ەلىمىزدىڭ دامۋى مەن وركەندەۋىنە قۋاتتى سەرپىن

پرەزيدەنت پوچتاسىنان ەۋرازيالىق ەكونوميكالىق وداق تۋرالى شارتقا قول قويىلۋىنا بايلانىستى ەلباسىنىڭ اتىنا حاتتار مەن جەدەلحاتتار كەلىپ ءتۇستى, دەپ حابارلادى پرەزيدەنتتىڭ ءباسپاسوز قىزمەتى. استانادا جوعارى ەۋرازيالىق ەكونوميكالىق كەڭەستىڭ مەملەكەت باسشىلارى دەڭگەيىندەگى وتىرىسى وتۋىنە جانە ەۋرازيالىق ەكونوميكالىق وداق تۋرالى شارتقا قول قويىلۋىنا بايلانىستى قازاقستان پرەزيدەنتىنىڭ اتىنا قۇتتىقتاۋلار كەلىپ تۇسۋدە. ەۋرازيالىق ەكونوميكالىق وداق تۋرالى شارتقا قول قويىلۋىنا بايلانىستى قازاقستان رەسپۋبليكاسى مەملەكەتتىك سىيلىعىنىڭ لاۋرەا­تى س.دوسانوۆ ءوز قۇتتىقتاۋىن جولدادى. «قازاقستان, رەسەي جانە بە­لارۋس پرەزيدەنتتەرىنىڭ وسى تاريحي قۇجاتقا قول قويۋى ءبىزدىڭ ەلىمىزدىڭ ودان ءارى دامۋى مەن وركەندەۋى ءۇشىن قۋاتتى سەرپىن بولادى»,  دەپ اتاپ وتكەن جازۋشى. ەۋرازيالىق ەكونوميكالىق وداق­تى قۇرۋعا قاراعاندى مەملە­كەتتىك تەحنيكالىق ۋنيۆەرسيتەتىنىڭ ستۋدەنتتەرى مەن وقىتۋشى-پرو­فەس­­سورلارى اتىنان وسى وقۋ ورنى­نىڭ رەكتورى ا.عازاليەۆ قولداۋ بىلدىرگەن. «ەۋرازيالىق وداق قۇرۋ يدەيا­سىن ءسىز تۇڭعىش رەت وسىدان 20 جىل بۇرىن ۇسىندىڭىز. بۇگىندە ەۋرا­زيالىق ىقپالداستىق ءىس جۇزىنە اسۋدا جانە ءوزىنىڭ ماڭىزدىلىعىن دالەلدەۋدە»,  دەلىنگەن حاتتا. «Alageum Electric» كومپانياسى باقىلاۋشىلار كەڭەسىنىڭ توراعاسى س.قوجاباەۆ  ءوز كەزەگىندە ساۋدا بايلانىستارى مەن تاۋار وندىرۋشىلەر ىقپالداستىعىن دامىتۋ ءۇشىن ەاەو قۇرۋدىڭ تيىمدىلىگىن اتاپ وتكەن. «ىقپالداستىق ۇدەرىستەرىن تەرەڭدەتۋ ءبىز ءۇشىن پايدالى جانە ءبىزدىڭ مۇددەلەرىمىزگە ساي. ەلەكترلى ماشينا جاساۋ سالاسىندا جۇمىس ىستەي ءجۇرىپ, ءبىز نارىققا باسەكەگە قابىلەتتى ەلەكتر-تەحنيكالىق ونىمدەردى شىعارۋ ارقىلى سىرتقى ساۋدا بايلانىستارى قارقىنىن ودان ءارى ارتتىرا تۇسەتىن بولامىز», دەپ جازادى اۆتور. «ساۋتس-ويل» مۇناي-گاز كوم­پا­نياسىنىڭ پرەزيدەنتى س.سەيت­جانوۆ ءتۇرلى سالالار ءۇشىن ىقپال­داستىقتىڭ ماڭىزدىلىعىن اتاي وتىرىپ, شارتقا قول قويۋدى تاۋەلسىز قازاقستاننىڭ دامۋىنداعى جاڭا كەزەڭىنىڭ باستاپقى نۇكتەسى دەپ اتاعان. «ءبىزدىڭ كاسىپورىندارىمىزدىڭ ءبىرى  –  «ستاندارت تسەمەنت» جشس 2013 جىلى دايىن ءونىم شىعارۋ بويىنشا ءوزىنىڭ جوبالىق قۋاتىنا جەتتى. بۇعان كەدەن وداعى مەن ءبىرتۇتاس ەكونوميكالىق كەڭىستىكتىڭ جۇمىسى ىقپال ەتكەنى ءسوزسىز, ءويت­كەنى, ءبىزدىڭ ءونىم كورشى ەلدەردە ءۇل­كەن سۇرانىسقا يە», دەيدى س.سەيت­جانوۆ. الماتىنىڭ تۇرعىنى م.جاۋا­روۆ ءوز حاتىندا مەملەكەت باسشىسىن ەۋرازيالىق ەكونوميكالىق وداق تۋرالى شارتقا قول قويى­لۋى­مەن قۇتتىقتاپ, وسى بىرلەستىكتىڭ ءساتتى دامۋىن تىلەگەن. وڭتۇستىك قازاقستان وبلىسىنىڭ زيالى قاۋىم وكىلدەرى ەۋرازيالىق ەكونوميكالىق وداق قۇرۋ وتاندىق كاسىپكەرلىك ءۇشىن زور مۇمكىندىكتەر ۇسىناتىنىن اتاپ وتكەن. «ءسىز باستاماشىلىق ەتكەن تاريحي جوبالاردىڭ ءبارى بۇگىندە ومىرشەڭدىگىن تانىتۋدا. قازىردىڭ وزىندە ەلەۋلى ناتيجە كورسەتىپ جاتقان كەدەن وداعى سونداي مىسالداردىڭ ءبىرى بولىپ سانالادى»,  دەيدى حات يەلەرى.