اقپاراتتار اعىنى

● سولتۇستىك قازاقستاندا كوكتەمگى دالا جۇمىستارى اياقتالىپ كەلەدى. بيىل ايماقتا 4 ملن. 340 مىڭ گەكتار القاپقا ەگىس ورنالاسسا, ونىڭ 99 پايىزىن ءداندى داقىلدار قۇرادى. وبلىس اكىمى ەرىك سۇلتانوۆتىڭ ايتۋىنشا, بۇل جۇمىستاردى دەر كەزىندە وتكىزۋگە ساتىپ الىنعان جاڭا جوعارى ءونىمدى تەحنيكالاردىڭ جاردەمى از بولماعان. ● شىعىس قازاقستان وبلىسىنىڭ ورىس دراما تەاترى رەسەيدەگى حالىقارالىق فەستيۆالدا ءۇش دۇركىن لاۋ­رەات اتاندى. ماسكەۋدىڭ ىرگەسىندە 19-شى رەت وتكىزىلگەن بايقاۋ «ورىس كلاسسيكاسى» دەپ اتالدى. وندا وسكەمەننەن بارعان ترۋپپا نيكولاي گوگولدىڭ «ۇيلەنۋ تويى» اتتى تۋىندىسى بويىنشا قويىلىممەن شىقتى. ● پاۆلودارلىق كونسترۋك­تورلار بىرەگەي جەل قوندىر­عىسىن جاسادى. جاڭا اپپا­راتتىڭ ەرەكشەلىگى سوندا, جەل گەنەراتورى ەنەرگيا ءوندىرۋ جانە ارتەزيان قۇدىقتارىنان سۋ شىعارۋ سەكىلدى بىردەن ەكى مىندەتتى ورىندايدى. قازىر ول ۇلگى رەتىندە جاسالىپ جاتىر. تاياۋداعى ۋاقىتتاردا جوبا اۆتورلارى ونىڭ سەريالىق ءوندىرىسىن جولعا قويماقشى. ● شىمكەنتتە قوقىس ءوڭ­دەيتىن زاۋىت تاجىريبەلىك سي­پات­تا ىسكە قوسىلدى. قۇرى­لىسى 2011 جىلى قولعا الىنعان بۇل ءوندىرىس ورتالىعىنىڭ جۇمىسى ەندى اياقتالدى. ول رەسەيلىك مامانداردىڭ ارالاسۋىمەن قاتارعا تۇردى. ● جامبىل وبلىسىندا ءمۇ­گەدەك بالالاردى بەيىم­دەۋ ورتالىعى اشىلدى. وب­لىستىق مەكەمەنىڭ فيليالى مۇمكىندىگى شەكتەۋلى 30 بالاعا دەيىن قابىلداي الادى. جاڭا عي­ماراتتى سالۋ بيۋدجەتكە 8 ملن. تەڭگەگە ءتۇستى. ەندى اۋىل بالالارىنىڭ ارنايى سا­باق­تارعا بارۋى ءۇشىن قالاعا سا­بىلۋىنىڭ ءجونى جوق. ● قىزىلوردادا جازۋشى قازي داناباەۆتى ەسكە الۋعا ارنالعان تۋرنير بولدى. وندا مەكتەپ وقۋشىلارى شاعىن فۋتبولدان, جۋرناليس­تەر شاحمات پەن دويبىدان ءوزارا سايىسقا ءتۇستى. جارىستىڭ اشىلۋ راسىمىندە «مەن بولماسام بولمايىن, سەن امان بول, جاھانداعى جالعىزىم, قازاقستان!» دەپ جىرلاپ, ومىردەن وتكەن قا­لامگەر تۋرالى قىزىلوردا مەملەكەتتىك ۋنيۆەرسيتەتىنىڭ پروفەسسورى مۇستافا ماتاەۆ جاقسى ەستەلىك ايتتى. ● اقتوبەلىك زەينەتكەر اۋا قىسىمىمەن جۇرەتىن قوزعالتقىش ويلاپ تاپتى. ءوزىنىڭ جاڭالىعىن ەحرو-2017 كورمەسىنە ۇسىنباقشى بولىپ وتىرعان باقبەرگەن تاحانوۆ ۇزاق جىلدار قۇرىلىس سالاسىندا ەڭبەك ەتكەن. ول ءوز اۆتورلىق يدەيالارىنا 27 جىل ىشىندە 4 پاتەنت العان. ● اتىراۋدا بالىقتار قى­رىلعاننان كەيىن ايماق­تاعى بارلىق سۋ قويمالارى تەكسەرىلۋدە. اتىلمىش جۇ­مىس­قا تابيعاتتى قورعاۋ پروكۋراتۋراسى بەلسەنە كىرىستى. ءبىرىنشى كەزەكتە جايىق وزە­نى­نەن شىعاتىن كانالدار, سوسىن ودان وقشاۋلانعان سۋ قوي­مالارى تەكسەرۋدەن وتكىزىلەدى. «قازاقپارات», BNews.kz, Abai.kz 24KZ, Otyrar.kz, اltaynews.kz, Egemen.kz اگەنتتىكتەرىنىڭ سايتتارى دەرەكتەرى بويىنشا دايىندالدى.