مەركى بولماي تۇر جەردىڭ كوركى

شىنىندا, جامبىلدىقتار: «مەركى – جەردىڭ كوركى» دەگەن ءسوزدى ماقتانىش­پەن ايتادى. بۇل ءسوز, ارينە, اق باس الاتاۋمەن ارالاسىپ جاتقان مەركى جەرىنىڭ كەرەمەت كوركى مەن اسەم تابيعاتىنا بايلانىس­تى ايتىلعانى انىق. ەتەگىندە جاتقان ەلدىڭ دە ءسانى بولەك. مەركى اۋدانى اۋىلدارىنىڭ قالىڭ تال-تەرەگى, تازا اۋا, سالقىن سامالى, تاۋدان ارقىراپ اققان سۋى تىنىسىڭدى اشادى, كوڭىلىڭدى كوتەرەدى. باسقا جاققا بارا قالسا «ءبىزدىڭ ەلدە وسىنداي كورىكتى, كەرەمەت جەر بار», دەپ جامبىلدىقتار دا اۋزىن تولتىرىپ ايتۋدان ەش جالىققان ەمەس. ال, مەركى شيپاجايىنىڭ داڭقى, اتاعى بۇگىندە شارتاراپقا بەلگىلى. ايتسە دە, ادەمى دۇنيەگە دە تازالىق پەن ۇقىپتىلىق كەرەك. سوندا عانا كوزى اشىلادى. ۇستىڭدەگى قىمبات كوستيۋم-شالبارىڭنىڭ جىلتىراعانىنان نە پايدا, ەگەر ول كىر, لاس, بىلعانىش بولسا... اللا تاعالامنىڭ ادام بالاسىنا بەرگەن وسىناۋ كەرەمەت سىيىن مەركىلىكتەر مەنسىنبەي جۇرگەن سياقتى. كوكتەمنىڭ كوزى جىلت ەتكەلى بەرى بۇكىل ەل جاپپاي سەنبىلىككە شىعىپ, توڭىرەگىن تازالاپ جاتىر. كورشى قورداي اۋدانىندا وسى ۋاقىت ىشىندە 28 مىڭ ادام قولىنا تىرما, سىپىرعى ۇستاپ, تازالىققا اتسالىسىپتى. ال, مەركى اۋدانىندا اۋلا تازالاۋعا نەبارى 1,5 مىڭ ادام شىعىپتى. جامبىل وبلىستىق ەنەرگەتيكا جانە كوممۋنالدىق شارۋاشىلىق باسقارماسىنىڭ باسشىسى مۇحتار تولەۋليەۆتىڭ ايتۋىنا قاراعاندا, بۇگىندە وڭىردە 500 كونتەينەرلىك الاڭ جانە 2 808 جاشىك بار. بىراق, مەركى جانە مويىنقۇم اۋداندارى بويىنشا كونتەينەرلىك الاڭدار مەن جاشىكتەر قاراستىرىلماعان. مەركى اۋدانىنىڭ اكىمى باقتيار كوپبوسىنوۆ بۇل ماسەلە­گە ەندى قارجى قاراستىرىلعانىن, كون­تەي­نەرلەردى ءالى الىپ ۇلگەرمەگەنىن ايتىپ اقتالدى. سوندا وسىنشاما قالىڭ ەل وسى ۋاقىتقا دەيىن قوقىستارىن قايدا تاستاعان, قارجى نەگە ەندى قاراستىرىلىپ وتىر؟ وسى ۋاقىتقا دەيىن ارنايى جاشىك بولماعان سوڭ ەل جان-جاعىنىڭ ءبارىن قوقىسحانا ەتىپ تاستاعانى انىق قوي. ەڭ قىزىعى, باقتيار كوپبوسىنوۆ كوگال­داندىرۋعا ناقتى قانشا قارجى ءبو­لىنگەنىن جاقسى بىلمەيتىن بولىپ شىقتى. اۋىل-ايماقتىڭ تازالىعىنا بايلانىس­تى وتكەن ۇلكەن جيىندا جامبىل وب­­ل­ىسىنىڭ اكىمى كارىم كوكىرەك­باەۆ مەركىنىڭ اكىمىنەن كوگالداندىرۋ ءما­سە­لە­سىنە قانشا قارجى بولىنگەنىن سۇرا­عان­دا, ول «8 ملن. 200 مىڭ تەڭگە» دەپ جاۋاپ بەردى. ال, شىن مانىندە 28,8 ملن. تەڭگە بولىنگەن ەكەن. ونىڭ وسى ۋاقىتقا دەيىن 2,5 ملن. تەڭگەسى عانا يگەرىلىپتى. سوعان قاراعاندا, «اتا داڭقىمەن ءسوز وتەر, ماتا داڭقىمەن ءبوز وتەر» دەگەن, اۋ­دان اكىمى مەركىنىڭ كوركىن پۇلداپ, كۇل-قوقىس, قالدىق اسەم تابيعاتتىڭ, كوك-جاسىل دۇنيەنىڭ اراسىندا كورىنبەي قالا­دى دەپ ارقانى كەڭگە سالىپ جۇرگەن سياقتى. ورالحان ءداۋىت, «ەگەمەن قازاقستان». جامبىل وبلىسى.