جۇزدەسۋدە نۇرلان ءابدىروۆ ساپار ماقساتى تۇرعىنداردىڭ سايلاۋ ۇدەرىسىنە قاتىستى وي-پىكىرىن تىڭداپ, ۇسىنىستارىن نازارعا الۋ ەكەنىن جەتكىزدى. مەملەكەت باسشىسى قاسىم-جومارت توقاەۆتىڭ اۋىل اكىمدەرىن سايلاۋ تۋرالى باستاماسى نەگىزىندە وسى ۋاقىتقا دەيىن ەلىمىزدە 872 اكىمدى تىكەلەي سايلاۋ ءوتتى. قاراپايىم تۇرعىنداردى ەل باسقارۋ ۇدەرىسىنە تارتۋدى كوزدەگەن بۇل باستاما الدا دا جالعاسىن تابادى. ەندى اۋدان اكىمدەرىن وسىنداي جولمەن تاڭداۋ ءۇشىن ءتيىستى جۇمىستار جاسالادى.
نۇرلان ءماجيت ۇلى مەملەكەت باسشىسىنىڭ سايلاۋدى ءادىل وتكىزۋ جونىندە تىكەلەي تاپسىرما بەرگەنىن, ايماقتارداعى جۇرتشىلىقتىڭ ۇسىنىس-تىلەگىن تىڭداۋدى دا پرەزيدەنت مىندەتتەگەنىن اتاپ ءوتتى.
– بۇگىنگى كەزدەسۋدە وي-پىكىرلەرىڭىزدى بارىنشا اشىق ايتۋلارىڭىزدى سۇرايمىز. ءبارىمىزدىڭ ماقساتىمىز ءبىر, بۇل – اشىق, ءادىل سايلاۋ وتكىزۋ. ۇسىنىستارىڭىز جازىلىپ الىنىپ, زەردەلەنەدى. وسىدان كەيىن وبلىستىق سايلاۋ كوميسسياسىنىڭ مۇشەلەرىمەن كەزدەسىپ, ولاردىڭ جۇمىسىمەن تانىسامىز. سونىمەن قاتار اۋىل تۇرعىندارىمەن دە جۇزدەسەمىز, – دەدى ن.ءابدىروۆ.
وسك توراعاسىمەن كەزدەسۋدە «ادىلدىك جولى» رەسپۋبليكالىق قوعامدىق بىرلەستىگى وبلىستىق فيليالىنىڭ جەتەكشىسى ءلاززات باقتىباەۆا سايلاۋ كوميسسيالارى تۋرالى پىكىر ءبىلدىردى. سايلاۋلار كەزىندە بارلىق پارتياعا بىردەي تەڭدىك پرينتسيپتەرى ساقتالمايتىنىن جەتكىزدى. بيۋدجەتتىك مەكەمە قىزمەتكەرلەرىن سايلاۋ كوميسسيالارى قۇرامىنان بوساتۋ تۋرالى ۇسىنىس ايتتى. قوعام بەلسەندىسى پورتال ارقىلى داۋىس بەرۋدى قولعا الاتىن ءسات جەتكەنىن دە ايتىپ ءوتتى.
بۇدان بولەك, وبلىستىق «سىر ديدارى» گازەتىنىڭ باس رەداكتورى ساكەن الداشباەۆ, بەلسەندى ەريك تەڭىزباەۆ, جۋرناليستەر قانات ماحانوۆ, ەرقانات سارسەنباي, ارداگەر اسىلبەك جۇماباەۆتار سۇراقتارىن جولداپ, ۇسىنىستارىن جەتكىزدى. زاڭعا وزگەرىستەر ەنگىزۋ تۋرالى دا پىكىر ايتقاندار بولدى.
ساپار اياسىندا وسك ماماندارى داۋرەن ىسقاقوۆ, ايگەرىم تاجيەۆا ايماقتاعى سايلاۋ كوميسسيالارى مۇشەلەرىمەن كەزدەسىپ, قازىرگى تالاپتار جونىندە تۇسىندىرمە جۇمىستارىن جۇرگىزەدى. بىلتىرعى اۋىل اكىمدەرىن سايلاۋدان بەرى دە ءبىرشاما ۋاقىت ءوتتى. ەل باسقارۋعا كەلگەن ازاماتتاردىڭ يدەياسىنان ناتيجە شىعاتىن كەز جەتتى. وسى ساپار بارىسىندا سول اۋىلدارعا دا بارىپ, قاراپايىم تۇرعىندارمەن تىلدەسۋ جوسپارلانىپ وتىر.
قىزىلوردا
