جاڭا زاۋىتتىڭ جاڭالىعى

«اگران» جشس اقتوبە فيليالى كوپسالالى كاسىپورىن. بۇعان دەيىن مۇندا مەتالل جابىندىلار شىعاراتىن وندىرىستىك جەلى پايدالانۋعا بەرىلىپ, قازىر قالىپتى جۇمىس ىستەپ تۇر. جاقىندا تاعى ءبىر شاعىن زاۋىت ىسكە قوسىلدى. بۇل كاسىپورىن جىلۋۇستاعىش اينەك پاكەتتەرىن شىعارادى. جوبا وتكەن جىلدىڭ اياعىندا قولعا الىنعان بولاتىن. قوندىرعىلاردى قىسقا مەرزىمدە ورناتقان سەرىكتەستىك ماماندارى ەندى ونىڭ يگىلىگىن كورمەك. مۇندا فلوات اينەك پاكەتتەرىنە جىلۋۇستاعىشتىق قاسيەت بەرۋ ءۇشىن ءوندىرىس جاعدايىندا پيروليز ادىسىمەن ىستىق اينەك بەتى جۇقا قاباتتا ارنايى مەتالل توتىعىمەن جابىلادى. مۇنداي جابىندى اينەكپەن بىتە قايناسىپ وعان ايرىقشا توزىمدىلىك بەرەدى. جىلۋۇستاعىش اينەك جوعارى ساۋلە وتكىزگىشتىك قاسيەتكە يە بولىپ, كوزگە كادىمگى اينەكتەن ايىرماشىلىعى بايقالمايدى. اينەك نەگىزىنەن رەسەيدىڭ جاقىن وڭىرلەرىنەن جەتكىزىلەدى. زاۋىتتىڭ نەگىزگى تەحنولوگيالىق قوندىرعىلارى اينەك كەسۋ, اينەك پاكەتتەرى ءوندىرىسىنىڭ اۆتوماتتى جەلىلەرىنەن جانە اينەكتى پىسىتۋ پەشىنەن تۇرادى. ءوندىرىس پۆح مەن اليۋمينيدەن جىلۋ-ۇستاعىش تەرەزەلەر ءوندىرىسى ءۇشىن قوندىرعىلار شىعاراتىن دۇنيە جۇزىندەگى ءىرى ءوندىرۋشى بولىپ تابىلاتىن اۆستريانىڭ جوعارى تەحنولوگيالىق قوندىرعىسى «LISEC» اۆتوماتتاندىرىلعان جەلىسىنە نەگىزدەلگەن. ءبىر جانە ەكى كامەرالى, ونىڭ ىشىندە جىلۋۇستاعىش اينەك پەن ءارتۇرلى مولشەردەگى اينەك پاكەتتەرىن شىعاراتىن مۇنداي جەلى وبلىستا ازىرگە بىرەۋ عانا. شاعىن زاۋىتتى سالۋعا 150,0 ميلليون تەڭگە قارجى جۇمسالعان. كاسىپورىننىڭ جىلدىق قۋاتى جىلىنا 200,0 مىڭ شارشى مەتر قۋات ۇنەمدەگىش اينەك پاكەتتەرىن شىعارۋعا مۇمكىندىك بەرەدى. جاڭا يننوۆاتسيالىق ءوندىرىستىڭ ىسكە قوسىلۋىمەن 25 جاڭا جۇمىس ورنى اشىلدى. مۇندا تولىقتاي جەرگىلىكتى ادامدار جۇمىس ىستەيدى. ولاردىڭ الدىڭعى لەگى رەسەيدە وسى ءوندىرىستى يگەرۋگە ماماندانىپ, تاجىريبەدەن ءوتىپ كەلىپتى. ولار كاسىپورىنعا كەيىنىرەك ورنالاسقان جۇمىسشىلارعا ءوز بىلگەندەرىن ۇيرەتىپ, جاڭا ماماندىققا قالىپ­تاسۋعا كومەكتەسۋدە. جاڭا قۋات ۇنەمدەگىش اينەك پاكەتتەرىن شىعاراتىن كاسىپورىننىڭ تۇساۋكەسەرىنە وبلىس اكىمىنىڭ ءبىرىنشى ورىنباسارى نۇرمۇحامبەت ابدىبەكوۆ قاتىسىپ, وندىرىستىك جەلىنى سالتاناتتى جاعدايدا ىسكە قوستى. ساتىبالدى ءساۋىرباي, «ەگەمەن قازاقستان». اقتوبە وبلىسى. سۋرەتتەردى تۇسىرگەن حايرەدين راۋشانوۆ.