پارتيانىڭ كەزەكتەن تىس ءححىى سەزىندە پرەزيدەنت پارتيا جۇمىسىن قايتا جانداندىرۋدى تاپسىرىپ, پارتيانىڭ قوعامدىق قابىلداۋ بولمەلەرى شاعىمدارمەن عانا ەمەس, ەلدى دامىتۋ بويىنشا ناقتى يدەيالارمەن كەلەتىن ازاماتتار ءۇشىن تارتىمدى ورىنعا اينالۋى كەرەك ەكەنىن ايتقان بولاتىن.
Amanat پارتياسى رەسپۋبليكالىق قوعامدىق قابىلداۋ بولمەسى مەڭگەرۋشىسىنىڭ ورىنباسارى ازامات ءبىرجانوۆ كوشپەلى ءموبيلدى توپتاردىڭ باستى مىندەتى – تۇرعىنداردىڭ ءتۇيىندى ماسەلەلەردى العا تارتىپ كەلۋىن كۇتۋ ەمەس, ولارعا وزدەرى بارۋ ەكەنىن اتاپ ءوتتى. «شالعاي اۋىلداردىڭ تۇرعىندارى وبلىس ورتالىعىنا جەتۋ ءۇشىن 300 شاقىرىم ءجۇرۋ قاجەت. ال جولدىڭ ناشارلىعىنان قارتتار مەن كولىگى جوق ادامدارعا دىتتەگەن جەرىنە جەتۋ تىپتەن قيىن. سوندىقتان الداعى ۋاقىتتا مۇنداي قابىلداۋلار قازاقستاننىڭ بارلىق وڭىرىندە بولادى», دەدى ول.
قابىلداۋلار كەزىندە تۇركىستان وبلىسىنا قاراستى جەڭىس اۋىلىنىڭ تۇرعىنى اۋەسكۇل ۇزدەۋباي اۋىلدىق ەمحانا جانىنان ءدارىحانا اشۋعا كومەك سۇراسا, جەرگىلىكتى ارداگەرلەر كەڭەسىنىڭ توراعاسى اسقار جاڭابەك ۇلى اۋىلعا گاز قۇبىرىن تارتۋ ماسەلەسىن كوتەردى. ال جەڭىس اۋىلىنىڭ تۇرعىنى ادىلبەك ۇسمانوۆ سۋ تاپشىلىعى مەن ونىڭ قىمباتتىعىنا نازار اۋداردى.
«ر-6 كانالى» 1967 جىلى سالىنعان. بۇرىن سۋ سىيىمدىلىعى سەكۋندىنا 2 000 تەكشە مەتر بولسا, قازىر 1 400-گە ازايعان. ارىقتىڭ بويىندا جۇزدەن استام شارۋاقوجالىعى بار. جاڭا جايىلىم جەرلەرگە سۋ جەتكىزۋ قيىن. سونىمەن قاتار مىڭ تەكشە مەتر ءۇشىن تاريف – 800 تەڭگە, بۇل وتە قىمبات. بارلىق سۋ ارنالارىنا كۇردەلى جوندەۋ قاجەت. ال ساپالى جوندەۋ جۇمىستارىن جۇرگىزۋ ءۇشىن ارنايى ماماندار مەن جەرگىلىكتى تۇرعىنداردان باقىلاۋ كوميسسياسى بولۋى قاجەت», دەدى اۋىل تۇرعىنى.
اماناتتىقتار تۇركىستان وبلىسىنا قاراستى جەڭىس, اقتوبە, تەمىر, قاراقوڭىر جانە قوعام سياقتى بارلىعى 5 اۋىلعا بارىپ, تۇرعىنداردى مازالاعان فەرمەرلىك شارۋاشىلىقتى سۋبسيديالاۋ, مەكتەپ پەن بالاباقشا سالۋ, جەر تەلىمدەرىن ءبولۋ سەكىلدى وزەكتى ماسەلەلەردى تالقىلادى.
