ەلىمىزدە مەديتسينالىق كومەك ساپاسىن جاقسارتۋعا ءجىتى كوڭىل ءبولۋ باستى نازارعا الىنعان. وسى ورايدا دەنساۋلىق ساقتاۋ مينيسترلىگى قىرۋار جۇمىستى جۇزەگە اسىرۋ ۇستىندە. ءتىپتى, اككرەديتتەۋدىڭ ۇلتتىق ستاندارتتارى حالىقارالىق قاعيدالارعا ساي جاڭارتىلدى.
ال مەيىربيكەلىك مىندەتكە زور جاۋاپكەرشىلىك جۇكتەلەتىنى بارشاعا ءمالىم. اككرەديتتەۋدىڭ جاڭارتىلعان ستاندارتتارىندا اتالمىش ماماندىق مەديتسينالىق كومەك ساپاسىن جاقسارتۋ قۇرالى رەتىندە قاراستىرىلعان. مەيىربيكەلىك ءىس ارنايى ماشىقتى, ءبىلىمدى جانە ونى قولدانۋداعى ەپتىلىكتى قاجەت ەتەدى.
ناۋقاستاردى ەمدەۋدە مەدبيكەلەردىڭ ورنى ەرەكشە. ياعني, ول ەمدەلۋشىنىڭ جاي-كۇيىن دەر كەزىندە باعالاپ, جالپى جاعدايىن جاقسارتۋعا, اسقىنۋ قاۋىپتەرىن مەيلىنشە ازايتۋعا سەپتىگىن تيگىزەدى. سونداي-اق, ءتيىستى ۇلتتىق ستاندارتتىڭ تالاپتارىن ورىندايدى.
ستاندارتتىڭ باستى تالابى – پاتسيەنتتىڭ كۇتىمىنە, جاعدايىنىڭ جاقسارۋىنا نازار اۋدارۋ, اۋرۋدىڭ اسقىنباۋىن بولدىرماۋ. ەگەر دارىگەر پاتولوگيانى, اۋرۋدى زەرتتەسە, مەيىربيكە ناۋقاستىڭ ەمدەلۋ بارىسىنداعى جاي-كۇيىن باقىلايدى. سوندىقتان دا مەيىربيكەلىك كۇتىم ماماننىڭ كاسىبي دايىندىعىن, ونىڭ پاتسيەنتكە قامقورشى بولۋىن مىندەتتەيدى. بۇعان قوسا مەدبيكە ازاماتتىڭ باستى قاجەتتىلىگىن (ادەت, كاسىبى, ت.ب.), مىنەز-ق ۇلىق ەرەكشەلىگىن ەستەن شىعارماعانى ءجون. بۇل دەگەنىمىز جۇمىسىنان قاتەلىك جىبەرمەۋگە تالپىنۋ, مەديتسينالىق قىزمەت كورسەتۋ ۇردىسىندە اسقىنۋدى بولدىرماۋ. ول ءۇشىن جۇمىستىڭ بەلگىلى ءبىر ستاندارتى ەنگىزىلەدى. ەرەجە, نۇسقاما, الگوريتم, كلينيكالىق تاجىريبە بويىنشا نۇسقاۋلىقتى جاساۋدا بارلىق دەڭگەيدەگى مەديتسينالىق ۇيىم قىزمەتكەرلەرى قاتىسادى. ونىڭ ءبارى اككرەديتتەۋ ستاندارتىنا سايكەس دايىندالۋى ءتيىس. مەديتسينالىق ۇيىمدار جۇقپالى اۋرۋلاردىڭ الدىن الۋ شارالارىن جاساۋى ءتيىس. ورتا مەديتسينالىق قىزمەتكەر جۇقپالى اۋرۋلاردى باقىلاۋ باعدارلاماسىنىڭ جۇزەگە اسىرىلۋىنا دا جاۋاپتى. ستاندارتتاردى قولدانۋ مەيىربيكە جۇمىسىن جەڭىلدەتەدى, بۇيىمدار مەن ۋاقىتتىڭ بوسقا شىعىندالۋىن ازايتادى, ساباقتاستىقتى قامتاماسىز ەتەدى, پاتسيەنتتەرگە قىزمەت ەتۋ ساپاسىنىڭ جانە ەمدەۋ ناتيجەلەرىنىڭ كورسەتكىشتەرىن جاقسارتادى.
مەيىربيكەلەر مەديتسينالىق ۇيىمنىڭ قۇرىلىمدىق بولىمشەرىن ءدارى-دارمەكپەن قامتيدى. دەنساۋلىق ساقتاۋ سالاسىنداعى قىزمەت كورسەتۋدىڭ ساپاسى كوبىنەسە مەيىربيكەلەردىڭ جۇمىسىنا بايلانىستى باعالانادى. سەبەبى, ەمدەۋ بارىسىندا مەيىربيكەلەر ەمدەلۋشىلەرمەن تىعىز بايلانىستا بولادى. ءدال وسى دەڭگەيدە ەمدەلۋشىنىڭ مەديتسينالىق قىزمەت كورسەتۋ تۋرالى ويى قالىپتاسادى. پاتسيەنتپەن سەنىمدى قارىم-قاتىناس ورناتۋ, ەمدەلۋشىنىڭ پىكىرىن سىيلاۋ مەديتسينالىق كومەك كورسەتۋ ۇردىسىندە ماڭىزدى ءرول اتقارادى, ءارى ناۋقاس جايلى جەكە اقپاراتتىڭ قۇپيالىلىعى قامتاماسىز ەتىلۋى ءتيىس. دەمەك, اككرەديتتەۋ مەديتسينالىق ساپانى كوتەرۋدەگى باستى قۇرالداردىڭ ءبىرى. باتىس ەلدەرىنىڭ ءتاجىريبەسىندە مەيىربيكە ازاماتتاردى قابىلداپ, ناۋقاستى قايدا جىبەرەتىنىن انىقتايدى. دەنساۋلىق ساقتاۋ سالاسىندا مەيىربيكە بەدەلىن ۇنەمى كوتەرۋگە كوپ كوڭىل بولىنۋدە. بۇگىنگى تاڭدا قازاقستاندا 150 مىڭنان استام مەيىربيكە دەنساۋلىق كۇزەتىندە قاجىرلى ەڭبەك ەتۋدە. ورتا مەديتسينالىق قىزمەتكەرلەردى دايارلاۋمەن ەلىمىزدە 28 مەملەكەتتىك جانە 40 جەكەمەنشىك مەديتسينالىق كوللەدج اينالىسادى. ءبىر سوزبەن ايتقاندا, مەيىربيكە – مەرەيلى ماماندىق.
سالتانات جابىقوۆا,
دەنساۋلىق ساقتاۋدى دامىتۋ رەسپۋبليكالىق ورتالىعىنا قاراستى اككرەديتتەۋ ورتالىعىنىڭ جەتەكشى مامانى.
