىڭ قۇنى 2,1 ملن. تەڭگە تۇرادى. ياعني, ەشقايدا بارۋدىڭ قاجەتى جوق. ءبىر ادامدى شەتەلگە جىبەرىپ ەمدەتكەننەن كورى, سول قارجىعا قازاقستاندا بىرنەشە ادامدى ەمدەۋگە بولادى», – دەدى. ءمينيستردىڭ ايتۋىنشا, ۆەدومستۆو جۇمىسىنا جاڭا ادىستەر ەنگىزىلىپ, ناتيجەسىندە اعىمداعى جىلى بيۋدجەت قاراجاتى ايتارلىقتاي ۇنەمدەلىپتى. بۇرىندارى سالادا كوپ قارجى ستاتسيونارلارعا, قىمبات ەمدەۋ شارالارىنا جۇمسالىپ كەلگەن ەكەن. ەندى كۇندىزگى ستاتسيونارلار قىزمەتىن كەڭەيتۋدىڭ ارقاسىندا 76 ملرد. تەڭگە ۇنەم بولعان. نۇرباي ەلمۇراتوۆ. دەرەككوز: egemen.kz. فوتو: news.mail.ru.