بوكسشىلاردىڭ ءداستۇرلى باسەكەسى

بۇگىن استانادا قازاقستان بوكس فەدەراتسياسىنىڭ كۋبوگى-2014 جارىسىنىڭ جەرەبە تارتۋ ءراسىمى وتەدى. وندا شيرەك فينالدىق جەكپە-جەكتەر وتەتىن قالالار انىقتالادى. سونداي-اق, ماتچتىق كەزدەسۋدىڭ قورىتىندىسى بويىنشا كوماندالار تەڭ ءتۇسىپ جاتقان جاعدايدا وتەتىن ايقاستىڭ قوسىمشا سالماق دارەجەسى بەلگىلى بولادى. جەرەبە تارتۋ راسىمىنە وبلىستىق جانە قالالىق بوكس فەدەراتسيالارىنىڭ وكىلدەرىمەن قوسا, باق وكىلدەرى جانە تورەشىلەر القاسى قاتىسادى. كەزدەسۋگە بوكس فەدەراتسياسى تاراپىنان مەملەكەتتىك جاتتىقتىرۋشى, ەلىمىزدىڭ بوكستان ۇلتتىق قۇراما كوماندالارىنىڭ ۇيلەستىرۋشىسى بولات ابدراحمانوۆ, بوكستان ايەلدەر قۇراماسى مەن سپورت جارىستارىن وتكىزۋ جونىندەگى ۇيلەستىرۋشى بەرىك مىرجىقباەۆ قاتىسسا, جەرەبە تارتۋ ءراسىمىن XXX جازعى وليم­پيا ويىندارىنىڭ چەمپيونى سەرىك ساپيەۆ, وليم­پيادانىڭ قولا جۇلدەگەرى مارينا ۆولنوۆا مەن «استانا» تەلەارناسىنىڭ سپورت شولۋشىسى سامات قاناعاتوۆ جۇرگىزىپ وتىرادى. بيىل قازاقستان بوكس فەدەراتسياسىنىڭ كۋبوگى بەسىنشى رەت وتكىزىلەدى. بۇل تۋرنير فەدەراتسيانىڭ ماڭىزدى جوبالارىنىڭ ءبىرى بولىپ سانالادى. قازىرگى كەزدە ول سپورتشىلار مەن جانكۇيەرلەر اراسىندا كەڭىنەن تانىلىپ ۇلگەردى. – قازاقستان بوكس فەدەراتسياسى كۋبوگى وڭىرلەردە بوكستى دامىتۋ جانە جاس دارىندى سپورتشىلاردى انىقتاۋ ماقساتىندا فەدەراتسياسى پرەزيدەنتى تيمۋر ق ۇلىباەۆتىڭ باستاماسىمەن بەكىتىلدى. بيىل ءتۋرنيردىڭ رەگلامەنتى ءبىرشاما وزگەرتىلدى. بىرىنشىدەن, قاتىسۋشى كوماندالار بۇرىنعىداي الدىن الا جەكپە-جەكتەردى ءتورت توپتا وتكىزەدى. ياعني, A, B, C, D بولىپ ءار توپتا 4 كوماندا قاتىسادى. الايدا, 16 كوماندانىڭ ءبارى جەرەبە بويىنشا ءوز توپتارىن انىقتامايدى. مۇندا رەيتينگ بويىنشا ءتورت مىقتى كوماندا ءوز توپتارىن بەلگىلەپ الادى. ياعني, وسىعان دەيىن وتكەن ءتورت ماۋسىمنىڭ ناتيجەسى بويىنشا ءتورت «سەبەت» قۇرالادى. ءار «سەبەتتەن» توپقا تەك ءبىر عانا كوماندا تۇسەدى. ەكىنشىدەن, 25 ميلليون تەڭگە كولەمىندە سىياقى تاعايىندالدى. ونى جەڭگەن كوماندا ۇتىپ الادى. جارىستىڭ جارتىلاي فينالى جانە فينالى 14-15 جەلتوقساندا استانا قالاسىندا وتەدى, – دەيدى ەلىمىزدىڭ بوكستان ۇلتتىق قۇراما كوماندالارىنىڭ ۇيلەستىرۋشىسى بولات ابدراحمانوۆ. قازاقستان بوكس فەدەراتسياسى كۋبوگى جارىسىنا وبلىستىق جانە قالالىق فەدەراتسيالاردىڭ نەگىزىندە قۇرالعان 16 كوماندا قاتىسادى. ءار كوماندادا 49, 52, 56, 60, 64, 69, 75, 81, 91 جانە 91 كيلودان استام سالماق دارەجەسى بويىنشا 20 بوكسشى بولادى. ماتچتىق كەزدەسۋدىڭ جەكپە-جەگىندە جەڭىسكە جەتكەن توپقا 1 ۇپاي ەسەپتەلەدى. جەڭىلگەن توپقا ۇپاي بەرىلمەيدى. ەستەرىڭىزدە بولسا, بۇعان دەيىن وتكەن قازاقستان بوكس فەدەراتسياسى كۋبوگى جولىنداعى تۋرنيردە استا­نا قالاسىنىڭ كومانداسى 2010 جانە 2013 جىلدارى جەڭىم­پاز بولسا, قاراعاندى وبلىسى 2011 جىلى, ماڭ­عىس­تاۋ وبلىسى 2012 جىلى جەڭىمپاز بولعان ەدى. داستان كەنجالين, «ەگەمەن قازاقستان».