بريفينگ بارىسىندا مينيسترگە رەسەي گازىن سولتسۇتىك پەن شىعىسقا تارتۋ جوباسى تۋرالى ساۋال قويىلدى.
«سولتۇستىك پەن شىعىستى گازداندىرۋدىڭ ەكى جولى بار. ءبىرىنشىسى – رەسەيدەن گاز تارتۋ. ەكىنشىسى – تومەننەن كەلەتىن «سارىارقا» گاز قۇبىرىن جالعاستىرىپ اكەتۋ. رەسەيدەن گاز تارتۋ ارزانىراق بولاتىن شىعار. ىركىلىسسىز جەتكىزۋ تۇرعىسىنان سەنىمدىرەك تە بولادى. ويتكەنى رەسەي فەدەراتسياسىندا گاز قورى وتە مول. بىزگە قاجەت گازدىڭ مولشەرى ولار ءۇشىن ەلەۋسىز دەۋگە بولادى. جىلىنا 4-7 ملرد تەكشە مەتر گاز دەگەن ولارعا بۇيىم دا ەمەس. ءوزىمىزدىڭ گازدى تارتۋ قىمبات دەپ وتىرعانىم, ەلدىڭ جارتى اۋماعىنا سالالانعان ماگيسترال ورناتۋ كەرەك بولادى. ول ماگيسترالدىڭ بويىندا گاز تۇتىناتىن حالىقتىڭ سانى دا شەكتەۋلى. مىسالى, قوستانايدان پەتروپاۆلعا, پاۆلوداردان وسكەمەنگە قۇبىر تارتساق, ارقايسىسىنا جەكە توراپ سالۋ كەرەك. ءبىر قۇبىرمەن ماسەلە شەشىلە سالمايدى», دەدى ۆەدومستۆو باسشىسى.
بولات اقشولاقوۆ ەلدەگى گاز قورى وزىمىزگە جەتپەيتىندەي زامان كەلە جاتقانىن ايتادى.
«ونىڭ ۇستىنە قازىردىڭ وزىندە بىزدە گاز تۇتىنۋ كولەمى ۇلكەن. گازداندىرىلعان وڭىرلەردىڭ وزىندە سۇرانىس جوعارى. ونەركاسىپ پەن ەلەكتر ەنەرگەتيكاسىنىڭ كاسىپورىندارى جانە بار. وسىنىڭ ءبارى 2024 جىلعا قاراي بىزدە گاز ەكسپورتى بولمايتىنداي جاعدايعا اكەلەتىن شىعار. ويتكەنى بار گازدى ءوز ىشىمىزدە تۇتىناتىن بولامىز. ياعني, قوسىمشا گاز قاجەت بولادى. ونى نە رەسەي فەدەراتسياسىنان, نە تۇركىمەنستان سياقتى وڭتۇستىكتەگى كورشىلەرىمىزدەن اكەلۋ كەرەك بولادى. تۇركىمەنستان ەلدىڭ سولتۇستىگىنەن الىس جاتقاندىقتان رەسەي ءتيىمدى. سوندىقتان سولتۇستىك پەن شىعىستى گازداندىرۋدىڭ العاشقى كەزەڭىن رەسەي گازىنىڭ ەسەبىنەن تىندىرساق, وندا تۇرعان قورقىنىشتى ەشتەڭە جوق سياقتى. كەيىن سول مولشەردەگى گاز قورى تابىلىپ جاستا, ءارى قاراي ويلاستىرامىز», دەدى مينيستر.
سونداي-اق ول رەسەيمەن گاز الماسۋ تاجىريبەسى بۇرىننان بار ەكەنىن ەسكە سالدى.
ء«بىز رەسەيمەن swap ءتاسىلى ارقىلى ونسىز دا گاز الماسىپ وتىرمىز. وڭتۇستىككە بىرنەشە جىلدان بەرى وسى تاسىلمەن گاز جەتكىزىپ كەلەمىز. ەشقانداي تاۋەكەل بولعان جوق. سوندىقتان تەوريالىق تۇرعىدا ىقتيمال دۇنيەنىڭ بارىنە الاڭداي بەرۋ دۇرىس ەمەس دەپ ويلايمىن», دەدى بولات اقشولاقوۆ.
