قوعام • 10 قاڭتار، 2022

بۇگىن – جالپىۇلتتىق ازا تۇتۋ كۇنى

211 رەت كورسەتىلدى

10 قاڭتار قازاقستان بويىنشا جالپىۇلتتىق ازا تۇتۋ كۇنى دەپ جاريالانعان، دەپ حابارلايدى Egemen.kz.

ەلدەگى جاپپاي تارتىپسىزدىكتەر كەزىندە كوپتەگەن ادامنىڭ قايتىس بولۋىنا بايلانىستى قر پرەزيدەنتى قاسىم-جومارت توقاەۆ 10 قاڭتاردى جالپىۇلتتىق ازا تۇتۋ كۇنى دەپ جاريالادى. بۇگىن قازاقستان بويىنشا مەملەكەتتىك تۋلاردىڭ بارلىعى تومەن تۇسىرىلەدى.

وسىلايشا ب ۇلىك كەزىندە قازا تاپقان بەيبىت تۇرعىندار مەن اسكەريلەر، پوليتسيا وكىلدەرى مەن قۇقىق قورعاۋ قىزمەتكەرلەرىنە قۇرمەت كورسەتىلەدى. كەيىنگى كۇندەرى بولعان قاقتىعىستار كەزىندە قايتىس بولعان ازاماتتاردىڭ تۋعان-تۋىسقاندارى مەن وتباسىلارىنا مەملەكەت باسشىسى قاسىم-جومارت توقاەۆ كوڭىل ايتقان بولاتىن.

«الماتىدا سودىر-لاڭكەستەردىڭ قولىنان اكىمشىلىك عيماراتتار عانا ەمەس، بەيبىت تۇرعىنداردىڭ مۇلكىنە دە زالال كەلدى. سونداي-اق جۇزدەگەن بەيبىت تۇرعىن مەن اسكەري قىزمەتشىنىڭ دەنساۋلىعى مەن ومىرىنە قاتەر ءتوندى. وسى تراگەديالار كەزىندە قايتىس بولعانداردىڭ وتباسىنا كوڭىل ايتامىن»، دەدى پرەزيدەنت.

سونداي-اق مەملەكەت باسشىسى قاسكويلىككە بارعان ادامداردىڭ ءبارى قاتاڭ جازالاناتىنى ايتتى.

ء«بىزدىڭ تاريحىمىزداعى وسى ءبىر قيىندىقتى تەز ارادا ەڭسەرەتىنىمىزگە ەشقانداي كۇمان جوق. ەڭ باستىسى، بولاشاقتا مۇنداي وقيعالاردىڭ قايتالانۋىنا جول بەرمەۋ كەرەك. مەن قۇرعان ۆەدومستۆوارالىق توپ سودىرلار مەن لاڭكەستەردى ىزدەۋمەن جانە ولاردى ۇستاۋمەن اينالىسادى. ولاردىڭ ءبارى قاتاڭ قىلمىستىق جاۋاپكەرشىلىككە تارتىلادى دەپ ازاماتتارىمىزعا ۋادە بەرەمىن. بارشا قازاقستاندىقتان وتىنەرىم، ساقتىق تانىتىپ، بارىنشا قىراعى بولىڭىزدار. كۇماندى ادامداردىڭ قانداي دا ءبىر كۇدىك تۋدىراتىن بەلسەندى ارەكەتىن بايقاساڭىز، قۇقىق قورعاۋ ورگاندارى مەن جەدەل جەلىلەرگە حابارلاڭىزدار»، دەدى ق.توقاەۆ.

ەسكە سالساق، ماڭعىستاۋ وبلىسىنىڭ جاڭاوزەن قالاسىندا باستالعان بەيبىت شەرۋگە قازاقستاننىڭ وزگە وڭىرلەرى دە قوسىلىپ، ونىڭ ارتى سودىرلاردىڭ ىلاڭىنا ۇلاسقان بولاتىن.

جاعداي ۋشىققاندىقتان 5 قاڭتار كۇنى پرەزيدەنت قاسىم-جومارت توقاەۆ الماتى قالاسى مەن ماڭعىستاۋ وبلىسىندا توتەنشە جاعداي رەجيمىن ەنگىزۋ تۋرالى جارلىققا قول قويدى. كەيىن قازاقستاننىڭ بۇكىل اۋماعى بويىنشا توتەنشە جاعداي رەجيمى ەنگىزىلدى.

7 قاڭتار كۇنى قر پرەزيدەنتىنىڭ كەلىسىمىمەن قر ۇلتتىق قاۋىپسىزدىك كوميتەتىنىڭ توراعاسى – رەسپۋبليكالىق جەدەل شتاب باسشىسىنىڭ بۇيرىعىنا سايكەس قازاقستان رەسپۋبليكاسىنىڭ اۋماعىندا تەرروريستىك قاۋىپتىڭ شەكتى «قىزىل» دەڭگەيى جاريالاندى. قر ىشكى ىستەر مينيسترلىگىنىڭ سوڭعى دەرەگى بويىنشا الماتىداعى وقيعالارعا بايلانىستى سوتقا دەيىنگى 125 تەرگەۋ باستالعان. بۇل ىستەر كىسى ءولتىرۋ، بيلىك وكىلىنە زورلىق-زومبىلىق جاساۋ، قارۋلى شابۋىل، بۇزاقىلىق جانە ۇرلىق فاكتىلەرى بويىنشا قوزعالعان.

سوڭعى جاڭالىقتار

وتكەن تاۋلىكتە 8 ادام كۆي جۇقتىردى

كوروناۆيرۋس • بۇگىن، 10:35

ۇقساس جاڭالىقتار