قازاقستاندا بەلگىسىز كىسىلەردىڭ دۇرلىكتىرۋىمەن «زيل-موسكۆا» دەپ اتالاتىن ەسكى توڭازىتقىش بۇرىن-سوڭدى كەزدەسپەگەن سۇرانىسقا يە بولىپ وتىر. ساتىپ الۋشىلار اتالعان توڭازىتقىش ءۇشىن 3-4 مىڭ اقش دوللارىن ۇسىنۋدا. بۇل تۋرالى «ەكسپرەسس ك» حابارلادى.
ينتەرنەت جەلىلەرىندە «زيل-موسكۆا» توڭازىتقىشىندا قىزىل سىناپ بار دەگەن مازمۇنداعى اڭىزعا قۇرالعان اقپارات جاريالانىپتى. ساتىپ الۋشىلار وسى قىزىل سىناپتى الۋ ءۇشىن اتالعان قۇرىلعىعا قىزىعۋشىلىق تانىتىپ جاتقان كورىنەدى. ال بۇل سىناپتىڭ باعاسى تىم قىمبات دەسەدى.
«زيل-موسكۆانى» ساتىپ الۋعا نيەتتىلەر تەك قازاقستاندا عانا ەمەس, رەسەي مەن قىرعىزستاننان دا قىلاڭ بەرە باستاپتى. اسىرەسە, اتالمىش توڭازىتقىشتىڭ «ءداۋىرى» الماتى مەن بىشكەكتە ءجۇرىپ تۇر ەكەن. قازىرگى كەزدە بۇل قالالاردىڭ كوشەلەرىندە ەسكى توڭازىتقىش ارتىپ, بەلگىسىز جاققا بەت العان جۇك كولىكتەرى ءجيى كەزدەسۋدە.
وسى ىسكە بايلانىستى زەرتتەۋ جۇرگىزگەن باۋىرجان ءسابيتوۆ دەگەن مامان: «مەن وسى اقپاراتتىڭ ينتەرنەت جەلىلەرىندە كورىنىس بەرگەنىننەن باستاپ زەرتتەۋ جۇرگىزدىم. بۇل – قۋلىقپەن ۇيىمداستىرىلىپ وتىرعان ءىس. تاراتا ايتار بولسام, بەلگىسىز ادامدار العاشقىدا الگى توڭازىتقىشقا دەگەن سۇرانىستى ارتتىرادى. جارنامالايدى. ناتيجەسىندە كوپشىلىك اتالعان توڭازىتقىشتى ساتىپ الۋعا ۇمتىلادى. وسى ساتتە سۇرانىستى قولدان ارتتىرعان ادامدار ءا دەگەندە وزدەرىنە جيناپ العان توڭازىتقىشتاردى سۇراپ كەلگەندەرگە قىمباتقا ساتىپ پايدا تابادى.
ەگەر ءسىز باستاپقىدا ەلۋ شاقتى توڭازىتقىش جيناپ الساڭىز, وندا كوپ ۇزاماي قوماقتى قارجىعا يە بولاسىز. ارانداپ, جالعان جارناماعا سەنىپ, ەسكى توڭازىتقىشتى ساتىپ الىپ, ونى قايتادان قىمباتقا وتكىزەمىن دەپ ۇمىتتەنگەن ادامدار جاقىندا «زيل-موسكۆانىڭ» ەشكىمگە كەرەك ەمەس ەكەنىن تۇسىنەدى.
وسى سەكىلدى الاياقتىق تمد اۋماعىندا بۇرىن دا كەزدەسكەن. جۇرتشىلىقتىڭ ەسىندە بولار, سول كەزدە توڭازىتقىش ەمەس, «زينگەر» اتتى تىگىن ماشيناسىنا سۇرانىس كوبەيگەن. الاياقتار «زينگەردىڭ» قۇنىن 10 مىڭ دوللارعا دەيىن كوتەرگەن. ولار سول كەزدە دە الگى قىزىل سىناپتى العا تارتىپ, جۇرتشىلىقتى دۇرلىكتىرگەن-ءدى.
قىزىل سىناپ دەگەنىمىز نە؟ فيزيكتەردىڭ ايتۋىنشا, ونداي زات مۇلدە جوق, ول – كەزىندە كەڭەستىك قورعانىس سالاسىن اۋرەلەگەن, ونەرتاپقىشتاردىڭ قيالىنان تۋىنداعان اڭىز. تاعى ءبىر ايتا كەتەر ءجايت, وسى قىزىل سىناپ اڭىزىن كەڭەستىك مەملەكەتتىك قاۋىپسىزدىك كوميتەتى (كگب) اقش-تىڭ بارلاۋ قىزمەتىن الاڭداتۋ ءۇشىن ويلاپ تاپقان دەگەن دە ءسوز بار», – دەپ ءتۇسىندىردى.
جولدىباي بازار.
دەرەككوز: «ەكسپرەسس ك».
فوتو: blogger.de.
