سلوۆاكياداعى پرەزيدەنت سايلاۋىندا كيسكا جەڭدى

بۇگىن, 30 ناۋرىز كۇنى سلوۆاكيادا وتكەن پرەزيدەنت سايلاۋىندا تاۋەلسىز كانديدات اندرەي كيسكا جەڭىسكە جەتتى. بۇل تۋرالى ۆۆس حابارلادى. جاڭا مەملەكەت باسشىسى بولعالى تۇرعان ۇمىتكەردىڭ نەگىزگى قارسىلاسى – سلوۆاكيانىڭ قازىرگى پرەمەر-ءمينيسترى روبەرت فيتسو داۋىس بەرۋدىڭ اقىرعى ناتيجەلەرى جاريالانباي تۇرىپ-اق ءوزىنىڭ جەڭىلگەنىن مويىندادى. قازىرگە دەيىن سايلاۋ ۋچاسكەلەرىنىڭ 96,77 پايىزىنىڭ مالىمەتتەرى بەلگىلى بولىپ وتىر. ونىڭ قورىتىندىسى بەلگىلى سلوۆاك فيلانتروپى جانە كاسىپكەر اندرەي كيسكانىڭ سايلاۋشىلاردىڭ 59,45 پايىز داۋىسىن العانىن انىقتاپ بەردى. ەكىنشى ورىنداعى قازىرگى ءىس باسىنداعى پرەمەر-ءمينيسترى جانە بيلەۋشى Smer-SD دەموكراتيالىق پارتياسىنىڭ  توراعاسى روبەرت فيتسو 40,54 پايىزدىق داۋىسقا قول جەتكىزدى. ساياساتتاعى جاڭا ادامنىڭ جەڭىسكە جەتۋىنىڭ سلوۆاك قوعامىندا سيمۆولدىق ءمانى بار. ەگەر فيتسكو جەڭىسكە جەتسە, وندا بۇكىل بيلىك ورىنتاقتارى ءبىر پارتيانىڭ قولىنا كوشەر ەدى. ال كيسكا ءوز كەزەگىندە سايلاۋ الدى ۋادەلەرىنىڭ ءبارىن ورىندايتىنىن قاداپ ايتتى. ەسكە سالا كەتەيىك, سايلاۋعا بارلىعى 14 ۇمىتكەر قاتىستى. مۇرات ايتقوجا. دەرەككوز: ۆۆس. فوتو: ۆۆس.