فرانتسۋز ەلشىسى ينستيتۋت قوناعى بولدى

قوستاناي مەملەكەتتىك پەداگوگيكا ينستيتۋتى مەن فرانتسيانىڭ قازاقستانداعى ەلشىلىگى اراسىندا تىعىز بايلانىس ورناعان. ول كەزدەيسوق ەمەس. ەلىمىزدە فرانتسۋز ءتىلى ماماندارىن جالعىز وسى ءبىلىم ورداسى عانا دايىندايدى. سونىمەن قاتار, مۇندا فرانتسۋز مادەنيەتىن تانىتاتىن كوپتەگەن شارالار جۇرگىزىلەدى. ينستيتۋت جانىندا قازاق-فرانتسۋز مادەني ورتالىعى بىرنەشە جىلدان بەرى جۇمىس ىستەيدى. اكادەميالىق قارىم-قاتىناستى دامىتۋ اياسىندا جىلىنا 7 ستۋدەنت پەرپينيان قالاسىنداعى ۆيا دوميسيا ۋنيۆەرسيتەتىندە وقىپ كەلەدى. ينستيتۋتتا فرانتسۋز مادەنيەتىنە ارنالعان بايقاۋلار, ەلتانۋعا ارنالعان زەرتتەۋ جوبالارى جۇزەگە اسىرىلادى. بولاشاقتا ينستيتۋت فرانتسۋز ءتىلىن ۇيرەنۋدى دامىتۋدىڭ قازاقستانداعى يننو­ۆاتسيالىق-ادىستەمە ورتالىعىنا اينالاتىن بولادى. فرانتسۋز مادەنيەتىن تاراتۋعا قوسقان زور ۇلەسى ءۇشىن ينستيتۋت رەكتورى قۋات بايمىرزاەۆ ۇستىمىزدەگى جىلدىڭ مامىر ايىندا فرانتسۋز رەسپۋبليكاسىنىڭ مادەنيەت, ءبىلىم جانە عىلىم سالاسىنداعى جوعارى ناگراداسى – اكادەميالىق پالما وردەنىمەن ماراپاتتالعان ەدى. فرانتسيانىڭ قازاقستانداعى توتەنشە جانە وكىلەتتى ەلشىسى فرانسيس ەتەن مىرزا ءبىلىم ورداسىنا ارنايى كەلىپ, ءوز حالقىنىڭ مادەنيەتىنە قاتىستى جانە فرانتسۋز ءتىلى مۇعالىمدەرىن دايىنداۋعا بايلانىستى جۇرگىزىلىپ جاتقان جۇمىستاردىڭ كۋاسى بولدى. ەلشى وسى ساپارىندا ستۋدەنتتەرگە فرانتسيا تاريحى, فرانتسۋز ءتىلىنىڭ دامۋى جانە قازىرگى ۋاقىتتا ونىڭ الەمدىك ءتىل رەتىندە الاتىن ورنى تۋرالى لەكتسيا وقىدى. فرانسيس ەتەن اركىمنىڭ ءوزىن بۇگىنگى قوعامدا تۇلعا رەتىندە قالىپتاستىرا بىلۋدەگى جانە ءبىلىم كەڭىستىگىندەگى ءتىل ءبىلۋدىڭ ماڭىزىن اتاپ ايتتى. لەكتسيا ستۋدەنتتەردىڭ ۇلكەن قىزىعۋشىلىعىن وياتتى, ول جاستاردىڭ ەلشىمەن فرانتسۋز تىلىندەگى تىكەلەي اڭگىمەسىنە ۇلاستى. ەلشى قوستانايلىق ستۋدەنتتەردىڭ فرانتسۋز تىلىندە ەركىن سويلەۋىنە, ولاردىڭ بىلىمىنە تاڭدانىسىن ءبىلدىردى. بولاشاق مۇعالىمدەردىڭ كاسىپتىك جانە تىلدىك دايىندىعىن پىسىقتاۋ ءۇشىن ستۋدەنتتەر مۇنداي كەزدەسۋلەردىڭ ءجيى بولعانىن قالايتىندىقتارىن جەتكىزدى. ءنازيرا جارىمبەتوۆا, «ەگەمەن قازاقستان». قوستاناي.