«جول قاۋىپسىزدىگىن قامتاماسىز ەتۋ ماسەلەسى قاي كەزدە دە نازارىمىزدان تىس قالعان ەمەس. بۇل ماسەلە تەك پوليتسيا قىزمەتكەرلەرىنە عانا ەمەس, جالپى حالىق ءۇشىن دە ماڭىزدى ەكەنى داۋسىز. جول ەرەجەلەرىن قاتاڭ قاداعالاۋ, قاۋىپتىڭ الدىن الۋ جۇمىستارىن جۇرگىزگەنىنە قاراماستان, سوڭعى بەس جىلدا جىل سايىن جول-كولىك وقيعالارىنان ەكى مىڭنان استام ادامنىڭ مەرت بولاتىنى انىقتالعان. سونداي-اق ءار جىل سايىن جيىرما مىڭ ازامات ءتۇرلى دارەجەدەگى دەنە جاراقاتىن الادى. وسى ءبىر جانتۇرشىگەرلىك ستاتيستيكانى بولدىرماۋ ءۇشىن قوعام بوپ بىرلەسە جۇمىس اتقارعانىمىز ابزال», دەدى كوميتەت توراعاسى.
ا.ارىستانوۆتىڭ مالىمدەۋىنشە, جىل باستالعالى بەرى ەلىمىزدە 2 600-دەن استام جول-كولىك وقيعاسى تىركەلگەن. «وكىنىشكە قاراي, جول اپاتتارىنىڭ سالدارىنان 410 ادام باقيلىق بولدى, 3 500 جولاۋشى ءتۇرلى دەنە جاراقاتتارىن الدى. ءبىرىنشى توقساننىڭ وزىندە وسىنداي جاعدايلاردىڭ تىركەلۋى بارشامىزدى ويلاندىرۋعا ءتيىس», دەدى ءىىم وكىلى سوڭعى دەرەكتەر ارقىلى ماسەلەنىڭ مانىسىنە ءۇڭىلىپ.
ءباسپاسوز ءماسليحاتىندا كەلتىرىلگەن دەرەككە زەر سالساق, بۇگىندە ەلىمىزدە 4 ملن-نان استام كولىك تىركەلگەن ەكەن. كولىك سانى ارتقان سايىن جول-كولىك وقيعالارىنىڭ سانى دا كوبەيە تۇسكەن. «سوندىقتان كولىك جۇرگىزۋشىلەرى جول ەرەجەلەرىن ساقتاۋعا باسا نازار اۋدارعانى دۇرىس», دەيدى سپيكەر.
«جاياۋ جۇرگىنشى جولاعىنداعى ەرەجە بۇزۋعا قاتىستى 88 جول-كولىك وقيعاسى تىركەلگەن, سونىڭ سالدارىنان 22 ادام كوز جۇمىپ, 69 ازامات جاراقات الدى. جول-كولىك وقيعالارىنىڭ 72 پايىزى ەلدى مەكەندەردە تىركەلگەن», دەيدى ا.ارىستانوۆ.
جول-كولىك وقيعالارىنان زارداپ شەككەن بالالاردىڭ دا سانى از ەمەس. كوميتەت توراعاسى كەلتىرگەن دەرەكتەرگە قاراعاندا, جول-كولىك وقيعالارى سالدارىنان بۇگىنگە دەيىن 30 بالا قازا بولىپ, 592-ءسى ءتۇرلى دارەجەدەگى دەنە جاراقاتتارىمەن اۋرۋحاناعا جەتكىزىلگەن.
«جىل سايىن 1500 ادام ءومىر بويى جۇرگىزۋشى كۋالىگىنەن ايىرىلادى, وسى جىلدىڭ وزىندە 290 ادام جۇرگىزۋشى كۋالىگىمەن قوش ايتىستى. 15 كۇن اكىمشىلىك قاماۋعا الۋ جانە 7 جىلعا جۇرگىزۋشى كۋالىگىنەن ايىرۋ سەكىلدى قاتاڭ جازالاردىڭ قولدانىلعانىنا قاراماستان, مۇنداي بۇزۋشىلىقتاردىڭ 7,5 پايىزعا وسكەنى بايقالادى. سونىمەن قاتار كولىكتى ماس كۇيىندە باسقارعانى ءۇشىن 5,7 مىڭعا جۋىق جۇرگىزۋشى ۇستالدى», دەدى ءىىم وكىلى جاعدايدى ءتۇسىندىرىپ.
