قاۋىمداستىق تۇركىتىلدەس ەلدەردىڭ تاۋەلسىز, ساياسي جانە كوممەرتسيالىق ەمەس بىرلەستىگى رەتىندە قۇرىلدى. جاڭا بىرلەستىكتىڭ نەگىزگى مىندەتتەرى ازاماتتاردىڭ ۇلتتىق قۇقىق قورعاۋ ينستيتۋتتارى مەن تۇركىتىلدەس ەلدەردىڭ ۇلتتىق زاڭنامالارى تۋرالى ساۋاتىن ارتتىرۋ, ادام قۇقىقتارىن قورعاۋ مەن دامىتۋعا جاردەمدەسۋ بولىپ تابىلادى.
قاۋىمداستىق ۇلتتىق قۇقىق قورعاۋ مەكەمەلەرىنىڭ ىنتىماقتاستىعىن نىعايتۋعا, ادام قۇقىقتارى سالاسىنداعى ءبىلىمدى ىلگەرىلەتۋ بويىنشا بىرلەسكەن جوبالاردى ىسكە اسىرۋعا نيەتتى. قاۋىمداستىق تۇركى قاۋىمداستىقتارىمەن جانە ۇيىمدارىمەن, ومبۋدسمەندەردىڭ شەتەلدىك ينستيتۋتتارىمەن, ومبۋدسمەندەردىڭ حالىقارالىق جانە وڭىرلىك جەلىلەرىمەن, باسقا دا حالىقارالىق ۇيىمدارمەن ادام قۇقىقتارىن قورعاۋ جانە كوتەرمەلەۋ سالاسىندا ءوزارا جۇمىس ىستەۋگە دايىن.
قازاقستان رەسپۋبليكاسىنداعى ادام قۇقىقتارى جونىندەگى ۋاكىل ەلۆيرا ءازىموۆانىڭ ايتۋىنشا, قاۋىمداستىققا قاتىسۋ تۇركى مەملەكەتتەرىنىڭ اۋماعىندا قازاقستان ازاماتتارىنىڭ قۇقىقتارىن قورعاۋ جونىندەگى ۇلتتىق قۇقىق قورعاۋ مەكەمەسىنىڭ الەۋەتىن كەڭەيتەدى جانە تۇراقتى نەگىزدە ادام قۇقىقتارى سالاسىنداعى وزىق تاجىريبەلەرمەن جانە زاڭنامامەن الماسۋعا مۇمكىندىك بەرەدى.
«قاۋىمداستىقتى قۇرۋ ءبىزدىڭ كۇش-جىگەرىمىزدى دايەكتى تۇردە ىلگەرىلەتۋگە, ونىڭ ىشىندە باسقا ۇيىمدارمەن سەرىكتەستىكتە جۇمىس ىستەۋگە مۇمكىندىك بەرەدى. ءبىزدىڭ قاۋىمداستىق شەڭبەرىندەگى ىنتىماقتاستىعىمىز ادامعا, ونىڭ قۇقىقتارى مەن بوستاندىقتارىنا قىزمەت ەتۋگە باعىتتالعان», دەدى ە.ءازىموۆا.
