كۇنى كەشە عانا بىرىككەن اراب امىرلىكتەرىنىڭ ء(باا) فۋدجەيرو قالاسىندا تاەكۆوندودان Fujairah وpen ءتۋرنيرى اياقتالدى. رەيتينگتىك تۋرنيردە جەرلەستەرىمىز ءبىراز ولجاعا كەنەلدى. اسىرەسە ءبىز 54 كيلو سالماقتاعى سايات تورەقۇلدىڭ تەڭدەسسىز ونەرىنە تامساندىق. قارسى كەلگەندەردىڭ بارلىعىن قوعاداي جاپىرعان قانداسىمىز باس جۇلدەنى قانجىعاسىنا بايلادى. جەڭىس تۇعىرىنىڭ ەڭ بيىك ساتىسىنا كوتەرىلۋگە دۇيسەنبەك ازىرەت, نۇرلان مىرزاباەۆ جانە نارگيزا قويشىبەكتىڭ دە تاماشا مۇمكىندىكتەرى بولدى. شەشۋشى سىنعا دەيىن القىنباي جەتكەن قازاق سپورتشىلارى سوڭعى تۇستا ۇتىلىپ, كۇمىس مەدالدى قاناعات تۇتتى. ال سمايىل دۇيسەباي مەن نۇربەك جامشاەۆ قولا جۇلدەنى ەنشىلەدى. وسىلايشا, 1 التىن, 3 كۇمىس, 2 قولانى ولجالاعان قازاقستان قۇراماسى ءباا-دەگى تۋرنيردە ۇزدىك كوماندالاردىڭ قاتارىنان كورىندى.
فرانتسيانىڭ سالون-دە-پروۆانس قالاسىندا مارافونشىلاردىڭ سايىسى ءوز مارەسىنە جەتتى. 10 شاقىرىمدىق قاشىقتىقتا جاننا ماماجانوۆا شاشاسىنا شاڭ جۇقتىرماي, مارە سىزىعىن ءبىرىنشى بولىپ قيىپ ءوتتى. ونىڭ كورسەتكىشى – 33 مينۋت 56 سەكۋند. بۇل – قازاق قىزىنىڭ بيىلعى ماۋسىمداعى ەكىنشى باس جۇلدەسى. قاڭتار ايىنىڭ سوڭىندا جاننا اتالعان مەملەكەتتىڭ لە ليۋك قالاسىندا وتكەن شاعىن مارافوندا دا الدىنا جان سالماي, التىننان القا تاققان بولاتىن.
بۇل كۇندەرى ۋكراينانىڭ استاناسى – كيەۆتە سەمسەرلەسۋدەن الەم كۋبوگىنىڭ كەزەڭدىك سايىسى ءوتىپ جاتىر. اتالعان جارىستا قازاقستاندىق سوفيا نيكولايچۋك قولا مەدالدى موينىنا ءىلدى. جەرلەسىمىز تەك رەسەيدىڭ قوس وكىلى – يانا بەكمۋرزوۆا مەن اناستاسيا نازاروۆدان عانا قالىپ قويدى.
