م.لومونوسوۆ اتىنداعى قالالىق ورتالىق كىتاپحانانىڭ 28 مىڭ كىتاپ قورى بار, ونىڭ 8 200-ءى قازاق تىلىندەگى ادەبيەتتەر, سوڭعى جىلدارى بالالار ادەبيەتىمەن تولىعىپ كەلەدى. كىتاپحانانىڭ 1 600 تۇراقتى وقىرمانى ءۇشىن بارلىق جاعداي جاسالعان, اسىرەسە ەلەكتروندى وقۋلىقتار جۇيەسى جاقسى دامىعان. ءوڭىر باسشىسى وڭداسىن ورازالين الداعى جىلى اقتوبەدە زاماناۋي وبلىستىق كىتاپحانا قۇرىلىسى باستالاتىنىن جەتكىزدى.
د.اباەۆ «باتىس-2» شاعىن اۋدانىندا سالىنىپ جاتقان مۇمكىندىگى شەكتەۋلى جاندارعا ارنالعان دەنەشىنىقتىرۋ-ساۋىقتىرۋ كەشەنىنىڭ قۇرىلىس جۇمىستارىمەن تانىستى. قۇرىلىسى بىلتىر باستالعان كەشەن الداعى جىلى اياقتالماقشى. ودان كەيىن مينيستر Visit Aktobe اقپاراتتىق ورتالىعىنىڭ جۇمىسىمەن تانىسىپ, وڭىردەگى ءتۋريزمنىڭ دامۋ بارىسى جونىندە وبلىستىق كاسىپكەرلىك باسقارماسىنىڭ باسشىسى نۇرحان تىلەۋمۇراتوۆتىڭ ەسەبىن تىڭدادى. قازىرگى ۋاقىتتا بايعانين اۋدانىنداعى اقتولاعاي جانە اققۇم بورلى قىراتتارىنا تۋريستىك مارشرۋتتار ىسكە اسىرىلىپ جاتىر. تۋريستەر ەجەلگى تەڭىز ورنى بولعان جەردەن كوتەرىلگەن شاعىن كانون تۇرىندەگى بيىكتىكتەردى تاماشالايدى. تابيعاتى تاماشا جەر بولعانىمەن ەلسىزدە ورنالاسقان. سۋ جۇرگىزۋ, ەلەكتر جەلىلەرىن تارتۋ كەرەك. دەگەنمەن ينفراقۇرىلىم جۇرگىزۋگە بايلانىستى كەدەرگىلەر بار. د.اباەۆتى ايتەكە بي اۋدانىنداعى حان مولاسى مارشرۋتى دا قىزىقتىردى. بۇل تاريحي تۋريزمگە سۇرانىپ تۇرعان ورىن, تابيعاتى دا تاماشا – ولكەيىك وزەنىنىڭ قۇيىلىسى. توقەتەرى, اقتوبە وبلىسىندا ىشكى ءتۋريزمدى دامىتۋدا سەرۆيستىك قىزمەت ۇيىمداستىرۋ جاعى اقساپ جاتىر. قاراپايىم تىلمەن ايتقاندا, جول بويى تاماقتانۋ ورىندارى, دارەتحانا, سۋمەن جابدىقتاۋ جانە تۋريستەر قوناتىن جايلى ورىندار سالىنۋى كەرەك. وسىلايشا, توعىز جولدىڭ تورابىنداعى اقتوبە وبلىسىندا كاسىپكەرلىكتىڭ دامۋى ءۇشىن ەڭ الدىمەن جولداردى جوندەپ, جول بويى سەرۆيسىن رەتكە كەلتىرۋ قاجەت.
ءمينيستردىڭ جۇمىس ساپارى ودان ءارى قوبدا اۋدانىندا جالعاستى. التىن وردا زامانىنىڭ ەسكەرتكىشى اسان قايعىنىڭ بالاسى ابات باتىر جەرلەنگەن ەسكى كەسەنەنىڭ ورتاعاسىرلىق كۇيدىرىلگەن قىش كىرپىشتەرى ءتۇسىپ, كەسەنە توزىپ تۇرعاندا, «مادەني مۇرا» مەملەكەتتىك باعدارلاماسىمەن قايتا جوندەۋدەن ءوتتى. ابات-بايتاق ءاليا مولداعۇلوۆانىڭ تۋعان اۋىلى بۇلاقتان ونشا قاشىق ەمەس. ءاليا اپامىزدىڭ اۋىلىنا ايالداعان سوڭ مينيستر ء«اليا» پاتريوتتىق تاربيە بەرۋ ورتالىعىنىڭ ديرەكتورى باعداش توپەنوۆا رەسەيلىك ىزدەۋ وتريادتارى تاپقان قازاقستاندىق جاۋىنگەرلەردىڭ دەرەكتەرىمەن تانىستىردى.
مينيستر «الاقاي» قۋىرشاق تەاترىنىڭ عيماراتىندا مادەنيەت جانە سپورت سالاسىنىڭ قىزمەتكەرلەرىمەن, قوعامدىق ۇيىم وكىلدەرىمەن كەزدەستى. سپورت سالاسىنىڭ ارداگەرلەرى بۇقارالىق سپورتتى دامىتۋ, پاريج وليمپياداسىنا دايىندىق, جاتتىقتىقتىرۋشىلار مەكتەبىن قالىپتاستىرۋ ماسەلەسىن كوتەردى. سونىڭ ىشىندە سپورتتىق ۇيىرمەلەردى جان باسىنا قارجىلاندىرۋعا قاتاڭ باقىلاۋ قاجەتتىگى تۋرالى ايتىلدى. ويتكەنى كەيبىر جەكە كاسىپكەرلەر كەز كەلگەن جەردەن ورىن الىپ, بالالاردى جاتتىقتىرۋ ءۇشىن قارجى السا دا, جۇمىستىڭ ساپاسى جوق, جالعا العان عيمارات جاتتىقتىرۋ ءۇشىن ىڭعايلى ەمەس, زالدارى تار, جۋىنىپ-شەشىنەتىن بولمەسى, جاتتىقتىرۋشىلارى دا جوق. كوپتەگەن اتا-انا تاراپىنان جان باسىنا قارجىلاندىرۋ جوباسىنا قارسىلىق كوبەيگەن. كەزدەسۋگە قاتىسقاندار سپورت مەكتەپتەرىنىڭ بازاسىن نىعايتىپ, ماماندارمەن قامتاماسىز ەتۋدى جانە بالالاردى كاسىبي مەكتەپتەردە ەرتە باستان دايارلاۋدى جۇيەلى تۇردە قولعا الۋدى تاپسىردى. نەگىزگى باسىمدىق وليمپيادالىق سپورت تۇرلەرىنە بەرىلۋى كەرەك.
داۋرەن اباەۆ اقتوبەدە ءوتىپ جاتقان Baqytty bala – 2022 IV حالىقارالىق بالالار ۆوكال كونكۋرسىنىڭ قاتىسۋشىلارىمەن جۇزدەسىپ, جۇمىس ساپارىن اياقتادى.
اقتوبە وبلىسى
