جانجالدان سوڭ قىزمەتىنەن ايىرىلدى

بۇدان بۇرىن حابارلاعانىمىزداي, استانا قالاسىنداعى «شانحاي» ءدامحاناسىندا پروكۋراتۋرا قىزمەتكەرلەرى قاتىسقان جانجال ورىن العان ەدى. وندا ءدامحانا قىزمەتشىلەرى مەن پروكۋراتۋرا قىزمەتكەرلەرى ءوزارا كيكىلجىڭگە بارىپ, اياعى ۇرىس-كەرىسكە اينالعان جانجال تۋىنداعان بولاتىن. سوندا بۇل ادەپسىز قىلىق, اناۋ-مىناۋ ەمەس, ەلدەگى زاڭدىلىقتىڭ ساقتالۋىن قاداعالايتىن, جۇرت ىسىنە دە, سوزىنە دە سەنىم ءبىلدىرىپ جۇرگەن بىردەن-ءبىر قۇزىرلى ورگان اتىنا كىر كەلتىرگەنى دە انىق ەدى. ال قوعامدىق ورىندا كىم بولسا دا تەرىس قىلىق كورسەتكەندەر زاڭعا سايكەس جازالانۋى ءتيىس دەيمىز. ونىڭ ۇستىنە پروكۋراتۋرا قىزمەتكەرلەرىنىڭ مۇنداي زاڭسىزدىققا سالىنۋى مۇلدەم توزگىسىز جاعداي ەكەنى ءسوزسىز. سوندىقتان دا بولسا كەرەك, باس پروكۋراتۋرانىڭ ءباسپاسوز قىزمەتى بىزگە حابارلاعانداي, بۇل ورەسكەل وقيعاداعى جازىقتىلار جازالانىپتى. ياعني قىزمەتتىك تەكسەرىستىڭ قورىتىندىسىنا سايكەس, پروكۋراتۋرا قىزمەتكەرلەرىنىڭ ار-نامىس كودەكسىنىڭ نورمالارىن ورەسكەل بۇزعاندىعى جانە پروكۋراتۋرا ورگاندارىنىڭ بەدەلىنە نۇقسان كەلتىرەتىن تەرىس قىلىق جاساعانى ءۇشىن ابزال زاڭقوەۆ استانا قالاسى پروكۋرورىنىڭ بۇيرىعىمەن استانا قالاسىنىڭ «ەسىل» اۋدانى پروكۋرورىنىڭ كومەكشىسى لاۋازىمىنان بوساتىلىپ, پروكۋراتۋرا ورگاندارىنان قىزمەتتەن شىعارىلعان, ال ءىلياس ابدۋاليەۆ باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتىنىڭ ايماقتىق كولىك باسقارماسى باستىعىنىڭ 3 ناۋرىزداعى بۇيرىعىمەن وسى باسقارمانىڭ اعا پروكۋرورى لاۋا­زىمىنان بوساتىلىپ, پروكۋراتۋرا ورگاندارىنان قىزمەتتەن شىعارىلعان. سونداي-اق, ءوز باعىنىشتىلارىنا ءتيىستى با­قىلاۋ جاساماعانى, ياعني سەنىم ارتقان بولىمشە قىزمەتكەرلەرىنىڭ پروكۋراتۋرا ورگاندارىنىڭ بەدەلىنە نۇقسان كەلتىرەتىن ارەكەت جاساۋىنا اكەلىپ سوقتىرعانى ءۇشىن قۇقىقتىق ستاتيستيكا جانە ارنايى ەسەپكە الۋ جونىندەگى كوميتەت توراعاسىنىڭ بۇيرىعىمەن قسجاەك ايماقتىق باسقارماسىنىڭ باستىعى مارالبەك ەشىموۆ قىزمەتكە تولىق سايكەس ەمەستىگى تۋرالى ەسكەرتۋ العان. وعان قوسا قولاستىنداعى قىزمەتكەرلەرىنىڭ پروكۋراتۋرا ورگاندارىنىڭ ار-نامىس كودەكسى تالاپتارىن ساقتاۋىن قامتاماسىز ەتپەگەنى ءۇشىن استانا قالاسى «ەسىل» اۋدانىنىڭ پروكۋرورى ءبىرجان ماجرەنوۆكە سوگىس جاريالاندى. ءسويتىپ, ەندى بۇل جانجالعا نۇكتە قويىلعان سەكىلدى. الەكساندر تاسبولاتوۆ, «ەگەمەن قازاقستان».