13-14 ماۋسىم تۋماننوە, 15-16 ماۋسىم اققىستاۋ, 17-18 ماۋسىم نارىن, 19-20 ماۋسىم يساتاي, 21-22 ماۋسىم افاناسەۆو, 23-24 ماۋسىم گانيۋشكينو, 25-26 ماۋسىم جامانسور, 27-28 ماۋسىم مۇقىر تۇرعىندارىن تاڭعى 09.00-دەن باستاپ كەشكى 18.00-گە دەيىن مەديتسينالىق پويىزدىڭ ماماندارى قابىلدايدى.
«شالعاي اۋىلداردى ارالاپ, تەگىن كومەك كورسەتىپ جۇرگەن مامانداردىڭ قاتارىندا تەراپەۆت, پەدياتر, كارديولوگ, نەۆروپاتولوگ, وفتالمولوگ, گينەكولوگ, حيرۋرگ, ۋرولوگ, ماممولوگ جانە ستوماتولوگ بار. بيىل بىلىكتى مامانداردىڭ قۇرامى پسيحولوگ جانە دەرماتوۆەنەرولوگپەن تولىقتى. سونىمەن قاتار بيىل ستاموتولوگيالىق قۇرىلعىلار دا جاڭارتىلدى. مەديتسينالىق پويىزدا بيوحيميالىق تالداۋلار, رەنتگەنوگرافيا مەن فليۋروگرافيا, ىشكى اعزالار مەن تامىرلاردىڭ ۋدز-زەرتتەۋلەرىن, ەلەكتروكارديوگرامما, گاستروفيبروسكوپيا جانە دياگنوستيكالىق زەرتتەۋلەردىڭ باسقا دا تۇرلەرىن جۇرگىزۋگە مۇمكىندىك بار», دەدى «جاردەم» مەديتسينالىق پويىزىنىڭ باس دارىگەرى اينۇر ەگىنباەۆا.
ەستەرىڭىزگە سالا كەتسەك, «جاردەم» پويىزى 23 مامىر كۇنى الماتى-2 ستانتسياسىنان ماڭعىستاۋ وبلىسىنا اتتاندى. جوبانىڭ باستى ماقساتى – مەديتسينالىق قىزمەتكە قولى جەتپەيتىن شالعاي اۋدانداردىڭ تۇرعىندارىن ساپالى مەديتسينالىق كومەكپەن قامتاماسىز ەتۋ.
«جاردەم» مەديتسينالىق پويىزى 26 مامىر مەن 12 ماۋسىم ارالىعىندا ماڭعىستاۋ وبلىسىنان شالعايدا ورنالاسقان 9 ستانتسيانىڭ تۇرعىندارىنا ۇزدىك مامانداردان تەگىن دارىگەرلىك كەڭەس ۇسىنىپ, العاشقى كومەك كورسەتتى.
ماڭعىستاۋ وبلىسىنداعى دارىگەرلىك تەكسەرۋلەردىڭ ستاتيستيكاسى كەلەسىدەي: دارىگەرلىك تەكسەرۋلەردىڭ سانى – 11995. پاتسيەنتتەرگە پويىز ماماندارى كونسۋلتاتسيالىق-دياگنوستيكالىق قىزمەتتەر كورسەتتى. اسىرەسە جپد/تەراپەۆت/پەدياتر دارىگەرلەرىنە كوپ جۇگىنگەن, ياعني 2008 ناۋقاس. ودان كەيىن ۋرولوگقا 1127 ناۋقاس, وفتالمولوگكە 1099 ناۋقاس, نەۆروپاتولوگقا 1004 ناۋقاس جانە حيرۋرگ مامانىنا 968 ناۋقاس كەلگەن.
پويىز دارىگەرلەرى بارلىعى 1043 ەكگ, 1087 ۋدز جانە 583 فليۋوروگرافيا پروتسەدۋرالارىن وتكىزدى. سونىمەن قاتار 77 شاعىن حيرۋرگيالىق وتا جاسالدى, ونىڭ ىشىندە: تۇراقتى ءتىستى جۇلۋ (قاراپايىم) – 19, تۇراقتى ءتىستى جۇلۋ (كۇردەلى) – 7, جارانى درەناجداۋ – 51.
سونداي-اق پويىز ماماندارى قانت ديابەتى, ارتروز جانە ارتريت, سوزىلمالى پيەلونەفريت, ارتەريالىق گيپەرتەنزيا, ومىرتقانىڭ وستەوحوندروزى, سوزىلمالى پانكرەاتيت جانە سوزىلمالى حولەتسيستيت, جاتىر ميوماسى جانە جاتىر موينى ەروزياسى, پروستاتيت, گلاۋكوما, سوزىلمالى برونحيت جانە برونح دەمىكپەسى, سونداي-اق تۋبەركۋلەزگە كۇدىك (فليۋرو - وڭ ناتيجە) اۋرۋلارىن انىقتادى.
