ەلوردادا بولىپ جاتقان VII استانا ەكونوميكالىق فورۋمى اياسىنداعى جەكە ءبىر سەسسيا «ەۋرازيالىق كولىك جۇيەسى جاھاندىق باسەكەلەستىك جاعدايىندا» دەگەن تاقىرىپپەن ءوتتى. مىنە, وسى ءبىر فاكتىنىڭ ءوزى عانا قازاقستاننىڭ ەكونوميكالىق ءساتتى دامۋى ءۇشىن كولىك تاسىمالى مەن لوگيستيكاسىنىڭ ەرەكشە ماڭىزعا يە بولىپ وتىرعاندىعىن كورسەتسە كەرەك. نەگىزگى الەمدىك رىنوكتاردىڭ ورتاسىندا ورنالاسقان ءبىزدىڭ ەلىمىز ءوزىنىڭ كولىك دالىزدەرىنىڭ وتكىزۋ قابىلەتىن ارتتىرۋ, تەمىرجول مەن اقتاۋ پورتىنىڭ قۋاتىن كۇشەيتۋ ۇستىندە. ەۋروپا مەن ازيا باعىتىندا جۇك جەتكىزۋدىڭ جىلدامدىعىن بارعان سايىن ارتتىرۋعا باعىتتالعان شارالاردى قابىلداۋدا. مىنە, وسى رەتتە قازاقستاندىق لوگيستيكانى ۇيلەستىرۋدىڭ باستى ءرولى «قازاقستان تەمىر جولى» كومپانياسى مەن «KAZLOGISTICS» كولىكشىلەر وداعىنىڭ ۇلەسىنە ءتيىپ وتىرعاندىعىن اتاپ كورسەتسەك ارتىق ەمەس.
سونىمەن, الەمنىڭ 150 ەلىنەن 10 مىڭنان استام ساراپشى قاتىسىپ وتىرعان اسا ماڭىزدى فورۋم بارىسىندا «قازاقستان تەمىر جولى» ۇك» اق پەن كولىكشىلەر وداعى قازاقستان ارقىلى وتەتىن ترانزيتتىك تاسىمالدىڭ قازىرگى زاماندىق مۇمكىندىكتەرىن ايگىلەدى. وسى ماقساتقا ارنالعان «ەۋرازيالىق كولىكتىك جۇيەسى جاھاندىق باسەكەلەستىك جاعدايىندا» اتتى سەسسيادا قازاقستان كولىك ءدالىزىنىڭ عاجايىپ ەرەكشەلىكتەرى جۇيەلى تۇردە باياندالدى جانە كورسەتىلدى. بۇل جولدىڭ ۋاقىتتان ۇتۋ جاعىنان العاندا ءداستۇرلى تەڭىز جولىنان ءۇش ەسە قىسقالىعىنىڭ ءوزى كوپ جايدان سىر اڭعارتاتىن بولسا كەرەك.
«الەمدىك ەكونوميكاداعى قازىرگى اعىمداردى ەسكەرە وتىرىپ, ءبىزدىڭ مەملەكەت باسشىسىنىڭ تاپسىرماسى بويىنشا «قازاقستان – جاڭا جىبەك جولى» باعدارلاماسى جۇزەگە اسىرىلۋدا. بۇل باعدارلاما ترانزيتتىك الەۋەتتى جۇزەگە اسىرۋدىڭ, لوگيستيكالىق قىزمەتتى كۇشەيتۋدىڭ, ۇلتتىق كولىكتىك-لوگيستيكالىق ينفراقۇرىلىمداردى قالىپتاستىرۋدىڭ جانە ولاردى جاھاندىق تۇرعىدان ينتەگراتسيالاۋدىڭ باسىم باعىتتارىن ايقىندايدى, – دەگەن «كتج» ۇك» اق پرەزيدەنتى اسقار مامين قازاقستانداعى لوگيستيكالىق مۇمكىندىكتەردى ارتتىرۋ ءىسىنىڭ ەلدى الەمدەگى ەڭ دامىعان 30 ەلدىڭ قاتارىنا 2050 جىلعا تامان قوسۋ ماقساتىنا قول جەتكىزۋ ءۇشىن تۇعىرلىق العىشارتتاردىڭ ءبىرى بولىپ تابىلاتىندىعىن اتاپ كورسەتتى.
قازاقستان قازىرگى كۇنى وسى العا قويىلعان ماقساتقا ءسايكەس بىرقاتار كەڭ كولەمدى ينفراقۇرىلىمدىق جوبالاردى جۇزەگە اسىرۋ ۇستىندە. بۇل جوبالار كولىكتىك باسەكەلەستىك ورتاداعى ەلدىڭ تۇراقتىلىعىن ارتتىرا تۇسپەك.
2012 جىلى قىتايمەن اراداعى التىنكول – قورعاس ەكىنشى شەكارالىق وتپە جولىنىڭ قۇرىلىسى اياقتالىپ, اشىلدى. وسىنىڭ ناتيجەسىندە قحر-مەن تۇيىسەتىن تەمىرجولدىڭ وتكىزۋ قابىلەتتىلىگى بىردەن 50 ميلليون توننا جۇككە دەيىن جەتكىزىلەدى.
ال وتكەن جىلى تۇركىمەنستان, يران تەلىمىندەگى وزەن – گورگان جەلىسى قۇرىلىسىنىڭ اياقتالۋى ناتيجەسىندە قىتاي مەن ەۋروپادان پارسى شىعاناعى ەلدەرىنە قوسىمشا ترانزيتتىك جۇكتەر تارتۋ ەسەبىنەن سولتۇستىك-وڭتۇستىك ءدالىزىنىڭ الەۋەتى ارتتى. بۇل باعىتتاعى كۇتىلەتىن كولەم 2020 جىلى 15 ميلليون تونناعا جەتۋى ءتيىس.
