پاي-پاي!

اۆتوبۋسقا مىنسەڭ – اقىسىز Wi-Fi قوعامدىق كولىكتەردىڭ قىزمەتىن تۇتىناتىن تۇركىستان قالاسىنىڭ تۇرعىندارى بۇدان بىلاي تەگىن ينتەرنەتتى قولدانا الادى. Beeline كومپانياسى 3G Wi-Fi - روۋتەرلەردى – بۇكىل الەمدىك جەلىگە قوسىلۋ قۇرىلعىلارىن قالالىق اۆتوبۋستارعا ورناتا باس­تادى. ياعني, اۆتوبۋسقا مىنگەن تۇركىستاندىقتاردىڭ ۇشقىر ينتەرنەتكە كىرىپ, قاجەتتى مالىمەتىنە قول جەتكىزۋگە مۇمكىندىگى بار. بۇگىنگى كۇنى ارنايى قۇرىلعىمەن جابدىقتالعان بىرنەشە قوعامدىق كولىك قالادا ءجۇر. مامانداردىڭ ايتۋىنشا, الداعى ۋاقىتتا ولاردىڭ سانى دا ارتپاق. ينتەرنەتكە قوسىلۋ ءۇشىن Wi-Fi قولدانۋ مۇمكىندىگى بار  سمارتفون, پلانشەت نەمەسە نوۋتبۋك قاجەت. قالا تۇرعىندارى مۇنداي ەرەكشە اۆتوبۋستاردى سىرتىنداعى اسەم جارنامالارى ارقىلى بىلسە, ىشىنە كىرگەن سوڭ توبەگە ىلىنگەن ارنايى كودتى تەرىپ, قىزمەتتى تۇتىنا الادى. – قانداي بايلانىس وپەراتورىنا قوسىلعانىنا قاراماستان بارلىق جۇرگىنشىلەر ينتەرنەتكە تەگىن قوسىلا الادى. Beeline قازاقستان كولىكتەگى ۋاقىتتى ءتيىمدى وتكىزۋگە, جاڭالىقتاردى قاراپ, پوش­تانى تەكسەرۋگە, اۋا رايىن ءبىلىپ, الەۋ­مەتتىك جەلىلەردە سويلەسۋگە جانە سۇيىكتى كىتابىڭىزدى وقۋعا شا­قىرادى. تۇركىستان قالاسىنىڭ تۇر­عىندارى ءبىزدىڭ باستامامىز­دى باعالايدى جانە Beeline ين­تەرنەتى جۇرگىنشىلەر اراسىندا جوعارى سۇرانىسقا يە بولادى دەپ ۇمىتتەنەمىز, – دەيدى Beeline قازاقستان كومپانياسىنىڭ شىم­كەنت بولىمشەسىنىڭ ديرەكتورى اسقاربەك قازبەكوۆ. ءباسپاسوز ءماسليحاتى بارىسىندا قالا اكىمىنىڭ ورىنباسارى داۋرەن تاڭىربەرگەنوۆتىڭ ينتەرنەت جەلىسى بۇدان بىلاي تەك اۆتوبۋس­تاردا عانا ەمەس, حالىق كوپ جينالاتىن ايالدامالارعا, ساياباقتارعا دا ورناتىلسا دەگەن ۇسىنىسى كوپشىلىك تاراپىنان قولداۋ تاپتى. سالا ماماندارى جۋرناليستەر مەن بلوگەرلەردىڭ سۇراقتارىنا كەڭ كولەمدى جاۋاپ بەردى. سودان سوڭ,  Wi-Fi قۇرىلعىسى ورناتىلعان اۆتوبۋسپەن قالانى ارالاپ, عالامتورعا ەنىپ, جوبامەن تانىستى. «Wi-Fi  Bus» رەسپۋبليكالىق جوباسى باستاپقىدا «سىناقتىق رەجىم» رەتىندە پەتروپاۆل قالا­سىن­دا جۇزەگە اسقان. كەيىننەن جوباعا كوكشەتاۋ جانە تۇركىستان قالالارى ەنىپتى. الداعى ۋاقىتتا باستاما شىمكەنت, قاراعاندى, ورال, قوستاناي, اتىراۋ جانە ەلىمىزدىڭ باسقا دا قالالارىندا ىسكە اسپاق. قايرات زاينيشەۆ. تۇركىستان.