قازىر ءجۇرىپ جاتقان كوروناۆيرۋس ينفەكتسياسىنىڭ باستى بەلگىلەرى سۋىق تيگەن سياقتى تاماق جىبىرلاۋ, باس اۋىرۋ, تەرشەڭدىك پەن السىزدىك. ەگەر وسى بەلگىلەردىڭ بىرەۋى مازالاسا, ۋاقىت وزدىرۋدىڭ قاجەتى جوق. ال سەكۆەنيرلەۋ مالىمەتى بويىنشا, اينالىمداعى ەڭ باسىم شتامم – وميكرون جانە ونىڭ با5 سۋبۆاريانتى بولىپ وتىر. ونىڭ جۇعۋى تەز, جىلدام بولعانىمەن, اۋرۋدىڭ ءوزى جەڭىل وتەدى. اۋرۋ اعىمى ينتوكسيكاتسيا سيندرومىنىڭ جوعارىلاۋى تۇرعىسىنان وزگەرگەن, بىراق وكپە تاراپىنان بەلگىلەر از. ياعني ۆيرۋس جوعارعى تىنىس جولدارىندا شوعىرلانعان جانە وكپەگە از اسەر ەتەدى. بىراق سودان كەيىن ينتوكسيكاتسيا سيندرومى ارتىپ, دەنە قىزۋى كوتەرىلىپ, قاتتى باس اۋرۋى, السىزدىك, تاماق اۋرۋى سياقتى باسقا بەلگىلەرى بايقالادى.
سوڭعى تاۋلىكتەگى مالىمەتتەرگە سايكەس, الماتىداعى ينفەكتسيالىق ستاتسيونارلاردا 216 سىرقات ەمدەلىپ جاتىر. جالپى, رەانيماتسيا جانە قارقىندى تەراپيا بولىمشەسىندە جاعدايى اۋىر 1 ناۋقاس بار. مۇنان دا بولەك بمسك مەن تەلەمەديتسينا ورتالىعى دارىگەرلەرىنىڭ باقىلاۋىندا 3 297 ناۋقاس باقىلاۋدا تۇر, ولاردىڭ ىشىندە جەڭىل جانە جاعدايى ورتاشا 3 080, سيمپتومسىز 217 ناۋقاس بار.
ەپيدەميالىق احۋالدىڭ وزگەرۋىنە بايلانىستى الماتى قالاسىندا ءبىر تاۋلىك ىشىندە I كومپونەنتتى 450 ادام, II كومپونەتتى 703 ادام ۆاكتسينا العان. رەۆاكتسينالاۋدان 1 971 ادام ءوتتى.
وڭتۇستىك شاھاردا تۇرعىنداردى ۆاكتسينالاۋ وتكەن جىلدىڭ اقپان ايىنان بەرى جۇرگىزىلىپ جاتقانى بەلگىلى. سودان بەرى الماتىدا I كومپونەنتتى 1 233 401 ادام, II كومپونەنتتى 1 200 358 ادام العان.
بۇگىنگى تاڭدا مەگاپوليستە Pfizer (Comirnaty) ۆاكتسيناسىن العاندار سانى 117 999-عا جەتتى. قازىر قالاداعى مەديتسينالىق ۇيىمداردا 85 ۆاكتسينالاۋ پۋنكتى جۇمىس ىستەپ جاتىر. 99 ۆاكتسينالاۋ بريگاداسىنا 313 مەديتسينا قىزمەتكەرى جۇمىلدىرىلدى.
دۇنيەجۇزىلىك دەنساۋلىق ساقتاۋ ۇيىمىنىڭ قازاقستانداعى وكىلدىگى ۆاكتسينالاۋ – قازىرگى ۋاقىتتا COVID-19 ۆيرۋسىنىڭ بارلىق اينالىمداعى نۇسقالارىنان, اۋىر دەرت پەن ولىمنەن قۇتقاراتىن ەڭ جاقسى قورعانىس بولىپ قالا بەرەتىنىن العا تارتۋدا. سوندىقتان ۆيرۋستىڭ تارالۋىن دۇرىس قاداعالايتىن, ۆيرۋس سيپاتتامالارىن وزگەرتەتىن ماڭىزدى گەنومدىق وزگەرىستەردى انىقتايتىن سەنىمدى ينتەگراتسيالانعان باقىلاۋ جۇيەلەرىن جاساۋ كەرەك.
الماتى