ساپار اياسىندا Amanat ءموبيلدى بريگادالارى سولتۇستىك قازاقستان وبلىسىنداعى شالعاي ەلدى مەكەندەردىڭ تۇرعىندارىن قابىلدادى. پارتيا مۇشەلەرى كەللەروۆكا, يمانتاۋ, ياسنايا پوليانا, دالماتوۆو, قيالى اۋىلدارىندا بولدى.
قابىلداۋلار كەزىندە كەللەروۆكا اۋىلىنىڭ تۇرعىندارى ازىق-ت ۇلىك باعاسىن رەتتەپ, دەنەشىنىقتىرۋ-ساۋىقتىرۋ كەشەنىن سالۋ مۇمكىندىگىن قاراستىرۋدى جانە كوشەگە جارىق ورناتۋدى سۇرادى. اۋىل حالقىنىڭ سۋ جۇيەلەرى جۇمىسىنا قاتىستى دا شاعىمدارى كوپ. ءموبيلدى قوعامدىق قابىلداۋ بولمەسى مۇشەلەرىنىڭ ايتۋىنشا, ءدال وسى ماسەلە ءاربىر اۋداندا كوتەرىلگەن. ال كەللەروۆكادا ورتالىق سۋمەن جابدىقتاۋ مۇلدە بولماعان, تۇرعىندار ءالى كۇنگە دەيىن سۋدى ارنايى پۋنكتتەردەن ساتىپ الۋعا ءماجبۇر.
«كەللەروۆكادا 2,5 مىڭ ادام تۇرادى جانە XXI عاسىردا سۋعا قاتىستى وسىنداي پروبلەمالاردىڭ بولۋى, ارينە, وتە قولايسىز. ءبىز بۇل ماسەلەنى ەكولوگيا مينيسترلىگىندە دە كوتەرەمىز», دەپ اتاپ ءوتتى پارتيانىڭ رەسپۋبليكالىق قوعامدىق قابىلداۋ بولمەسىنىڭ مەڭگەرۋشىسى ءاليا سادىرباەۆا.
بۇعان دەيىن ءموبيلدى قوعامدىق قابىلداۋلار اقمولا, قاراعاندى, قىزىلوردا جانە پاۆلودار وبلىستارىنا بارعان بولاتىن. شالعايداعى 147 اۋىلدىڭ 1 500-دەن استام تۇرعىنى وزەكتى ماسەلەلەرىن كوتەرۋگە مۇمكىندىك الدى. ونىڭ ىشىندە سۋ جانە گازبەن جابدىقتاۋ, جولداردى جوندەۋ, جايىلىمدار مەن شابىندىق جەرلەر بەرۋ, ينتەرنەتكە قولجەتىمدىلىكتى قامتاماسىز ەتۋ سەكىلدى ماڭىزدى ماسەلەلەر بار.
ەستەرىڭىزگە سالا كەتەيىك, پارتيانىڭ قوعامدىق قابىلداۋ بولمەلەرىنە جىل باسىنان بەرى 40 مىڭنان اسا ادام جۇگىنگەن. تۇرعىنداردى نەگىزىنەن الەۋمەتتىك قامسىزداندىرۋ (32%), تۇرعىن ءۇي-كوممۋنالدىق شارۋاشىلىق (14%), تۇرعىن ۇيمەن قامتاماسىز ەتۋ جانە جەر ۋچاسكەلەرىن ءبولۋ (11%) تولعاندىرادى. مەملەكەتتىك ورگانداردىڭ باسشىلارى مەن ءتۇرلى دەڭگەيدەگى دەپۋتاتتار 8 مىڭنان استام قابىلداۋ وتكىزىپ, 22 مىڭ ادامدى قابىلدادى.
سونىمەن بىرگە پارتيانىڭ رەسپۋبليكالىق قوعامدىق قابىلداۋ بولمەسىنىڭ بازاسىندا وتباسى, ايەلدەر جانە بالالاردىڭ قۇقىقتارىن قورعاۋ, سونداي-اق تۇرمىستىق زورلىق-زومبىلىققا قارسى ءىس-قيمىل ماسەلەلەرى بويىنشا «111 شۇعىل قىزمەتى» ارنايى بايلانىس ورتالىعى جۇمىس ىستەيدى.
