اتالعان كەزدەسۋدە لەبرون دجەيمس 26 ۇپاي الدى. ءوز كومانداسىنىڭ جەڭىسكە جەتۋى ءۇشىن بۇل جەتكىلىكسىز بولعانىمەن, ونىڭ ەسىمى تاريحتا قالدى. ويتكەنى وسىعان دەيىن ۇبق تاريحىندا ەڭ كوپ ۇپاي ولجالاعان كارىم ابدۋل-دجاببار ەدى. ءيا, 1969-1989 جىلدار ارالىعىندا «ميلۋوكي باكس» پەن «لوس-اندجەلەس لەيكەرستىڭ» ساپىندا جاسىنداي جارقىلداعان داڭقتى باسكەتبولشىنىڭ ەسىمىن جانكۇيەرلەردىڭ ۇمىتا قويماعانى انىق. سپورتتىڭ بۇل تۇرىندە تولاعاي تابىستارعا جەتكەن ول ۇبق-دا ونەر كورسەتكەن 20 جىل ۋاقىت ارالىعىندا 44 149 ۇپاي جينادى. مىنە, وتكەن اپتادا سول رەكورد بۇزىلدى. دجابباردىڭ رەكوردىن دجەيمس جاڭارتتى. 37 جاستاعى «لوس-اندجەلەس لەيكەرستىڭ» شابۋىلشىسى 44 157 ۇپايعا يەلىك ەتىپ, وراسان زور كورسەتكىشىمەن جەر-جاھان جانكۇيەرلەرىن تامساندىردى.
لەبرون دجەيمس 1984 جىلدىڭ 30 جەلتوقسانىندا اقش-تىڭ وگايو شتاتىنا قاراستى اكرون قالاسىندا دۇنيەگە كەلدى. ونىڭ بويى – 207 سانتيمەتر, سالماعى – 113 كيلو. كەزىندە لەبرون «كليۆلەند كاۆالەرس» (2003-2010, 2014-2018) پەن «مايامي حيت» (2010-2014) كلۋبتارىندا وينادى. بۇل كۇندەرى «لوس-اندجەلەس لەيكەرستىڭ» نامىسىن قورعاۋدا. ەكى دۇركىن وليمپيادا چەمپيونى اتانىپ, ۇبق بىرىنشىلىگىن ءتورت رەت ۇتتى. سان مارتە ەڭ قۇندى جانە ەڭ كوپ ۇپاي جيناعان ويىنشىلارعا تيەسىلى ارنايى سىيلىقتاردى يەلەندى. دجەيمستىڭ باسقا دا تولىپ جاتقان اتاقتارى بار.
سونداي-اق ۇبق-دا ەڭ كوپ ۇپاي ولجالاعان «توپ-10» ويىنشىنىڭ تىزىمىندە كارل مەلوۋن, كوبي برايانت, مايكل دجوردان, ديرك نوۆيتسكي, ۋيلت چەمبەرلەن, شاكيل و’نيل, كارمەلو ەنتوني جانە موزەس مەللوۋن سىندى اتتارى اڭىزعا اينالعان ازاماتتار بار. بىراق وسى 10 باسكەتبولشىنىڭ سەگىزى سپورتتان الدەقاشان قول ۇزگەن. ولاردىڭ بارلىعىنىڭ دا ەسىمى الەمدىك سپورت تاريحىندا التىن ارىپتەرمەن جازۋلى. ال 41 جاستاعى كوبي برايانت 2020 جىلى اۋە اپاتىنان قازا تاپتى. سول سەبەپتى دە الداعى 10-15 جىل ارالىعىندا لەبرون دجەيمستىڭ رەكوردىن ەشكىم بۇزا المايدى دەپ نىق سەنىممەن ايتۋعا بولادى.
