قالا قولونەرشىلەرىنىڭ تۋىندىلارى جاھاندىق دەڭگەيدە مويىندالۋىنا وراي تارازدا «تاراز – قولونەرشىلەر قالاسى» اتتى حالىقارالىق كورمە ۇيىمداستىرىلدى. «كونە تاراز» ەتنومادەني كەشەنىندە وتكىزىلگەن حالىقارالىق كورمەدە ءارىسى نيدەرلاند, ءۇندىستان, تۇركيا, بەرىسى وزبەكستان, تاجىكستان, رەسەي, قىرعىز رەسپۋبليكاسىنان كەلگەن قولونەر شەبەرلەرى وزدەرىنىڭ ۇزدىك بۇيىمدارىن ۇسىنىپ, جەرگىلىكتى جۇرتشىلىقتىڭ قىزىعۋشىلىعىن تۋدىردى. ءىس-شاراعا كەلگەن تارازدىقتار الىس-شاقىن شەت مەملەكەتتەردەن كەلگەن مارتەبەلى مەيمانداردىڭ بۇيىمدارىن تاماشالاپ قانا قويماي, ساتىپ الىپ تا جاتتى. بۇل شىن ونەرگە كورسەتىلگەن قۇرمەت ەدى.
«تاراز 2000 جىلدان استام تاريحى بار بايىرعى شاھار ەكەنى بارشاعا ءمالىم. تاريحىنىڭ تامىرى مىڭجىلدىقتارمەن استاسقان كونە قالا بۇگىندە ۋاقىت اعىمىنا ساي توتىداي تۇرلەنىپ, وركەنيەت كوشىنە ىلەسىپ كەلەدى. ءبىز وزدەرىڭىزبەن وسىنداي مەرەيلى ساتتە قاۋىشقانىمىزعا بەك قۋانىشتىمىز. وبلىس ورتالىعىنىڭ دۇنيەجۇزىلىك قولونەرشىلەر قالاسى تىزىمىنە ەنۋى – ءبىز ءۇشىن زور مارتەبە. بارلىقتارىڭىزعا ابىروي, تابىس تىلەيمىن», دەدى ءوڭىر باسشىسى نۇرجان نۇرجىگىتوۆ ءىس-شاراعا كەلگەن مارتەبەلى مەيماندارمەن كەزدەسۋ بارىسىندا.
جاھاندىق دەڭگەيدە تانىلعان شەبەرلەردىڭ بۇيىمدارى مەن ساندىك ورامالدارى, باسقا دا تاماشا تۋىندىلارى كىمدى دە بولسىن قىزىقتىرماي قويماسى انىق. ايتالىق, قىزعالداقتار ەلى اتانىپ كەتكەن نيدەرلاندتان كەلگەن قولونەر شەبەرلەرى ۇسىنعان ەرلەر جانە ايەلدەر سومكەسى 130 مىڭ تەڭگەگە ساۋدالانسا, تۇركىستاندىق داۋرەن ءمىنشاريپوۆتىڭ جاساعان قوبىزىنىڭ قۇنى 450 مىڭ تەڭگە ەكەن. ال كورمەگە قويىلعان تاۋارلاردىڭ ەڭ قىمباتىنىڭ قۇنى 650 مىڭ تەڭگەگە دەيىن جەتەدى. البەتتە, مۇندا قويىلعان شاعىن بۇيىمداردىڭ بىرقاتارىنىڭ باعاسى قولجەتىمدى ەكەنىن دە ايتا كەتكەن ءجون.
ءساندى بۇيىمدارعا قىزىعا قاراعان كەيبىر ازاماتتار قىمبات زاتتاردى ويلانباي ساتىپ الىپ جاتتى. بۇل, بالكىم, قولونەر شەبەرلەرى ەڭبەگىنىڭ حالىق تاراپىنان باعالانعانى شىعار. كەرەك دەرەكتەرگە زەر سالساق, دۇنيەجۇزىلىك قولونەرشىلەر كەڭەسى 1964 جىلى بەلگيا ەلىندە رەسمي تۇردە تىركەلگەن كورىنەدى. 60 جىلعا جەتەعابىل ۋاقىتتا حالىقارالىق ۇيىم الەمنىڭ 59 قالاسىن قولونەرشىلەر شاھارى رەتىندە مويىنداسا, تاراز قالاسى بۇل تىزىمگە الپىسىنشى بولىپ ەنىپ وتىرعان جايى بار.
«تارازىمىزدى ەندى الەم بىلەتىن اۋليەاتا دەسەك تە بولادى. جاھاندىق كەڭەستىڭ كونە قالامىزدى تىزىمگە قوسۋى – ءبىز ءۇشىن زور ماقتانىش. كورشىلەس وزبەكستان ەلىنەن ءتورت, قىرعىز رەسپۋبليكاسىنان ءبىر قالا كەڭەس قۇرامىنا ەنسە, قازاقستان تاراپىنان كيە دارىپ, قۇت قونعان تارازدىڭ سول قاتارعا قوسىلعانى قۋانتادى», دەيدى كورمە تۋرالى پىكىرىمەن بولىسكەن وبلىس اكىمىنىڭ ورىنباسارى قاناتبەك مادىبەك.
ءىس-شاراعا ارنايى ات باسىن بۇرعان مادەنيەت جانە سپورت مينيسترلىگى تۋريزم جانە يندۋستريا كوميتەتىنىڭ توراعاسى داستان رىسپەكوۆ تارازدىڭ دۇنيەجۇزىلىك كەڭەس تاراپىنان مويىندالۋىن ەل ءۇشىن تولايىم تابىس دەپ ەسەپتەيدى. «كونە تارازدى دۇنيەجۇزىلىك قولونەر شەبەرلەرى قالاسى اتانۋىمەن قۇتتىقتايمىن. تۇسىنە بىلگەنگە بۇل تولايىم تابىس, زور جەتىستىك. ەندى تارازدىق قولونەر شەبەرلەرى حالىقارالىق دەڭگەيدەگى مايتالمان ماماندارمەن تاجىريبە الماسۋ مۇمكىندىگىنە يە بولادى. سول تۇرعىدان الىپ قاراعاندا بۇل ەلىمىز ءۇشىن دە زور ماقتانىش», دەيدى ول.
تاراز
