ايماقتار • 24 قاراشا، 2022

«قازفوسفاتتاعى» داۋ: جۇمىسشىلار نەگە دۇرلىكتى؟

364 رەت كورسەتىلدى

جامبىلدىڭ عانا ەمەس، ەلىمىزدەگى حيميا ونەركاسىبىنىڭ لوكوموتيۆى سانالاتىن «قازفوسفات» جشس-نىڭ سوڭعى كەزدەرى باسى داۋدان ارىلماي قويدى. ءبىراز ۋاقىت بۇ­رىن مىڭداعان قىزمەتكەرى بار كاسىپورىننىڭ سارىسۋ اۋدانىن­داعى بولىمشەسىندە وقىس وقيعا تىركەلگەن ەدى. «قاراتاۋ» كەن ءوندى­رۋ كومبيناتىنداعى فوسفور ۇنتاق­تايتىن قۇرىلعى ىشىندە جوندەۋ جۇمىستارى جۇرگىزىلىپ جاتقان شاقتا ديىرمەن وزدىگىنەن ىسكە قوسى­لىپ، ەكى ادام باقيلىق بولدى.

ماسەلە مۇنىمەن بىتكەن جوق. كەيىن­نەن تارازداعى كۇكىرت قىشقىلى تسەحى وندى­رى­سىندەگى كەلەڭسىز جاعدايدان كەيىن كونە شا­ھار توبەسىن كوك ءتۇتىن باسىپ قال­دى. كۇماندى تۇماننىڭ قارقىنىنان قاي­مىققان جۇرت بايبالامعا سالدى. ابىگەرگە تۇسكەن ەل داقپىرت اڭگىمەمەن الەۋمەتتىك جەلىنى شۋلاتتى. ەندى مىنە، ەڭبەك داۋى سيپاتىنداعى جاڭا ءبىر جان­جالدىڭ وتى تۇتاندى. قىسقاسى، جەتى مىڭ­عا جەتەعابىل ادامدى جۇمىسپەن قام­تىپ وتىرعان مەكەمە باسشىلارى جاق­سى­لاپ ويلانباسا، داۋعا قالعانى قالعان.

جۇزدەگەن قىزمەتكەر نەگە دۇرلىگىپ كوشە­گە شىقتى؟ وسى ماسەلە كىمدى دە بولسا ويلاندىرماي قويماسى انىق. البەتتە، اۋەلگى سەبەپ سەرىكتەستىكتىڭ تسيفرلىق ترانسفورماتسيا باسقارماسىنىڭ باسشىسى ولەگ كۋليكوۆتىڭ قىزمەتكەرلەرگە دورەكى سويلەگەنىمەن ساباقتاستىرىلىپ وتىر. دەسە دە بۇل جەردە ءبىرىنشى كەزەكتە ەڭبەك داۋى ماسەلەسى كورىنىس بەرەدى. ءيا، و.كۋليكوۆ راسىندا دا ارتىق قىلام دەپ تىرتىق قىلعان سەكىلدى. نارازى توپتىڭ الدىنا كەلگەن ول ەكس-ارىپتەستەرىنەن كەشىرىم سۇرادى. ەكس دەۋىمىزدىڭ دە وزىن­دىك سىرى بار. قىزمەتكەرلەرگە دورە­كى سويلەدى دەگەن باسقارما باسشىسى سول مەزەتتە جۇمىسىمەن قوش ايتىستى. بۇرىنعى ۇجىمىنىڭ الدىندا ەكى قولىن وكپەسىنە قويىپ تۇرىپ كەشىرىم سۇرادى.

جالپى، سەرىكتەستىك قىزمەتكەرلەرى وتكىر ماسەلەلەردى بۇعان دەيىن دە ءجيى اي­تىپ جۇرەتىن. اشۋعا بۋلىققان جۇ­رت الەۋمەتتىك تەڭسىزدىكتەن ابدەن زارە­زاپ بولعان سەكىلدى. وسىلايشا، ماسە­لە ۋشىقتى، ەڭبەك داۋىنا اينالىپ كەتتى. اۋەلدە ءار جەردەن ءۇن قاتقان قىز­مەت­كەرلەر سوڭىنان بىرنەشە پۋنكتتەن تۇراتىن تالاپتارىن العا تارتتى.

ولار ءبىرىنشى كەزەكتە ىشكى ءىس-قاعاز­داردىڭ مەملەكەتتىك تىلدە جۇرگىزىل­گەنىن قالايدى. ەمدەلۋگە بەرىلەتىن تولەم­اقىنى قالپىنا كەلتىرۋ، كاسىبي كيىممەن قامتاماسىز ەتۋ، 15 شاعىن اۋداننان جانە قالا ىرگەسىندەگى ەلدى مەكەندەردەن جۇمىسشىلاردى ساپالى قوعامدىق كولىكپەن جەتكىزۋ، قىزمەتكەرلەردىڭ سانىن ارتتىرۋ، ەكىنشى اگلوماشيناعا قارا­جات ءبولۋ سەكىلدى 13 پۋنكتتەن تۇراتىن تا­­لاپ­­تاردى ارنايى قۇرىلعان جۇمىسشى توپ نازارعا الماق. تاراز قالاسىنىڭ اكى­­­مى باقىتجان ورىنبەكوۆتىڭ ءوزى وتكىر ماسە­لەنىڭ بايىپپەن شەشىلۋىن قادا­عالايدى.

