سۋرەتتى تۇسىرگەن ورىنباي بالمۇرات
وزدەرىڭىزگە بەلگىلى, مەملەكەت باسشىسى قاسىم-جومارت كەمەل ۇلى 2022 جىلدى بالالار جىلى دەپ جاريالادى. پرەزيدەنت: «وسكەلەڭ ۇرپاقتىڭ ۇيلەسىمدى دامۋى مەن باقىتتى بالالىق شاعى – ءبىزدىڭ جالپىۇلتتىق مىندەتىمىز. مەن مەملەكەت باسشىسى رەتىندە وسكەلەڭ ۇرپاقتىڭ بولاشاعىنا باسا ءمان بەرەمىن», دەپ اتاپ ءوتتى.
وتباسىنداعى بالا تاربيەسى – وزەكتى ماسەلە. وسى رەتتە مەشىتتەر جانىنان اشىلعان وتباسىلىق كەڭەس بەرۋ ورتالىقتارىنىڭ جۇمىسىنا باسا نازار اۋدارىلىپ وتىر. شىن مانىندە بالالار اراسىندا كوزى اشىق, كوكىرەگى وياۋ, ويى ۇشقىر بۇلدىرشىندەر از ەمەس. الايدا ولاردىڭ تەلەفونعا تاۋەلدىلىگى, پسيحولوگيالىق كۇيزەلىسى مەن جامان ادەتتەرگە اۋەستىگى كەز كەلگەن اتا-انانى ويلاندىرماي قويمايدى.
يمامدارىمىز بەن ۇستازدارىمىز وسى ماسەلە بويىنشا اتا-انالارعا رۋحاني تۇرعىدان كومەكتەسىپ, ءتيىستى كەڭەس بەرىپ كەلەدى. ويتكەنى ۇرپاعىمىزدى وتانسۇيگىشتىككە, اتا-انانى قادىرلەۋگە, يماندىلىق پەن ادامگەرشىلىككە باۋلۋىمىز كەرەك. وسى باعىتتا قازاقستان مۇسىلماندارى ءدىني باسقارماسى جانىنداعى ايەل-قىزدار سەكتورى مەن جاستار سەكتورى اتا-انالارعا كەڭەس بەرۋ سەمينارلارىن, بالالاردى, جاسوسپىرىمدەردى يماندىلىققا تاربيەلەۋگە باعىتتالعان دارىستەر ۇيىمداستىرىپ كەلەدى.
2022 جىلى ەلىمىز بويىنشا حالىققا وتباسى قۇندىلىعى, وتاننىڭ قادىر-قاسيەتى, ەڭبەك ەتۋدىڭ ماڭىزى, سالت-ءداستۇر تاقىرىپتارىندا 274 872 ۋاعىز-ناسيحات ايتىلدى. جىل بويى حالىقتان كەلىپ تۇسكەن 164 229 سۇراققا جاۋاپ بەرىلدى. وتباسىلارعا كەڭەس بەرۋ ماقساتىندا 7918 كەزدەسۋ وتكىزىلدى. ءبىزدىڭ يمامدارىمىز اجىراسۋ تۋرالى شەشىم قابىلداعان كوپتەگەن وتباسىنا تۇسىندىرمە جۇمىستارىن جۇرگىزىپ, ولاردىڭ نەكەلەرىنىڭ بۇزىلماۋىنا ىقپال ەتۋدە. اللاعا شۇكىر, وسىنداي تاباندى ەڭبەكتىڭ ارقاسىندا قانشاما وتباسىنىڭ شاڭىراعى شايقالماي, باسقا تۇسكەن سىناقتى سابىرمەن جەڭىپ, ۇيلەسىمدى ءومىر ءسۇرىپ كەلەدى.
قازىر قوعام ونەگەلى رۋحاني ۇستازدارعا مۇقتاج. ءدىن قىزمەتكەرلەرىنە ارنالعان جيىنداردا قوعامنىڭ رۋحاني قاجەتتىلىگىن وتەۋدە يمامداردىڭ بەلسەندى بولۋ قاجەتتىگىن ۇنەمى قاپەرگە سالىپ كەلەمىن. بۇل ىستە تاباندىلىق پەن تۇراقتىلىق تانىتساق, مەملەكەتىمىزدىڭ بولاشاعىنا ۇلكەن ۇلەس قوساتىنىمىز ءسوزسىز. اللا تاعالا قۇدسي حاديستە: «ق ۇلىمنىڭ عيباداتىنىڭ ماعان ۇنامدىسى – مەنى تانىتۋى مەن مەنىڭ اتىمنان ناسيحات ەتۋى», دەپ باياندايدى. بۇل حاديس بارشا ءدىن قىزمەتكەرىنە ۇلكەن جىگەر بەرەتىنى ءسوزسىز.
