پالاتانىڭ كۇن ءتارتىبى قارالدى

كەشە قابيبوللا جاقىپوۆتىڭ توراعالىعىمەن ءماجىلىس بيۋروسى ءوتتى. وندا پالاتانىڭ الداعى جالپى وتىرىسىندا قارالاتىن كۇن ءتارتىبىنىڭ جوباسى ناقتىلاندى, دەپ حابارلادى ءماجىلىستىڭ ءباسپاسوز قىزمەتى. دەپۋتاتتاردىڭ تالقىلاۋىنا ەكىنشى وقىلىمعا ەكسترەميزمگە جانە تەرروريزمگە قارسى ءىس-قيمىل ماسەلەلەرىنە قاتىستى زاڭنامالىق تۇزەتۋلەر جانە ەلەكتر ەنەرگەتيكاسى وبەكتىلەرىنىڭ جۇمىسىن باقى­لاۋدى جانە قاداعالاۋدى ۇيىم­داستىرۋ ماسەلەلەرى تۋرالى زاڭ جوبالارى شىعارىلاتىن بولدى. كۇن تارتىبىنە راتيفيكاتسيالاناتىن ەكى زاڭ جوباسى: سينگاپۋرمەن ۇكىمەتارالىق تابىسقا سالىناتىن سالىقتارعا قاتىستى قوسارلانعان سالىق سالۋدى بولدىرماۋ جانە سالىق سالۋدان جالتارۋعا جول بەرمەۋ تۋرالى كەلىسىم مەن حالىقارالىق قايتا قۇرۋ جانە دامۋ بانكى اراسىنداعى قارىز تۋرالى كەلىسىم قوسىلدى. سونىمەن قاتار, وسى جالپى وتىرىستا ءماجىلىس دەپۋتاتتارى «قىلمىستىق ارەكەتتەن تۇسكەن تابىستاردى جىلىستاتۋ, انىقتاۋ, الىپ قويۋ جانە تاركىلەۋ تۋرالى كونۆەنتسيانى راتيفيكاتسيالاۋ تۋرالى» زاڭ جوباسىنا تۇزەتۋ ەنگىزۋدى قاراستىرادى. پالاتاعا «ەسىرتكى, پسيحو­تروپتىق زاتتار مەن ولاردىڭ پرەكۋرسورلارىن كەدەن وداعىنىڭ كەدەن اۋماعى ارقىلى وتكىزۋ ءتارتىبى تۋرالى كەلىسىمدى راتيفيكاتسيالاۋ تۋرالى» زاڭ جوباسىن قاراستىرۋ ۇسىنىلادى.