راس، اۋەلدە جۇرت ۇلتارالىق سيپات بە­رۋ­گە تىرىسقان جانجالدىڭ نەگىزى ەڭ­­بەك داۋى، الەۋمەتتىك تەڭسىزدىكپەن كۇ­رەس­­تە جاتقانى ايقىن اڭعارىلىپ تۇر. الەۋمەتتىك جەلىدە تاراپ كەتكەن قىز­مەت­كەرلەردىڭ تالاپتارى وسىعان انىق كوز جەتكىزۋگە مۇمكىندىك بەردى. نارازىلىققا شىققانداردىڭ ىشىندە ايگىلى سەرىكتەستىك مەملەكەت مەنشىگىنە قايتارىلسىن دەگەن تالاپتى قويعاندار دا بولدى. بۇل ەندى قانشالىقتى قيسىنعا كەلەتىنىن جاۋاپتى ورگاندار انىقتاي جاتار.

ءبىر بەلگىلىسى، قىزمەتكەرلەردىڭ تالابى جەرگىلىكتى اتقارۋشى بيلىكتىڭ نازارىنان تىس قالماق ەمەس. مۇنى رەسمي جاۋاپتان دا انىق بايقاپ وتىرمىز.

«بيىلعى جىلدىڭ 23 قاراشاسى كۇنى ساعات 11:40 شاماسىندا «قازفوسفات» جف قىزمەتكەرلەرى اراسىندا تۇسىنبەۋشىلىك تۋىندادى. «قازفوسفات» جشس-ىنا قاراستى تسيفرلىق ترانسفورماتسيا باس­قارماسىنىڭ باسشىسى ارىپتەستەرىنە دورەكى سويلەگەن. سونىڭ سالدارىنان تۇسىنبەۋشىلىك ورىن العان. وبلىس اكىمىنىڭ ءبىرىنشى ورىنباسارى نۇرجان كالەندەروۆ، وبلىس اكىمىنىڭ ورىنباسارى قاناتبەك مادىبەك، وبلىس پروكۋرورىنىڭ ورىنباسارى نۇربەك ۇلاسبەك ۇلى قىز­مەتكەرلەرمەن كەزدەسىپ، ءتۇسىندىرۋ جۇ­مىس­تارىن جۇرگىزدى. «قازفوسفات» جشس-ىنا قاراستى تسيفرلىق ترانسفورماتسيا باسقارماسىنىڭ باسشىسى ارىپتەستەرىنەن كەشىرىم سۇرادى. ول جۇ­مىس­تان شىعارىلدى. جينالعان قىزمەت­كەرلەردىڭ سانى 200-ءدى قۇرادى.

وسى وعيعاعا قاتىستى زاۋىت ىشىنەن ەرىكتى 20 ادامنان قۇرالعان جۇمىسشى توپ قۇرىلدى. توپ قۇرامىنا ءار تسەحتىڭ باسشىسى جانە كاسىپوداق وكىلدەرى ەنىپ، وزەكتى ماسەلەلەر بويىنشا جۇمىستار جۇرگىزۋدە. قازىرگى تاڭدا كاسىپورىنداعى احۋال تۇراقتاندى. جاعداي وبلىس اكىمى­نىڭ تىكەلەي باقىلاۋىندا»، دەلىنگەن رەسمي جاۋاپ ماتىنىندە.

البەتتە، ءبىر قىزمەتكەردىڭ اڭداماي سويلەۋىنەن باستالعان ەڭبەك داۋى قىسقا مەرزىمدە شەشىمىن تابۋى كەرەك. ولاي بولماعان جاعدايدا ماسەلە تاعى دا ۋشىعا ءتۇسۋى ىقتيمال. ءبىر بەلگىلىسى، 28 قاراشا كۇنى جوعارىدا كوتەرىلگەن ماسەلەلەردىڭ وڭىنان شەشىلۋىنە باسا نازار اۋدارىلاتىن جيىن وتپەك. جۇمىسشى توپتىڭ جۇرگىزگەن جۇمىسىنىڭ ساپاسى سول كەزدە ناقتىلانباق. بۇل ماسەلە ءبىزدىڭ دە نازارىمىزدا بولادى.

 

تاراز

سوڭعى جاڭالىقتار

پرەزيدەنت جامبىل وبلىسىنا باردى

قازاقستان • بۇگىن، 11:43

جەر داۋى زاڭمەن شەشىلەدى

ايماقتار • بۇگىن، 08:55

نامىس قۇربانى

تاريح • بۇگىن، 08:50

تۇركى تىلدەرىن تانيتىن تەحنولوگيا

تەحنولوگيا • بۇگىن، 08:35

پاريجدە كىمدەر بەلدەسەدى؟

سپورت • بۇگىن، 08:30

ۇقساس جاڭالىقتار