جىراۋعا ءىلتيپات

ەلىمىزدە ۋاقىت اعىمىمەن قالىپتاسقان جاقسى ءبىر ءداستۇر بار. ول جىر الىبى جامبىلدىڭ تۋعان كۇنىن جىل سايىن اتاپ ءوتۋ. بيىل دا جەتىسۋ جەرىندە بۇل ءۇردىس ءوز مارەسىنەن كورىندى. سالتاناتتى جيىندا ءدۇيىم جۇرتتىڭ الدىنا شىققان الماتى وبلىسىنىڭ اكىمى اڭسار مۇساحانوۆ: «جامبىل مەنىڭ ءوز اتىم, حالىق مەنىڭ شىن اتىم» دەپ ارتىنا وشپەس ءىز, ولمەس مۇرا قالدىرعان بابانىڭ جاۋھار جىرلارى ۋاقىت وتكەن سايىن ساف التىنداي جارقىراي تۇسۋدە», دەپ اتاپ كورسەتتى. ەلباسى نۇرسۇلتان نازارباەۆ « ۇلى جىرشى جامبىل – قازاقتىڭ ءداستۇرلى ادەبيەتىنىڭ اسا دارىندى, اسقاق جاراتىلعان الىپ وكىلى»    دەگەن ەدى. جامبىلدىڭ ەشكىمگە دەس بەرمەگەن سۋىرىپ سالما اقىن­­دىعىمەن قوسا, جىراۋلىعى, كۇيشىلىگى, قازاق حالقىن كۇللى الەم­گە تانىتقان ۇستىنە تانىتا تۇسكەنى اقيقات. ءسويتىپ, تالايلاردى تامسانتىپ قانا قويماي باس ءيدىرىپ, جامبىل حح عاسىردىڭ گومەرى اتانۋى تەگىن ەمەس. ءبىر عاسىر عۇمىر كەشىپ, ۇرپاعىنا ءول­شەۋسىز مۇرا قالدىرعان جىر الىبى كەيىنگى تولقىننىڭ قىزى­عۋشىلىعىن تۋعىزىپ ءھام قازاق ءتىلىنىڭ قاي­نارىنا قاندىرىپ, ءسوز قۇدىرەتىن ۇعىندىرۋدا. سونىمەن قاتار, ايتىس ونەرى ارقىلى جاستاردىڭ اسقاق ادامگەرشىلىك سەزىمى شىڭدالىپ, ەلگە, جەرگە, تۋعان تىلگە دەگەن سۇيىسپەنشىلىگى ارتۋدا. بۇگىنگىدەي ءار ۇلت ءوزى­نىڭ تابيعي بولمىسىن ساقتاۋ ارقىلى وركەنيەت ورىنە ۇمتىلىپ جاتقان تۇستا, جاس وسكىندەردى جامبىل جىرلارى ارقىلى ۇلت­تىق قۇندىلىقتى قاستەرلەۋگە بەيىمدەۋ ءبىزدىڭ ازاماتتىق بورىشىمىز دەپ ەسەپتەيمىن. جىل سايىن ءداستۇرلى تۇردە جامبىل كۇنى مەرەكەسىن وتكىزۋ «جامبىلتانۋ اتتى ۇلكەن ارنانىڭ باستالعانىن, ونىڭ ماڭگىلىك تاقىرىپ ەكەنىن اڭعارتادى. جامبىل تويى – قازاق مادەنيەتىنىڭ, قازاق ونەرىنىڭ تويى, ورتاق قازىنامىز دەدى. اكىم ودان كەيىن جامبىلدىڭ شوبەرەسى الىمقۇل جامبىلوۆتىڭ يىعىنا قۇندىز جاعالى شەكپەن جاۋى­پ, باسىنا بورىك كيگىزدى. مۇنى ازاماتتىڭ بىلگەندىگى, اسىلدىڭ سىنىعىن باعالاعاندىعى, دەپ ۇقتى جيىلعان قاۋىم. سالتانات سوڭى ءوڭىر ونەرپازدارىنىڭ اۋەلەتە سالعان اسەم اندەرى مەن كۇمبىرلەتە توككەن كۇيىنە ۇلاستى. نۇربول الدىباەۆ, «ەگەمەن قازاقستان». جامبىل اۋدانى, الماتى وبلىسى.