قازىرگى تاڭدا يمامداردىڭ جان-جاقتى, ءبىلىمدى بولۋى – زامان تالابى. ساپالى ءدىني كادر دايارلاۋ – ءدىني باسقارمانىڭ نەگىزگى جۇمىس باعىتىنىڭ ءبىرى. بۇگىنگى تاڭدا ەلىمىز بويىنشا 7 258 ءدىن قىزمەتكەرى جۇمىس ىستەيدى. ونىڭ 5 228-ءى – كاسىبي ءدىني مامان. ءدىني سالادا 206 (39%) ماگيستر, 10 (2%) عىلىم دوكتورى قىزمەت ەتۋدە. قاريلار سانى – 132 (25%). 2023 جىلى جوعارى جانە ارنايى ورتا ءدىني ءبىلىمى بار ءدىن قىزمەتكەرلەرىنىڭ (69%) سانىن 5 پايىزعا (74%) كوتەرۋ جوسپارعا ەنگىزىلدى.
2022 جىلى يمامداردىڭ ءبىلىمىن جەتىلدىرۋ ماقساتىندا استانا قالاسىنان حۋسامۋددين ءاس-سىعاناقي اتىنداعى يسلام ينستيتۋتىن اشتىق. قازىر ينستيتۋتتا 40 يمام ءبىلىمىن جەتىلدىرۋدە. جاس قاريلارىمىزدى جىگەرلەندىرۋ ماقساتىندا ينستيتۋت جانىنان يجازا بەرۋ ورتالىعىن ىسكە قوستىق. بۇگىنگى تاڭدا رەسپۋبليكا بويىنشا 7 قاريلار دايىنداۋ ورتالىعىندا 536 قاري قۇران جاتتاۋدا.
وسى جىلى 603 ستۋدەنت نۇر-مۇباراك ۋنيۆەرسيتەتىن, 9 مەدرەسە-كوللەدجىن جانە حاسەكي اكادەمياسىن ءبىتىردى. 158 يمام رەسپۋبليكالىق يمامداردىڭ ءبىلىمىن جەتىلدىرۋ يسلام ينستيتۋتىندا ءبىلىمىن جەتىلدىرىپ شىقتى. 1248 يمام ارنايى اتتەستاتتاۋدان ءوتتى. يمامداردىڭ ءبىلىم دەڭگەيىن كوتەرۋ بويىنشا «ۇزدىكسىز ءبىلىم بەرۋ تۇجىرىمداماسى» قۇجاتى قابىلداندى.
وزدەرىڭىزگە ءمالىم, كوپ جاعدايدا جاس ماماندار ۇلكەن قالالاردا قىزمەت ەتۋدى ماقسات تۇتىپ, بارىن سالادى. ارينە, بۇل – جاقسى تالپىنىس. الايدا بۇل ءۇردىس اۋىلداعى مەشىتتەردىڭ جۇمىسىنا كەرى اسەر ەتەتىنى بەلگىلى. ءبىز وسى ورايدا «جاس مامان, اۋىلعا قادام باس, مامان» جوباسىن جۇزەگە اسىرىپ كەلەمىز. وسى باعىتتا جاس ءدىني مامانداردى اۋىلعا قىزمەتكە تارتۋدىڭ كەشەندى باعدارلاماسى ازىرلەنۋدە. ماقساتىمىز – اۋىلداعى مەشىت جۇمىسىن جانداندىرۋ. اۋىلعا ءدىني قىزمەتكە باراتىن جاس مامانداردىڭ الەۋمەتتىك ماسەلەسىن تولىق شەشۋ باعىتىندا ءتيىستى جۇمىستار اتقارىلىپ كەلەدى. اللا قالاسا, قولعا العان بۇل جوسپارىمىز ويداعىداي جۇزەگە اسادى دەگەن ۇمىتتەمىز.
ناۋرىزباي قاجى تاعان ۇلى,
قمدب توراعاسى, باس ءمۇفتي
