راسىندا دا, شالعايداعى ەلدى مەكەن بولسا مەيلى دەيسىڭ عوي. وبلىس ورتالىعىنداعى كوشە تۇرعىندارىنىڭ جىلدار بويى ەلەكتر قۋاتىنا قول جەتكىزە الماي وتىرعانى تاڭداندىرماي قويمايتىنى راس. بۇگىندە كونە شاھار جاڭاشا كەيىپكە ەنىپ كەلەدى. ەلىمىزدەگى ەڭ ۇلكەن شاعىن اۋدانداردىڭ ءبىرى ءدال وسى تاراز قالاسىندا بوي كوتەرىپ جاتىر. ءوڭىر بيلىگى الدىمەن الەۋمەتتىك ماسەلەلەر شەشىمىن تاباتىنىن ايتۋداي-اق ايتىپ ءجۇر. الايدا ايدالاداعى اۋىلدى بىلاي قويعاندا, قالاداعى ورتالىق كوشەلەردىڭ بىرىندە جارىقسىز قالعان جۇرتتىڭ بار ەكەنىن ەسكەرسەك, اۋىلداردىڭ ماسەلەسىنە ازىرگە الىستان زەر سالاتىن سياقتىمىز...
«ەلەكتر قۋاتىن تۇرلەندىرەتىن قوزعالتقىش ارقىلى كۇن كورىپ وتىرمىز. وسىمەن ۇيالى تەلەفوندى قۋاتتاندىرامىز, باسقا دا قاجەتتىلىكتەرىمىزگە پايدالانامىز. قاشانعى وسىلاي جالعاسا بەرمەك. وزەكتى ماسەلە وڭىنان شەشىمىن تاباتىن كەز كەلىپ جەتتى عوي», دەيدى كوشە تۇرعىندارى ماسەلەنىڭ وزەكتىلىگىن مەڭزەپ.
دەرەكتەرگە سۇيەنسەك, جەرگىلىكتى بيلىك حالىقتىڭ بايبالامىنا بايلام جاساۋ ءۇشىن وتكەن جىلى قازىنادان 223 ملن تەڭگە قاراجات بولگەن ەكەن. الايدا قاراپايىم حالىق اتقارىلعان جۇمىستىڭ ناقتى ناتيجەسىن كورمەگەن. قىسقاسى, بۇگىنگى تاڭدا جەرگىلىكتى جۇرتشىلىق ماڭايداعى ەلدى مەكەندەرگە توق سۇراپ, جالىنىپ ءجۇر. حالىق جاعدايدىڭ وسىلاي بولعانىنا قاپالى. قاشانعى بۇلاي جالعاسا بەرەتىنى بەلگىسىز. ويتكەنى ماسەلە جۋىق ارادا شەشىمىن تاباتىنعا ۇقسامايدى.
«جالىنعان سايىن جۇرت تا تاناۋىن كوككە كوتەرە بەرەدى ەمەس پە؟ كەيدە اسپانداعى باعانى ايتىپ, اسپانداپ جاتاتىنى بار. بىردە ايىنا 20-30 مىڭ تولەۋگە ءماجبۇر بولساق, ال جىلىتۋ ماۋسىمى باستالعان ۋاقىتتا شىعىنىمىز 60 مىڭعا جەتىپ جىعىلادى», دەيدى شاھارداعى سۇلەيمەنوۆ كوشەسىنىڭ تۇرعىنى جۇلدىزبەك تەمىرباەۆ جاعدايدى ءتۇسىندىرىپ.
كوشەگە ەلەكتر باعانى ورناتىلعانىمەن, ءتيىستى جۇمىستاردىڭ ءوز دەڭگەيىندە اتقارىلماۋىنا بايلانىستى سىم تارتىلماعان. سالدارىنان قاراپايىم تۇرعىندار ەلەكتر قۋاتىن تەك تۇسىندە كورۋگە ءماجبۇر بولىپ وتىر. جەرگىلىكتى بيلىك وسى ماسەلەگە نازار اۋدارمايىنشا, كوشە تۇرعىندارى تالاپ قويۋىن جالعاستىرا بەرمەك.
«بۇل ماسەلەنى وبلىس اكىمى ءبىلۋى كەرەك قوي. ولاي بولماعان جاعدايدا ءبىز ءبىر اپتا عانا كۇتەمىز. تالابىمىز ورىندالىپ, وڭ ناتيجە شىقپاسا, تالاس, سارىسۋ سەكىلدى قالاعا ءۇش اۋداننان كولىك قاتىنايتىن كۇرە جولدى جابۋعا ءماجبۇر بولامىز. بالكىم, سوندا عانا ءبىز كۇتكەن ناتيجە شىعاتىن شىعار. سونداي قادامعا بارماساق بولمايتىن سەكىلدى», دەيدى كوشە تۇرعىنى ءادىلحان وردابەكوۆ اشىنىپ.
جابىققان جۇرتتىڭ قامىققان كوڭىلى جاقىن كۇندەرى كوتەرىلە قويمايتىن سىڭايلى. شارشاعان شاھار تۇرعىندارىنىڭ مۇڭىن تىڭداۋعا كەلگەن تاراز قالاسى اكىمى ورىنباسارىنىڭ اڭگىمەسىنەن وسىنى تۇسىندىك. ونىڭ ايتۋىنشا, جاۋاپتى مەردىگەر كومپانيا جۇمىستى باستاۋىن باستاعانىمەن, ورتا جولدا تاستاعان كورىنەدى.
«ەلەكتر قۋاتىنا ارنالعان جوبانىڭ سمەتالىق قۇنى 223 ملن تەڭگەگە جەتەقابىل. جاۋاپتى كومپانيا 170 ملن تەڭگەنى يگەردى. الايدا اتقارىلعان جۇمىس سول قاراجاتقا ساي ورىندالماعان. ەندى سوتتىڭ شەشىمى بولمايىنشا, ءبىز ەشتەڭە ىستەي المايمىز. قىسقاسى, قولىمىز بايلانىپ تۇر», دەيدى تاراز قالاسى اكىمىنىڭ ورىنباسارى نۇربول قالدىباەۆ ماسەلەنىڭ مانىسىنە ءۇڭىلىپ.
شاھار باسشىسى ورىنباسارىنىڭ سوزىنەن بايقاعانىمىز, قازىرگى تاڭدا جاۋاپتى مەردىگەر كومپانيا وكىلدەرى ءىستى بولىپ جاتقان كورىنەدى. سوعان قاراعاندا كوشەنى جارىقتاندىرۋ جۇمىستارى تەرگەۋ امالدارى اياقتالعاننان كەيىن عانا جالعاسىن تابۋى ىقتيمال.
بايقاۋىمىزشا, امالى تاۋسىلعان تۇرعىنداردىڭ تالابى جاقىن ارادا ورىندالا قويمايتىن ءتارىزدى. الايدا اشۋعا بۋلىققان حالىق «شارۋامىز شەشىلمەي توقتامايمىز» دەپ وتىر. ارينە, جاۋاپتى مەردىگەر كومپانيانىڭ جاۋاپكەرشىلىكتەن جالتارا الماسى انىق. الايدا جەرگىلىكتى بيلىك اتقارىلماعان جۇمىسقا نەلىكتەن ارتىعىمەن اقشا اۋداردى ەكەن؟ وسىنى تۇسىنە الماي-اق قويدىق.
تاراز