«مەديتسينالىق پويىز دارىگەرلەرىنىڭ كومەگىمەن قاراقيا ستانتسياسىندا 4-5 جاستاعى بالالارعا سۇندەتتەۋ جۇرگىزىلدى. سونداي-اق №10 رازەزدە قيىن جاعدايعا تۇسكەن سابيگە كومەك كورسەتتى. اۋىر دارەجەدەگى كۇيىك دياگنوزىمەن (تەرى ترانسپلانتاتسياسى) تۇسكەن ءبىر جارىم جاستاعى بالاعا كورسەتىلگەن ستاتسيونارلىق ەمدەۋدەن كەيىن پويىز دارىگەرلەرى كۇردەلى تاڭۋ جۇرگىزدى», دەپ اتاپ ءوتتى اينۇر ەگىنباەۆا.
پويىز دارىگەرلەرى العاشقى مەديتسينالىق-سانيتارلىق جانە كونسۋلتاتيۆتىك-دياگنوستيكالىق كومەك كورسەتەدى. زەرتحانالىق ادىستەردى قولدانا وتىرىپ, پاتسيەنتتەردى تەكسەرەدى. قاجەت بولعان جاعدايدا شاعىن وپەراتسيالاردى جۇرگىزەدى. سالالىق ماماندارى بار ەمحانالارى جوق شالعاي اۋىلداردىڭ تۇرعىندارىنا جوسپارلى ەمدەۋگە جاتقىزۋعا جولداما بەرەدى.
اۋىل تۇرعىندارى پاندەميادان كەيىن تەگىن ءارى ساپالى مەديتسينالىق كومەك كورسەتەتىن پويىزدى ۇلكەن ۇمىتپەن كۇتكەندەرىن جاسىرمادى. سونداي-اق مەديتسينالىق پويىز دارىگەرلەرىنە شىنايى العىستارىن ءبىلدىردى.
«وسى «جاردەم» پويىزىن دەنساۋلىعىمىزدى تەكسەرتۋ ءۇشىن كوپتەن كۇتتىك. دارىگەرلەر ءبىزدى تەكسەرىپ, نۇسقاۋلىق بەرىپ, وزىمىزگە كەرەك ۋكول-دارىلەردى جازىپ بەردى. ماماندار ءجىتى قاراپ, تەكسەرىپ جاتىر. پاندەمياعا بايلانىستى ەكى-ءۇش جىلدان بەرى كەلمەي قالدى عوي. ماڭعىستاۋدى بىلەسىزدەر, ەكولوگيالىق ايماق. سوندىقتان جىلىنا التى اي سايىن ەكى رەت كەلسە دەگەن تىلەگىم بار. «جاردەم» پويىزىنىڭ ماماندارىنا العىسىمىز شەكسىز», دەپ العىس ءبىلدىردى جەتىباي اۋىلىنىڭ تۇرعىنى جانار داۋلەتباەۆا.
مەديتسينالىق پويىز الداعى ۋاقىتتا اقتوبە, باتىس قازاقستان, قىزىلوردا, تۇركىستان جانە جامبىل وبلىستارىنا بارادى.
جوبانى «سامۇرىق-قازىنا» اق كومپانيالار توبىنىڭ اتىنان «Samruk-Kazyna Trust» الەۋمەتتىك جوبالاردى دامىتۋ قورى قر دەنساۋلىق ساقتاۋ مينيسترلىگىنىڭ قولداۋىمەن, «قازاقستان تەمىر جولى» ۇك اق جانىنداعى «الەۋمەتتىك جوبالار قورى» كورپوراتيۆتىك قورىمەن بىرلەسىپ ىسكە اسىرىپ وتىر.
2022 جىلى ەكى مەديتسينالىق پويىزدىڭ باعىتتارى جالپى قازاقستان بويىنشا جوسپارلانعان, بۇل رەتتە ولار شالعاي اۋدانداردىڭ 147 ستانتسياسىن قامتيدى. «جاردەم» مەديتسينالىق پويىزى 23 مامىردان 6 قاراشاعا دەيىن 80 ستانتسيانى, ال «سالاماتتى قازاقستان» 20 ماۋسىمنان 2 قاراشاعا دەيىن 67 ستانتسيانى ارالايدى.
