قىزىلوردا وبلىسى جاڭاقورعان اۋداندىق پروكۋراتۋراسى الكوگوليزمگە, ناشاقورلىق پەن ۋىتقۇمارلىق دەرتىنە شالدىققان اۋرۋلاردى ەرىكسىز ەمدەۋدە اۋداندىق ىشكى ىستەر ءبولىمى قىزمەتكەرلەرىنىڭ ورەسكەل زاڭ بۇزۋشىلىقتارعا جول بەرگەنىن انىقتادى.
ازاماتشا ج.كوبەنوۆا بالاسى ا.دوساليەۆتىڭ ءسپريتتى ىشىمدىك ءىشىپ الىپ, وتباسىنا تىنىشتىق بەرمەيتىنىن, اراققا سالىنىپ كەتكەنىن جانە ءوز ەركىمەن قويا المايتىنىن كورسەتىپ, اۋداندىق ىشكى ىستەر بولىمىنە شاعىمدانادى. وسى ارىز نەگىزىندە اۋداندىق ىشكى ىستەر ءبولىمى ونى اراققۇمارلىقتان ەرىكسىز ەمدەۋ مەكەمەسىنە جىبەرۋ تۋرالى اۋداندىق سوتقا ۇسىنىس كەلتىرەدى. ناتيجەسىندە سوتتىڭ 2013 جىلعى 4 جەلتوقسانداعى قاۋلىسىمەن اسىلحان دوساليەۆ قىزىلوردا قالاسىنداعى مەديتسينا تاۋەلدىلىگى ورتالىعىنا 6 اي مەرزىمگە ەرىكسىز ەمدەۋگە جىبەرىلگەن.
ال قازاقستان رەسپۋبليكاسىنىڭ «الكوگوليزمگە, ناشاقورلىق پەن ۋىتقۇمارلىق دەرتىنە شالدىققان اۋرۋلاردى ەرىكسىز ەمدەۋ تۋرالى» زاڭىنىڭ 3-بابىنا ساي, الكوگوليزمگە شالدىققان دەپ تانۋدى دەنساۋلىق ساقتاۋ مينيسترلىگى بەلگىلەگەن تارتىپپەن ءتيىستى مەديتسينالىق كۋالاندىرۋدان كەيىن مەملەكەتتىك دەنساۋلىق ساقتاۋ ۇيىمدارى جۇزەگە اسىرادى. اتالعان زاڭنىڭ 4-بابىندا سونداي-اق الكوگوليزمگە شالدىققان اۋرۋلاردى ەرىكسىز ەمدەۋگە جىبەرۋدى راسىمدەۋدى اۋرۋ تۋىستارىنىڭ, ىشكى ىستەر, پروكۋراتۋرا ورگاندارىنىڭ باستاماسىمەن مەديتسينالىق قورىتىندى بار بولعان جاعدايدا مەملەكەتتىك دەنساۋلىق ساقتاۋ ۇيىمدارى جۇزەگە اسىراتىنى ايقىندالعان.
الايدا, ا.دوساليەۆتى ەرىكسىز ەمدەۋگە جىبەرۋ دەنساۋلىق ساقتاۋ مەكەمەسى ەمەس, ىشكى ىستەر ورگانى راسىمدەپ, اۋداندىق سوتتىڭ زاڭسىز قاۋلى قابىلداۋى نەگىزىندە جۇزەگە اسىرعان. اۋداندىق ىشكى ىستەر ءبولىمىنىڭ ا.دوساليەۆتى ونىڭ اناسىنىڭ ارىزىنا سايكەس, ماسكۇنەمدىكتەن ەمدەۋ مەكەمەسىنە ەرىكسىز جىبەرۋ تۋرالى سوتقا ۇسىنىس بەرۋگە زاڭمەن كوزدەلگەن وكىلەتتىگى بولماعان.
وسى تەكتەس زاڭ بۇزۋشىلىقتار, ازاماتتار ج.داۋكەنوۆكە, ە.اپەللەۆكە, ا.التىنبەكوۆكە, س.ادىلوۆكە, ر.شالقىبەكوۆكە, ە.كوشەرباەۆقا, م.فوفانوۆقا, ن.اليگە جانە ا.نۇراليەۆكە قاتىستى قابىلدانعان قاۋلىلارىندا دا ورىن العان. وسىنىڭ سالدارىنان, اتالعان ازاماتتاردىڭ قۇقىقتارى مەن بوستاندىقتارىنا ەلەۋلى تۇردە نۇقسان كەلتىرىلىپ, ولاردىڭ كونستيتۋتسيالىق قۇقىقتارى ورەسكەل بۇزىلعان.
وسىعان سايكەس, جاڭاقورعان اۋداندىق پروكۋراتۋراسى اۋداندىق ىشكى ىستەر بولىمىنە زاڭدىلىقتى بۇزۋشىلىقتى جويۋ جونىندە ۇسىنىس ەنگىزىپ, ناتيجەسىندە كىنالى قىزمەتكەرلەردىڭ تارتىپتىك جاۋاپكەرشىلىكتەرى قارالدى.
اقمارال جانەسەنوۆا,
جاڭاقورعان اۋدانى پروكۋرورىنىڭ كومەكشىسى.
قىزىلوردا وبلىسى.
فوتو: vse-znat.ru.
