حوككەي: «بارىس» ەكى ويىنداعى ەسەپتى تەڭەستىردى

بۇگىن, 22 ناۋرىز كۇنى استانادا جەرگىلىكتى «بارىس» كومانداسى قۇرلىقتىق حوككەي ليگاسىنىڭ پلەي-وففى ەكىنشى راۋندىندا ۋفانىڭ «سالاۆات يۋلاەۆ» جاساعىن قابىلداپ, 5:2 ەسەبىمەن ۇتىپ شىقتى. بۇل تۋرالى egemen.kz حابارلادى. ماتچ ۋفالىقتاردىڭ شابۋىلىمەن باستالدى. وسى كەزدە الاڭ يەلەرى ساپىنان ءبىر ويىنشىدان كەيىن ءبىر ويىنشى الاڭنان قۋىلىپ جاتتى. وسىنداي ازشىلىق تۇسىندا ولار ءوز قاقپالارىنا گول دا سوقتىرىپ تىندى. مۇنى 12 مينۋتتا اندرەي زۋبارەۆ جاسادى. تاعى ءتورت مينۋتتان كەيىن مەيماندار فورۆاردى ەگور دۋبروۆسكي ەكى قورعاۋشىنىڭ ورتاسىنان جويقىن سوققى جاساپ, استانالىقتاردى قاپىدا قالدىردى. الاڭ يەلەرى ءبىر گولدىڭ قارىمىن كەزەڭ بىتۋگە ءبىر مينۋت قالعاندا قايتاردى. ونى داستين بويد پەن برەندون بوچەنسكيدەن پاس العان كريستيان كۋدروچ سالدى. ەكىنشى كەزەڭدە اري-پەككي سەليننىڭ شاكىرتتەرى ۇزدىكسىز العا ۇمتىلۋمەن بولدى. بۇل ارالىقتا ولار تاعى ەكى شايبا سالىپ, ويىندا ءبىرىنشى رەت العا شىقتى – 3:2. شايبالاردى كونستانتين رۋدەنكو مەن كەم باركەر ءتۇسىردى. ءبىزدىڭ جىگىتتەر ءۇشىنشى كەزەڭدە دە وسىلاي جاۋاپسىز ەكى شايبا سوقتى. الدىمەن بوچەنسي مەن بويدتىڭ پاسىنان اندرەي گاۆريلين ەسەپتى 4:2-گە جەتكىزدى. ال سوڭعى نۇكتەنى بوچەنسكيدىڭ قولداۋىمەن داستين بويد قويدى. وسىلايشا ەكى ويىنداعى ەسەپ 1:1-گە تۇراقتادى. ەندى ءۇشىنشى جانە ءتورتىنشى ويىندار 24 جانە 25 ناۋرىز كۇندەرى ۋفادا وتەدى. سودان سوڭعى بەسىنشى كەزدەسۋ استانادا وينالادى. ەسكە سالا كەتەيىك, استانادا وتكەن ءبىرىنشى ويىننىڭ نەگىزگى ۋاقىتى 2:2 بولىپ اياقتالعان ەدى. جەڭىمپاز وۆەر-تايمدا انىقتالدى. ونى 62-مينۋتتا نيكيتا فيلاتوۆ سالىپ, قوناقتارعا جەڭىس اپەردى. دامير قوجامقۇل. دەرەككوز: egemen.kz. فوتو: «بارىس» حوككەي كلۋبىنىڭ ءارحيۆى.