ايماق باسشىسى ارداگەرلەردىڭ ەل بىرلىگىن بەكەمدەپ, جاقسى ىستەر ۇيىتقىسى بولىپ كەلە جاتقانىن اتاپ ءوتتى. بۇل كەزدەسۋدىڭ ماقساتى الدا اتقارىلاتىن جۇمىستاردى سارالاپ, ورتاق ماسەلەلەردى الدىڭعى تولقىن وكىلدەرىمەن بىرلەسىپ تالقىلاۋ ەكەنىن جەتكىزدى.
– جىل باسىنداعى دۇربەلەڭنەن تۇتاستىعىمىز بەن ەلىمىزدىڭ بولاشاعىنا بالتا شابىلا جازدادى. سىندارلى كەزەڭدە مەملەكەت باسشىسى جەدەل ءارى باتىل شەشىم قابىلداپ, حالقىمىز قاتەردەن امان ءوتتى. پرەزيدەنت 11 قاڭتاردا پارلامەنت ءماجىلىسىنىڭ وتىرىسىندا تاۋەلسىز مەملەكەتىمىزدى ودان ءارى دامىتۋدىڭ جاڭا مىندەتتەرىن بەلگىلەپ, ەلىمىزدە تاريحي وزگەرىستەر كەزەڭى باستالعانىن مالىمدەگەنىن بىلەسىزدەر. باستى ماقسات – كۇش-جىگەرىمىزدى بىرىكتىرىپ, قيىندىقتاردى ەڭسەرۋ, قۋاتتى جاڭا قازاقستاندى بىرلەسە قۇرۋ. وسى رەتتە زيالى قاۋىم وكىلدەرىنە, ەل الدىندا جۇرگەن ازاماتتارعا جۇكتەلەر جاۋاپكەرشىلىك جەڭىل بولمايتىنى بەلگىلى. قاي كەزدە دە ۇلكەنىن قۇرمەتتەپ, اقساقالداردىڭ ايتقانىن تىڭداعان حالىقپىز. سوندىقتان ءبىرىنشى كەزەكتە وزدەرىڭىزبەن كەڭ وتىرىپ كەڭەسىپ, الداعى جوسپارلارىمىزدى بىرلەسە جۇزەگە اسىرساق دەگەن نيەتپەن جينالىپ وتىرمىز, – دەدى گ.ابدىقالىقوۆا.
باسقوسۋدا مەديتسينا ارداگەرى تۇرعانباي ماحانوۆ سوڭعى كەزدەرى اقساقالدار مەن كەيىنگى تولقىن اراسىنداعى ساباقتاستىقتىڭ اجىراپ كەتكەنىن ايتىپ, ۇلتتىق قۇندىلىقتاردى دارىپتەۋدە اقساقالدار كەڭەسى مەن جاستار ورتالىعىنىڭ جۇمىستارىن ءبىر ارناعا توعىستىرىپ, جانداندىرۋ قاجەتتىگىن قاپەرگە سالدى. سونداي-اق ءدىني تۇرعىدا باعىتىنان اداسىپ جۇرگەن جاستارعا رۋحاني ءتالىم-تاربيە بەرۋ ىسىنە دە ءجىتى ءمان بەرۋ كەرەگىن اتاپ ءوتتى. ال وبلىستىق ارداگەرلەر كەڭەسىنىڭ توراعاسى سەرىك دۇيسەنباەۆ جاستاردىڭ وي-ساناسىنا اسەر ەتەتىن ءتۇرلى اقپاراتتارعا توسقاۋىل قويىپ, بىرلىككە ۇندەيتىن تانىمدىق باسقوسۋلار ۇيىمداستىرۋ كەرەك دەگەن ۇسىنىسىن ورتاعا سالدى. مەملەكەت جانە قوعام قايراتكەرى بيعالي قايۋپوۆ تەحنولوگيالىق وزگەرىستەر قوعامىندا ءومىر سۇرەتىن جاستاردى اشىق اڭگىمەگە شاقىرىپ, ناقتى ارەكەتتەرگە نەگىزدەلگەن باستاماعا قولداۋ بىلدىرۋدە بارلىق بۋىن دايىن بولۋى كەرەك دەگەن پىكىر قوستى.
جيىن سوڭىندا وبلىس اكىمى ورتاق ماسەلەلەردى بىرلەسىپ شەشۋدە ءاربىر ۇسىنىس ەسكەرىلەتىنىن ايتىپ, زيالى قاۋىم وكىلدەرىن پرەزيدەنت ۇستانىمىنا قولداۋ بىلدىرۋگە شاقىردى.
قىزىلوردا وبلىسى
