«اتالاردىڭ اتامانى» اتانعان ساۋل الۆارەسكە قارسى شارشى الاڭعا ءۇشىنشى رەت كوتەرىلەتىن گەننادي گولوۆكين مەكسيكالىق بوكسشىدان ايلاسىن اسىرا الادى ما؟ مىقتى بوكسشىلاردىڭ جاسى كەلگەن كەزدە نەمەسە بابى مەن باعى تايا باستاعان شاقتا رينگكە شىعۋدى ادەتكە اينالدىرعان ساۋل الۆارەس العاشقى ەكى جەكپە-جەكتە قازاق بوكسشىسىنان اۋىر سوققىلار الدى. سودان دا بولسا كەرەك, ءۇشىنشى كەزدەسۋدى جانكۇيەرلەر ءتورت جىل بويى تاعاتسىزدانا توستى. گولوۆكين جاپونيالىق ريوتا مۋراتانى مەرزىمىنەن بۇرىن جەڭگەنىمەن, اجەپتەۋىر سوققىلار وتكىزىپ العان ەدى. سودان دا بولسا كەرەك, الۆارەسىڭىز قازاق وعلانىن ۇرىپ قۇلاتاتىنىنا سەنىمدى.
العاشقى ەكى شايقاس تۋرالى ايتىلاتىن اڭىز اڭگىمە از ەمەس. ءبىرىءنشى كەزدەسۋدەن كەيىن «كانەلونىڭ» اناليزىنەن كلەنبۋتەرول تابىلدى. رۇقسات ەتىلمەگەن ءدارى-دارمەك اعزاسىنا كەزدەيسوق تۇسكەنىن, بارىنە ەت كىنالى ەكەنىن ايتىپ اقتالعان «ساۋىن سيىر» جازادان وڭاي قۇتىلدى. بوكس ۇيىمدارى ءۇشىن دە, باسقالار ءۇشىن دە الۆارەستى ۇزاق مەرزىمگە جازالاۋ ءتيىمسىز ەدى. سونىمەن, ءسال كەشىگىڭكىرەپ ەكىنشى جەكپە-جەك ءوتتى. تورەشىلەردىڭ باسىم داۋسىمەن مەكسيكالىق بوكسشى جەڭىسكە جەتتى. بىراق, بۇل ەكى كەزدەسۋدە گولوۆكين جەڭىلمەدى دەگەندى جانكۇيەرلەر ەمەس, كاسىپقوي ماماندار ايتىپ جاتتى. كەرەۋەتتەگى ساراپشىلاردىڭ ەمەس, ايگىلى باپكەر تەددي اتلاستىڭ ءوزى سولاي دەدى.
«قاشاننان بەرى دجەب سوققىسى ەسەپتەلمەيتىن بولعان. ەكى شايقاستا دا گەننادي گولوۆكين باسىم ءتۇستى», دەپ دۇرسە قويا بەردى ول. العاشقى كەزدەسۋدە شەگىنە ءجۇرىپ, رەتى كەلگەن كەزدە كونترپانچەر رەتىندە ينفايتتا سوققىلارىن جۇمساعان الۆارەستى راسىندا دا تەڭ ءتۇستى دەۋ قيسىنسىزداۋ كورىنەدى. ال ەكىنشى جەكپە-جەكتە اگرەسسيا قوسقانى راس. بىراق, تاعى دا باسىم ءتۇستى دەي المايسىز.
تريلوگياعا قاتىستى تالاي بوكسشىلاردىڭ پىكىرىن تىڭداپ ءجۇرمىز. كوپشىلىگى جاس ءارى جىلدام بولعاندىقتان ساۋل الۆارەستىڭ باسىم ءتۇسۋ مۇمكىندىگى مول دەگەندى العا تارتادى. ەكىنشى ءبىر بوكسشىلار سوققىسى مىعىم گولوۆكيننىڭ جەڭىسكە جەتۋى مۇمكىن ەكەنىن ايتادى. كەيبىر ماماندار گولوۆكيننىڭ اۋتفايتەر رەتىندە جۇدىرىقتاسقانىن ءجون كورەدى. ياعني, اراقاشىقتىقتى ساقتاي وتىرىپ, قارسىلاسىنىڭ دەگبىرىن قاشىرعانىن قالايدى. ال, بۋكمەكەرلىك كەڭسەلەر الۆارەستىڭ جەڭىسىنە سەنىمدى...
بىزدىڭشە, ءۇشىنشى جەكپە-جەكتە گولوۆكينگە بارىن سالۋعا تۋرا كەلەدى. بىرىنشىدەن, قازاق وعلانى ءوزىن ينفايتەر رەتىندە دە, اۋتفايتەر رەتىندە دە كورسەتۋى ءتيىس. جاقىن قاشىقتىقتى جويقىن سوققىلاردى دارىتىپ, الىس قاشىقتىققا وتكەنى ءلازىم سەكىلدى. ال سول قول ۇنەمى قيمىلدا بولۋى, ءوزى رينگتى اينالىپ ءجۇرىپ بوكستاسقانى ءجون. بىزدىڭشە بولعاندا مۇنداي پىكىردى ءبىز ەمەس, بىلعارى قولعاپ كيىپ جۇرگەن بوكسشىلار دا ايتىپ ءجۇر. بىراق, 40 جاستاعى بوكسشىنىڭ وعان ءتوزىمى جەتە مە دەگەندى تىلگە تيەك ەتەتىندەر از ەمەس. قارسىلاستى نوكاۋتقا تۇسىرەم دەۋ - بوس اۋرەشىلىك. ەكى بوكسشىدا 24 راۋند بولدى. ءبىر-ءبىرىن شىنداپ تەڭسەلتە المادى. سوندىقتان قورعانىستا ساۋاتتى بوكستاسقان ءجون. گولوۆكيننىڭ باپكەرى دجوناتان بەنكس قانداي ستراتەگيا قۇرىپ شىعاتىنى بەلگىسىز. ءبىر انىعى, گولوۆكين قاجەتسىز سوققىلاردى قابىلداماۋى كەرەك.
بۇل شايقاسقا قاتىستى بولجام ايتۋ قيىن. ەكەۋى ءبىر-بىرىنە ابدەن لايىق قارسىلاس. كىمنىڭ كومانداسىنىڭ ستراتەگياسى مىقتى بولادى, سول جەڭەدى. ال ءبىز گولوۆكين جيىرما بەسىنشى راۋندتان باستاپ جەكپە-جەك تىزگىنىن قولعا العانىن قالايمىز. توبەلەستى ىسىرىپ قويىپ, دميتري بيۆول سەكىلدى بوكستاسسا دەيمىز... قىسقاسى, گولوۆكينگە جەڭىس اۋاداي قاجەت. جەڭىسكە جەتىپ جاتسا, ءتورتىنشى كەزدەسۋ ءوتۋى دە ىقتيمال.
