ونەر • 15 تامىز، 2022

«كوشە اقىنى» ءفيلمى كورەيا كينوفەستيۆالىندە كورسەتىلەدى

41 رەت كورسەتىلدى

قازاقستاندىق رەجيسسەر سامعار راقىمنىڭ «كوشە اقىنى» ءفيلمى وڭتۇستىك كورەياداعى حالىقارالىق كينوفەستيۆالگە ۇسىنىلدى، دەپ حابارلايدى Egemen.kz «قازاقفيلمگە» سىلتەمە جاساپ.

«كوشە اقىنى» قىسقامەتراجدى ءفيلمى Music film's Landscape سەكتسياسىندا كورسەتىلمەك. بۇل ءبولىم زاماناۋي مۋزىكالىق فيلمدەردەن باستاپ، ءارتۇرلى مۋزىكالىق جانرلار مەن مۋزىكانتتارعا ارنالعان فيلمدەردى، سونىمەن قاتار مۋزىكا ارقىلى امبەباپ ءومىر مەن ءتۇرلى مادەنيەتتەردى كورسەتەتىن بارلىق كارتينالارمەن تانىستىرادى.

«كوشە اقىنى» ءفيلمىنىڭ جەلىسى ۇرپاقتار اراسىنداعى قاقتىعىس ماسەلەسىن قوزعايدى. وقيعا ايتىستا نان تاۋىپ جۇرگەن اكەسى تاڭجارىق پەن ونىڭ ۇلى تۇراننىڭ اراسىندا ءوربيدى. ماسەلەن، رەپكە قىزىعىپ، ءتۇرلى ريفمالار مەن رەچيتاتيۆتەردى قۇراستىراتىن ۇلىنىڭ ونەرىن اكەسى قابىلدامايدى. ءفيلمنىڭ اۆتورلارى كورەرمەنگە كەز كەلگەن تۇسىنىسپەۋشىلىكتى شەشىپ، ۋاقىتتىڭ جاڭا تەندەنتسيالارىنا بەيىمدەلۋگە بولاتىندىعىن، سونىمەن قاتار اتا-بابالار مۇرا ەتكەن قۇندىلىقتاردى ساقتاۋ كەرەكتىگىن كورسەتۋگە تىرىسقان.

وتكەن جىلى «كوشە اقىنى» اقش-تا وتكەن Meihodo International Youth visual Media Festival 4-ءشى حالىقارالىق كينوفەستيۆالىندە «مۋزىكالىق بەينە» ساناتىندا ماراپاتقا يە بولدى جانە Annapolis Film Festival كورەرمەندەر كوزايىمى جۇلدەسىن جەڭىپ الدى. سونداي-اق جىل سايىنعى 6-شى حالىقارالىق Baiqonyr International Short Film Festival قىسقامەتراجدى كينوفەستيۆالىندە كارتينا «ۇزدىك مونتاج» نوميناتسياسى بويىنشا ۇزدىك دەپ تانىلدى.

ايتا كەتەيىك، 18-ءشى حالىقارالىق مۋزىكا جانە كينوفەستيۆالى چەحچون قالاسىندا (وڭتۇستىك كورەيا) ءوتىپ جاتىر.

سوڭعى جاڭالىقتار

ۇقساس جاڭالىقتار