شاڭعى قوسسايىسىندا سىنعا تۇسكەن شىڭعىس راقپاروۆ جاتتىعۋدىڭ العاشقى تۇرىندە 38-ورىندى ەنشىلەسە, 10 شاقىرىمعا گۋندەرسەن ءتاسىلى بويىنشا جۇگىرۋدە ودان دا تومەن ناتيجە كورسەتتى. قورىتىندىسىندا راقپاروۆ 43-ساتىعا تۇراقتادى. بۇل باسەكەدە نورۆەگيالىق سپورتشىلاردىڭ قارقىنىنا ەشكىم شىداي المادى. باس جۇلدەنى يورگەن گروباك ولجالادى. وسىدان سەگىز جىل بۇرىن سوچي وليمپياداسىندا ەكى رەت تەڭدەسسىز دەپ تانىلعان مەلحۋس قالاسىنىڭ تۋماسى 2018 جىلى پحەنچحاندا قوس كۇمىستى قاناعات تۇتقان ەدى. بەيجىڭدەگى جارىسقا وتە جاقسى بابىندا كەلگەن 30 جاستاعى ساقا سپورتشى الدىنا جان سالمادى. جەڭىمپازدىڭ كورسەتكىشى – 27:13.3. ەكىنشى ورىندى گروباكتىڭ وتانداسى, بىلتىرعى جىلعى الەم چەمپيونى, 21 جاستاعى جاس جۇلدىز ەنس لۋروس وفتەبرۋ يەلەندى. ءۇشىنشى ساتىعا جاپونيالىق اكيتو ۆاتابە جايعاستى.
فريستايلشى-اكروبات شەرزود حاشيرباەۆ جارىستىڭ فينالدىق بولىگىنە شىعا المادى. 18 جاستار جاس ورەن باسەكەنىڭ ناعىز قىزعان شاعىندا قۇلاپ قالىپ, ءوز جانكۇيەرلەرىن جەرگە قاراتتى.
سنوۋبوردشىلاردىڭ سايىسىندا اۋستريالىق اننا گاسسەر التىننان القا تاقتى. بۇل – ونىڭ بيگ-ەيردەگى ءۇشىنشى التىنى. 30 جاستاعى اۋستريانىڭ وكىلى وسىعان دەيىن سوچي مەن پحەنچحان وليمپيادالارىندا شاشاسىنا شاڭ جۇقتىرماعان ەدى. جاڭا زەلانيانىڭ سۇلۋى زوي سادوۆسكي-سيننوت كۇمىس السا, جاپونيانىڭ ارۋى كوكومو مۋراسە قولاعا قول سوزدى. ەرلەر باسەكەسىندە قىتايلىق سۋ ءينيننىڭ الدىنا ەشكىم تۇسە العان جوق. ودان كەيىنگى ورىنداردى نورۆەگيالىق مونس رويسلاند پەن كانادالىق ماكس پەررو يەمدەندى.
فريستايلدىڭ سلوۋپستايل تۇرىنەن ايەلدەر اراسىندا شۆەيتساريانىڭ وكىلى ماتيلدا گرەمونىڭ مەرەيى ۇستەم بولسا, قىتايلىق ەيلين گۋ مەن ەستونيالىق كەللي سيلدارۋ جۇلدەگەرلەر ساناتاتىنا قوسىلدى. تاۋ شاڭعىشىلارىنىڭ تارتىسى دا شۆەيتساريالىق سپورتشىنىڭ جەڭىسىمەن اياقتالدى. الەمدىك دودادا جۇلدەلەردىڭ تولىق جيىنتىعىن جەڭىپ العان كورينن زۋتەردىڭ باستى ماقساتى وليمپيا ويىندارىندا دا توپ جارۋ ەدى. سول جوسپارىن ول بەيجىڭدە جۇزەگە اسىردى. اپەننين تۇبەگىنەن كەلگەن قوس ارۋ – سوفيا گودجا مەن ناديا دەلاگو كۇمىس پەن قولانى ءوزارا ءبولىستى.