بيىلعى جىلى 988 شاقىرىم قاشىقتىقتى قۇرايتىن «جەزقازعان – بەينەۋ» جاڭا تەمىرجولى پايدالانۋعا بەرىلمەك. تراسەكا ترانسكاسپي ءدالىزى باعىتىن اقتاۋ جانە باكۋ ارقىلى تۇركياعا جانە بالقانعا جالعايتىن بۇل جول احالكالاكي (گرۋزيا) – كارس (تۇركيا) جاڭا جەلىسىنە ينتەگراتسيالانىپ, بوسفور تۇبەگى ارقىلى مارماراي تۋننەلىنە وتەتىن بولادى. 2020 جىلعا تامان بۇل جاڭا جەلىدەگى تاسىمال كولەمى 17 ميلليون توننانى قۇراماق.
«Hewlett-Packard» جانە «DHL» سەكىلدى كومپانيالار وسىناۋ قۇرلىق جولى بويىنشا ءوز جۇكتەرىن تاسىمالداۋدىڭ پايداسىنا كوز جەتكىزە كەلە جۇكتەرىنىڭ ەلەۋلى بولىگىن قازاقستان باعىتىنا قاراي اۋىستىرىپ ۇلگەردى.
استانا ەكونوميكالىق فورۋمى اياسىنداعى وسى پانەلدىك سەسسياداعى كولىكشىلەردىڭ كەزدەسۋىنە قتج-نىڭ بارلىق جەتەكشى ارىپتەستەرى كەلدى. ولاردىڭ قاتارىندا «DP WORLD» كومپانيالار توبىنىڭ باس جەتەكشىسى موحاممەد شاراف, تمد ءوڭىرى بويىنشا اسسوتسياتسيالانعان ارىپتەس Lufthansa Consulting كومپانياسىنىڭ جەتەكشىسى توماس نيحاۋس, «KTZ Express» اق اتقارۋشى ديرەكتورى داررەل حەدەۆەي, The Boston Consulting Group باسقارۋشى ديرەكتورى اندرەي تيموفەەۆ, ەۋرازيالىق ەكونوميكالىق كوميسسيانىڭ كولىك جانە ينفراقۇرىلىمدار دەپارتامەنتىنىڭ باسشىسى ەرجان نۇراحمەتوۆ, رەسەي كولىكشىلەر وداعىنىڭ ۆيتسە-پرەزيدەنتى ەۆگەني كازانتسەۆ جانە باسقالار بولدى.
الەمنىڭ 75 ەلىندە كومپانياسى جۇمىس ىستەپ جاتقان «DP WORLD» كومپانيالار توبىنىڭ باس جەتەكشىسى موحاممەد شاراف پەن قتج ەۋرازيالىق ترانزيتتىك جەلىدە قازاقستاندى باسەكەگە قابىلەتتى ەتۋگە بىرگە كۇش سالىپ جاتقاندىقتارىن اتاپ كورسەتتى.
– قورعاستى ءبىز اقتاۋمەن بايلانىستىرامىز. ءسويتىپ, گرۋزيا مەن ەۋروپاعا شىعۋدى قامتاماسىز ەتەمىز, – دەپ سەندىردى ارىپتەستەردى م.شاراف.
100-دەن استام ادامدى قۇراعان سەسسيا قاتىسۋشىلارى قحر-داعى ليانيۋنگان تەڭىز پورتىنداعى قازاقستان-قىتاي لوگيستيكالىق تەرمينالى قۇرىلىسى جوباسىنىڭ ماڭىزىن ەرەكشە اتاپ كورسەتتى. ويتكەنى, بۇل جوبا شىعىس-باتىس باعىتىنداعى قۇرلىقتىق تاسىمالدى دامىتۋ ءۇشىن وتە قاجەت. قوناقتار سونىمەن قاتار, ەۋرازيالىق ەكونوميكالىق وداق اياسىنداعى ينتەگراتسيالىق ۇدەرىستەردىڭ ماڭىزدىلىعىنا دا توقتالدى.
– الەمدىك ەكونوميكانىڭ جاھاندانۋ جاعدايىندا ءبىزدىڭ كولىك جانە ينفراقۇرىلىمدار سالاسىنداعى ورتاق ينتەگراتسيالىق ۇدەرىستەرىمىز وداق بويىنشا ارىپتەس ەلدەردىڭ ەكونوميكالىق ءوسىمىنىڭ نەگىزگى ءمۇمكىندىكتەرىنىڭ بىرىنە اينالۋى ءتيىس, – دەپ اتاپ كورسەتتى ەۋرازيالىق ەكونوميكالىق كوميسسياسى كولىك جانە ينفراقۇرىلىمدار دەپارتامەنتىنىڭ باسشىسى ەرجان نۇراحمەتوۆ.
قازاقستانداعى كولىكتىك سەرۆيستىڭ دامۋ ەكپىنى ءارتۇرلى كولىك ءتۇرلەرىنىڭ قاتىسۋى ارقىلى تەرمينالدار مەن حابتاردىڭ پايدالانۋ باعىتىنداعى شوعىرلاندىرىلعان تاسىمالعا قاراي اۋىتقىپ كەلەدى. وسىعان وراي, قتج بازاسىندا بۇل قاجەتتى سەرۆيستى جۇزەگە اسىراتىن ءبىرتۇتاس لوگيستيكالىق ورتالىق قازىردىڭ وزىندە بەلسەندى جۇمىس ىستەۋ ۇستىندە.
سۇڭعات ءالىپباي,
«ەگەمەن قازاقستان».
