قوستانايدا مەشىت اشىلدى

قوستاناي قالاسىنىڭ 9-شى شاعىن اۋدانىندا مەشىت اشىلدى. ونىڭ اشىلۋ سالتاناتىنا ەلىمىزدىڭ باس ءمۇفتيى ەرجان قاجى مالعاجى­ ۇلى باستاعان قازاقستان مۇسىلماندارى ءدىني باسقارماسى مەن قازاقستان قاجىلارى قاۋىمداستىعىنىڭ دەلەگاتسياسى كەلدى. ەرجان مالعاجى ۇلى قوستانايلىقتاردى جاڭا مەشىتتىڭ اشىلۋىمەن قۇتتىقتادى. وبلىس اكىمى نۇرالى سادۋاقاسوۆ جۇرتشىلىققا قۇتتى بولسىن ايتا وتىرىپ, يماندىلىق ءۇيىنىڭ كوبەيۋى وڭىردەگى حالىقتار بىرلىگىنىڭ, دوستىقتىڭ, جاقسى ءومىردىڭ دە كەپىلى ەكەنىن ايتتى. ول وبلىستىڭ بارلىق اۋداندارى مەن قالالارىنداعى, ەلدى مەكەندەرىندەگى مەشىتتەردىڭ ادامدارعا رۋحاني, ادامگەر­شىلىك تاربيە بەرەتىن يماندىلىق وشاعىنا اينالعانىن دا تىلگە تيەك ەتتى. مۇنان كەيىن ەل اقساقالدارى, زيالى قاۋىم وكىلدەرى يگى تىلەكتەر ءبىلدىردى. بۇل ءحىح عاسىردىڭ اياعىندا قوستاناي قالاسىندا اتاقتى اعايىندى مەتسەنات ياۋشەۆتار سالعان اق مەشىتتەن كەيىنگى ەكىنشى يماندىلىق ءۇيى بولىپ سانالادى. جاڭا مەشىتتى وبلىستاعى بەلگىلى كاسىپكەر تولەگەن جايلاۋباەۆ سالدى. مەشىتتىڭ قۇرىلىسى ول باسقاراتىن «كومپانيا «ەرلان» جاۋاپ­كەرشىلىگى شەكتەۋلى سەرىكتەستىگىنە 400 ميلليون تەڭگەگە ءتۇستى. تولەگەن عالىم­جان ۇلى مەشىتتىڭ سيمۆولدىق كىلتىن وبلىس­تاعى مارال يشان اتىنداعى مەشىتتىڭ يمامى اسىلبەك قاجى تۇسىپبەكوۆكە تابىس ەتتى. جاڭا مەشىتتىڭ يمامى شوقان قاجى ءامىرحانوۆ قوناقتاردى مەشىتتىڭ ءىشىن ارالاپ كورۋگە شاقىردى. مەشىتتىڭ اشىلۋ سالتاناتىنا وراي كاسىپكەر تولەگەن جايلاۋباەۆ تۇيە سويىپ, جينالعان جاماعاتقا اس بەردى. ءنازيرا جارىمبەتوۆا, «ەگەمەن قازاقستان». قوستاناي.