الماتى وبلىسىنداعى اپاتتان 3 ادام قازا تاۋىپ, 15 ادام زارداپ شەكتى

استانا. 10 ماۋسىم. كەشە الماتى وبلىسىندا ورىن العان جول-كولىك وقيعاسى سالدارىنان 3 ادام قازا تاۋىپ, 15 ادام ءارتۇرلى دەڭگەيدەگى جاراقات الدى. بۇل تۋرالى وبلىستىق ىشكى ىستەر دەپارتامەنتى ءباسپاسوز قىزمەتىنىڭ دەرەگىنە سىلتەمەمە جاساعان Tengrinews.kz حابارلادى. پوليتسيا قىزمەتكەرلەرىنىڭ مالىمدەۋىنە قاراعاندا, جول-كولىك وقيعاسى الماتى-وسكەمەن باعىتىنداعى تاس جولدىڭ بويىندا Mitsubishi Delica جەڭىل اۆتوكولىگى مەن Mercedes Sprinter شاعىن اۆتوبۋسىنىڭ سوعىلىسۋىنان بولعان. ىشكى ىستەر دەپارتامەنتى جول كولىك اپاتىنان 15 ادامنىڭ زارداپ شەككەنىن مالىمدەدى.  ولارعا اتالمىش وقيعا جايىندا جەڭىل اۆتوكولىكتە بولعان جولاۋشىلار حابارلاعان. وقيعا ورنىندا ىشكى ىستەر دەپارتامەنتىنىڭ قىزمەتكەرلەرى مەن مەديتسينا قىزمەتكەرلەرى جۇمىس ىستەۋدە. قازىر اپاتتىڭ قالاي بولعانى انىقتالۋ ۇستىندە. ەسكە سالا كەتەيىك, الماتى وبلىسىندا  28 ءساۋىر كۇنى ادام ولىمىنە اپارىپ سوقتىرعان تاعى ءبىر جول كولىك اپاتى ورىن العان بولاتىن. بۇل اپاتتا Lexus اۆتوكولىگى الماتى-بىشكەك جولىندا اۋدارىلىپ قالىپ, 5 ادام قايتىس بولدى. «ءدجيپتى باسقارىپ وتىرعان 47 جاستاعى ايەل مەن ءۇش جولاۋشى وقيعا ورنىندا قايتىس بولىپ, ءۇش ەر ادام ۇزىناعاش اۋىلىنداعى اۋرۋحاناعا جاتقىزىلعان. ولاردىڭ بىرەۋى ەسىن جيماستان سول اۋرۋحانادا كوز جۇمدى. ال قالعان ەكەۋى قازىر دارىگەرلەردىڭ باقىلاۋىندا» - دەدى ىشكى ىستەر دەپارتامەنتىنىڭ قىزمەتكەرلەرى. باس پروكۋراتۋرانىڭ ەسەبىنشە, 2014 جىلدىڭ سوڭعى ءۇش ايىندا جول كولىك اپاتىنان 383 ادام كوز جۇمىپ, 728 ادام ءتۇرلى جاراقات العان. قۇرىش نۇرىمبەت. دەرەككوز: tengrinews.kz. فوتو: فوتو vesti.kz.