بياتلونشىلاردىڭ 4ح7,5 شاقىرىمدىق ەستافەتاسىندا نورۆەگياعا تەڭ كەلەر ەشكىم تابىلمادى. قۇرامىندا ستۋرلا حولم لەگرەيد, تارەي بە, يوحاننەس بە جانە ۆەتلە شوستا كريستيانسەن سىندى دۇلۇلدەرى بار جۇلدىزدى كوماندانىڭ كورسەتكىشى – 1:19:50.2 سەكۋند. ەكىنشى ساتىعا فرانتسيا (فابەن كلود, ەميلەن جاكلەن, سيمون دەتە جانە كەنتەن فيون مايە) تۇراقتاسا, ءۇشىنشى ورىندى رەسەي (سايد كاريمۋللا حاليلي, الەكساندر لوگينوۆ, ماكسيم تسۆەتكوۆ جانە ەدۋارد لاتىپوۆ) يەلەندى. بۇل ارادا رەسەيدىڭ التىن الۋعا تولىقتاي مۇمكىندىگى بار ەدى. وكىنىشكە قاراي, تۇرىپ نىسانا كوزدەۋدە ءبىر مينۋتقا جۋىق ۋاقىت الدا كەلە جاتقان ە. لاتىپوۆ كوپ قاتەلەسىپ, ارىپتەستەرىنىڭ كۇش-جىگەرىن قۇم قىلدى. مارەگە جەتكەندە ونىڭ كوز جاسىنا ەرىك بەرۋىن دە تۇسىنۋگە بولاتىنداي ەدى.
كونكيشىلەردىڭ كوماندالىق سايىسىندا ەرلەر اراسىندا نورۆەگيا, ال ايەلدەر اراسىندا كانادا قۇرامالارى وزدى.
مانەرلەپ سىرعاناۋدان ايەلدەردىڭ قىسقا باعدارلاماسى 15 جاسار تاتار قىزى كاميلا ۆاليەۆانىڭ جارقىن جەڭىسىمەن اياقتالدى. رەسەيدىڭ تۋى استىندا ونەر كورسەتىپ جۇرگەن اسقان دارىن يەسى 84,16 ۇپاي جيدى. كاميلانىڭ كوماندالىق ارىپتەسى اننا ششەرباكوۆا ەكىنشى ورىن الدى. ول ۆاليەۆادان نەبارى ەكى ۇپاي عانا قالىپ قويدى. ءۇشىنشى ورىندا جاپونيالىق كاوري ساكاموتو. ونىڭ ولجالاعان ۇپايى – 79.84.
شايبالى حوككەيدەن وتكەن جارىستا شيرەك فينالعا شىققان كوماندالار تولىقتاي انىقتالدى. پلەي-وفف باسەكەلەرىندە دانيا لاتۆيانى (3:2), گەرمانيا سلوۆاكيانى (4:0), شۆەيتساريا چەحيانى (4:2) جانە كانادا قىتايدى (7:2) ۇتىپ, مىقتىلارمەن كۇش سىناسۋ قۇقىعىنا يە بولدى.
سەرسەنبىدە دە بىرنەشە «جان الىسىپ, جان بەرىسكەن» باسەكەلەردىڭ كۋاسى بولدىق. بىراق بۇل جولى دا قازاقستاندىق سپورتشىلاردان قايىر بولمادى. جارىس جولىنا شىققان جەرلەستەرىمىزدىڭ بارلىعى دا قالىڭ توپتىڭ اراسىندا قالىپ قويدى. ال سول كۇنى مىنا سپورتشىلار جەڭىس تۇعىرىنا كوتەرىلدى:
فريستايل (سلوۋپستايل, ەرلەر): 1. الەكساندر حولل (اقش), 2. نيكولاس گەپپەر (اقش), 3. يەسپەر تەدەر (شۆەتسيا).
تاۋ شاڭعىسى (سلالوم, ەرلەر): 1. كلەمان نوەل (فرانتسيا), 2. يوحاننەس شترولتس (اۋستريا), 3. سەباستيان فوسس سۋلەۆوگ (نورۆەگيا).
بياتلون (ەستافەتا, ايەلدەر). 1. شۆەتسيا (لينن پەرسسون, مۋنا برۋرسسون, حاننا وبەرگ, ەلۆيرا وبەرگ), 2. رەسەي (يرينا كازاكەۆيچ, كريستينا رەزتسوۆا, سۆەتلانا ميرونوۆا, ۋليانا نيگماتۋللينا), 3. گەرمانيا (ۆانەسسا فويگت, ۆانەسسا حينتس, فرانتسيسكا پرويس, دەنيز حەرمانن).
شاڭعى (كوماندالىق سپرينت, كلاسسيكالىق ءتاسىل, ايەلدەر): 1. كاتارينا حەننيگ – ۆيكتوريا كارل (گەرمانيا), 2. مايا دالكۆيست – يۋننا سۋندلينگ (شۆەتسيا), 3. يۋليا ستۋپاك – ناتاليا نەپرياەۆا (رەسەي).
شاڭعى (كوماندالىق سپرينت, كلاسسيكالىق ءتاسىل, ەرلەر): 1.ەريك ۆالنەس – يوحاننەس كلەبو (نورۆەگيا), 2. يۆو نيسكانەن – يوني مياكي (فينليانديا), 3. الەكساندر بولشۋنوۆ – الەكساندر تەرەنتەۆ (رەسەي).
فريستايل (اكروباتيكا, ەرلەر): 1. تسي گۋانپۋ (قىتاي), 2. الەكساندر ابرامەنكو (ۋكراينا), 3. يليا بۋروۆ (رەسەي).
شورت-ترەك (ەستافەتا, ەرلەر): 1. كانادا, 2. وڭتۇستىك كورەيا, 3. يتاليا.
شورت-ترەك (1500 مەتر, ايەلدەر): 1. چحۆە مين دجون (وڭتۇستىك كورەيا), 2. ارياننا فونتانا (يتاليا), 3. سيۋزاننە سحيۋلتينگ (نيدەرلاند).
شايبالى حوككەيدەن فينليانديانىڭ ايەلدەر قۇراماسى شۆەيتساريانىڭ قاقپاسىنا جاۋاپسىز ءتورت گول سالىپ, قولا مەدالدى يەلەندى – 4:0. كەشە تۇندە اقش پەن كانادانىڭ قىزدارى باس جۇلدەنى ءوزارا ساراپقا سالدى. ەرلەر جارىسىندا جارتىلاي فينالعا جولداما العان كوماندالار تولىقتاي بەلگىلى بولدى. اتاپ ايتساق, سلوۆاكيا مەن اقش اراسىنداعى كەزدەسۋدىڭ نەگىزگى ۋاقتىندا دا, وۆەرتايمدا دا جەڭىمپاز انىقتالعان جوق. بۋلليت سوعۋ بارىسىندا سلوۆاكيالىقتاردىڭ باعى جاندى – 3:2. فينليانديا شۆەيتساريانىڭ تاس-تالقانىن شىعاردى – 5:1. رەسەي دانيادان ايلاسىن اسىردى – 3:1. شۆەتسيا مەن كانادا اراسىنداعى كەزدەسۋدە سكانديناۆيالىقتاردىڭ مەرەيى ۇستەم بولدى – 2:0. بۇگىن جارتىلاي فينالدىق ساپيىستار وتەدى. بۇل مەجەدە فيندەر مەن سلوۆاكتار جانە رەسەيلىكتەر مەن شۆەتسيالىقتار كۇش سىناسادى.
بەيسەنبىگە دەيىنگى ناتيجەلەر جايىندا ايتساق, جالپى ەسەپتە نورۆەگيا قۇراماسى بارلىق قارسىلاسىنان قارا ءۇزىپ كەتتى. ءداپ قازىرگى كەزدە سكانديناۆيالىقتار 13 التىن, 7 كۇمىس جانە 8 قولانى ولجالاۋدا. ەندى وزگە كوماندالاردىڭ ولاردى قۋىپ جەتۋلەرى نەعايبىل. گەرمانيانىڭ قورجىنىندا 10 التىن, 6 كۇمىس جانە 4 قولا مەدال بار. اقش-تىڭ سپورتشىلارى 8 التىن, 7 كۇمىس جانە 4 قولانى يەلەنۋدە. مىنە, ازىرگە بەيجىڭ وليمپياداسىنىڭ ەڭ ۇزدىك كوماندالارى وسىلار. سونداي-اق, قىتاي (7+4+2), اۋستريا (6+7+4), نيدەرلاند (6+4+4), شۆەتسيا (6+4+4), شۆەيتساريا (5+0+5), رەسەي (4+8+12) جانە فرانتسيا (3+7+2) وىق وندىقتىڭ قاتارىنان كورىنۋدە. بارلىعى ازىرگە 21 مەملەكەتتىڭ ورەندەرى التىن السا, 28 ەلدىڭ وكىلدەرى جۇلدەگەرلەر ساناتىنا قوسىلدى.
